Isaías 59
59
Jutsa ruraq kanqantsik
1Ama yarpäyaytsu salvayäshunaykipaq Dios Yaya poderninnaq kanqanta.
Payqa manam upatsu mañakuyanqaykita mana wiyayäshunaykipaq.
2Tsaypa rantinmi jutsaykikuna imayka jatun perqanö paypita rakiyäshunki.
Tsaymi jutsata rurayanqaykipita Diosnintsik rikäyäshunkinatsu.
Mañakuyaptikipis manam wiyayäshunkitsu.
3Wañutsikuq kayaptikim makikikunapis yawarllana kaykan.
Dëduykikunam runa wañutsiq.
Shimikikunapis alläpa llullakuqmi.
Qalluykikunapis mana allikunallatam parlan.
4Manam ni pipis allita rurananpaq yarpachakuntsu.
Demandakuqpis manam rasun kaqtaqa parlantsu.
Autoridäkunapis llullakuqkunatam mas creyiyan.
Manam ni pipis rasun kaqtaqa parlantsu.
Jutsaman umankuna churakashqam kayan.
5Llikanta pachka awaqnö y culebrapa runtunta oqllaraqnömi kayan.
Tsay runtukunata mikurmi wañun.
Runtuta pakiptinmi culebrakuna yarqayämun.#59.5 Kay textuchömi nin culebrapa runtunta oqllaraqnö kar runakuna llutankunata yarpäyanqanta. Tsaynöllam nin culebrakuna runata kaniqnö pïmaytapis mana alli kawayman chätsiyanqanta.
6Llatapata rurayänanpaq pachkapa llikan mana alli kanqannömi tsay runakunapa llapan rurayninkunapis mana alli.
Paykunatam mana alli ruraykunalla gustan.
7Tsaymi mana alli ruraykunallaman sas cörriyan.
Jutsannaq runata wañutsiqmi cörrilla aywayan.
Mana allikunata rurayänanllapaqmi imaypis yarparäyan.
Maypa aywarpis mana allikunata rurarllam puriyan.#Prov. 1.16.
8Alli kaway imanö kanqanta manam musyayantsu.
Manam imatapis allita rurayantsu.
Paykuna kawayanqannö kawarqa manam ni pipis alli kawayta tarinqatsu.#Rom. 3.15-17.
9Tsaymi salvakuyta munarpis puëdintsiktsu.
Runa majintsikwan alli kawaytapis manam tarintsiktsu.
Atsikyayta shuyashqapis tutapayllam kaykan.
Aktsichönö kawayta munarpis tutapaychönöllam kawaykantsik.
10Perqata yatayllapa puriq qapranömi kantsik.
Rikayta mana puëdir lamkayllapa puriqnömi kaykantsik.
Pullan junaqpis paqaspa taprakar ishkiqnömi kaykantsik.
Kawaykarpis wañushqanömi kaykantsik.
11Alläpa llakikurmi ösunöraq qayaraykachaykantsik.
Paluma waqaqnömi alläpa llakishqa waqaykantsik.
Alli kawayta shuyashqapis manam chämuntsu.
Salvakuyta munarpis manam salvakuntsiktsu.
12Imaypis jutsata rurarmi Dios Yayata rabyatsintsik.
Llapan ruranqantsikmi jutsayuq kanqantsikta willakun.
Jutsantsikta dëjayta mana puëdirmi jutsayuq kanqantsikta musyantsik.
13 Diosnintsikta manakaqman churarmi ninqankunata cäsuntsiktsu.
Mana allikunata ruranapaq y runa majintsikta engañanallapaqmi willanakuntsik.
14Juezkunapis alli ruraq runapa contranmi kayan.
Allita rurananpaqqa manam ni pipis yarpannatsu.
Rasuntanöraq parlarmi pïmaytapis creyitsiyan.
Pïmaymi suwapunakurlla kawayan.
15Llapanmi llullakuyan.
Alli ruraq runakunatam carcelman qaykatsiyan.
Tsayta rikarmi Dios Yaya alläpa rabyan.
16Mana allikunata rurayaptin pipis mana amatsaqta rikarmi Dios Yaya alläpa rabyan.
Tsaymi ñakaqkunapa janan kikin Dios Yaya shärishqa.#Isa. 63.5.
17Guërrachö tsapäkuna chilïquitam shukukushqa.
Tsay chilïquim alli rurayninkuna.
Tsaynöllam umanman cascu shukukunqan salvación kaykan.#Efe. 6.17; 1Tes. 5.8.
Runa majinkunata sufritsiqkunatam castigananpaq alläpa rabyar yarqushqa.
18Mana alli ruraqkunatam rurayninkunapita castiganqa.
Alläpa rabyarmi contrankunata jutsa rurayanqanman castiganqa.
Lamar kuchun markakunachö täkuqkunatam castiganqa.
19Castigananpaqmi mayu jeqaqnöraq Dios Yaya shamunqa.
Tsaymi rupay yarqamunanpita rupay jeqananyaq Dios Yayapita mantsakuyanqa.
20 Dios Yayam nin:
<<Juk salvakuqmi Siónman shamunqa.
Jacobpita miraqkuna jutsankunata dëjayaptinmi llapanta salvanqa>>.#Rom. 11.26.
21 Dios Yayam nin:
<<Paykunawan pactuta rurarmi nishaq:
<Qamkunawanmi imaypis Espïritü kanqa.
Kay pactutam imaypis yarparäyanki.
Manam imaypis qonqayankitsu.
Tsurikikuna y willkaykikunapis manam qonqayanqatsu> >>.
Currently Selected:
Isaías 59: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
