Isaías 5
5
Judá nacionta üva chakraman iwalatsinqan
1Amïgüpa shutinchömi üva chakrapaq cantashaq:
Amïgüpam lömachö alli wayuq üva chakran karqan.
2Rumikunata pallarmi shumaq corralarqan.
Alli ñawiyuq üva plantakunatam tsayman plantarqan.
Üva chakra chawpinchömi täpananpaq törrita ruratsirqan.
Üvata pallaskir jarunanpaqmi rumikunawan pözuta rurarqan.
Amïgümi üvan mishkiqta wayunanpaq kanqanta yarparqan.
Peru tsaynö yarpaykaptinmi üvan puchquta wayurqan.#Mat. 21.33; Mar. 12.1; Luc. 20.9.
3Tsaymi chakrapa ämun nin:
<<Jerusalén y Judá runakuna, kanan mä niyämay.
¿Üvata plantanqäku o noqaku mana allita rurashkä?
4Üvata plantar ¿imatatan mas ruräman karqan?
¿Imaraq faltashqa tsay plantaman wiñänäpaq?
Noqam yarparqä mishkiqta üva wayunanpaq kanqanta.
Peru allita plantaykaptïmi puchquqta wayushqa.
5<<Kananmi willashayki üva huertäta imata ruranäpaq yarpanqäta.
Däñu ushananpaq manam cuidashaqnatsu.
Jarutakuyänanpaqmi murällantapis juchuskatsishaq.
6Tsunya mana ima kaqtam dëjashaq.
Manam ni pipis llawmipanqatsu ni uryapanqatsu.
Kashallanam jankat juntanqa.
Mana tamyamunanpaqmi pukutaytapis mandashaq>>.
7Llapanta mandaq Dios Yayapa üva chakranmi Israel y Judá runakuna kayan.
Dios Yaya paykunata kuyar leyninkunata cumpliyänanpaq nikaptinpis wañutsinakuyllachömi kayan.
Yanapanakuyänanpaq nikaptinpis ñakaqkuna waqayanqallanmi wiyakan.#Jer. 2.21; Ose. 10.1; Luc. 13.6-9.
Judá runakunata castigananpaq ninqan
8¡Allaw, imanöraq kayanki, maytsaychöpis wajikunata rantiqkuna!
Huertakunatapis masta masta rantirmi llapanpa ämun kayanki.
Entëru nacionchöpis ¿qamkunallanaku takuyta munayanki?
9Llapanta mandaq Dios Yayam nimashqa:
<<Maytsika wajikunam ushakäyanqa.
Mayjina jatusaq ni kuyakuypaq kaptinpis manam ni pï täkunqanatsu.
10Kimsa hectaria üvapitam juk puyñullapaq#5.10 Wakin runakunaqa uyllullapaq niyan. vïnu yarqunqa.
Chunka costal trïgu muruta mururpis juk costalllatam qoriyanqa>>.
11¡Allaw, imanöraq kayanqa tsaka tsakapita upyaqkuna!
Paykunam vïnuta yawarkur warat qoyatpis upyar kaykäyan.
12Atska vïnuta upyar fiestata rurayanqanchömi arpata, salteriuta, cäjata, lawtata töcayanqan wiyakan.
Peru Dios Yaya castigananpaq kanqantaqa manam ni ichikllatapis yarpäyantsu.
13Mana tantiyakuq kayanqanpitam kuyanqä runakunata juklä nacionman prësu apayanqa.
Llapan runakunawan mandaqninkunam mallaqaywan y yakunaywan wañuyanqa.
14Mandakuq autoridäkunatawan patsan runakunatapis sepultüram shiminta äyarkur millpunqa.
Fiestachö kushishqa kaykaqtam llapantapis tsaynö millpuskinqa.
15Tsayraqmi allish tukuqkunapis penqakur umpuräyanqa.
16Pïmaymi musyayanqa llapanta mandaq Dios Yaya jutsannaq santu kanqanta.
17Juchutsishqa markakunachö pipis manana täkuptinmi qewallana wiñanqa.
Tsaymi tsay markakuna kanqanchö üshakunata cabrakunata mitsikuyanqa.
18¡Allaw, imanöraq kayanqa llullakuy mana alli costumbrita apamuqkuna!
Paykunam waskawan qarachaqnö tukuyläya mana allikunata apaykäyämun.
19Paykunam niyan:
<<Israel runakunapa santu Diosnin castigamaynintsikta munarqa mä sas castigamäshun.
Desgraciata apamuyta munarqa sas apamutsun.
Imanö castigamänapaq kanqanta musyaytam munayä>>.
20¡Allaw, imanöraq kayanqa mana alli kaqta <<allim>> niqkuna y alli kaqta <<manam allitsu>> niqkuna!
Tsaynö karmi atsikyaqtapis <<tutapan>> niyan.
Tutapaytapis <<atsikyanmi>> niyan.
Ayaqtapis <<mishkinmi>> niyan y mishkiqtapis <<ayanmi>> niyan.
21¡Allaw, imanöraq kayanqa yachaq tukuqkuna!
Paykunaqa kikillankunapaqmi yachayyuq kayan.
22¡Allaw, imanöraq kayanqa waran waran upyaqkuna,
machätsikuqkunata tallurkur tallurkur upyaqkuna!
23Qellaypaq raykum jutsayuqtapis <<jutsannaqmi>> niyan.
Jutsannaqtapis <<jutsayuqmi>> niyan.
24Llapanta mandaq Dios Yayapa leyninkunata manam cäsuyantsu.
Israel runakunapa santu Diosninpa palabrantam manakaqman churayan.
Tsaymi tsaki jachapa raprankunata laqwaypa laqwar nina rupaqnö Dios Yaya paykunata ushakätsinqa.
Tsaynöllam tsaki oqshata nina rupaqnö ushakätsinqa.
Jawan ismushqa jacha ushakanqannö y waytan shushur allpaman tikranqannömi ushakäyanqa.
25 Dios Yayam alläpa rabyashqa kaykan.
Kuyanqan runankuna kashqapis castigamänapaq alistakushqanam kaykan.
Tsayta musyarmi jirkakunapis alläpa tsuktsukyäyan.
Wañutsinqan runakunatapis cällikunamanmi jitariyanqa.
Castigamashqapis Dios Yayapa rabyaynin manam päsanqatsu.
Kanqallanmi castigamänapaq rikaraykämantsik.#Isa. 9.12, 17, 21; 10.4.
26Dios Yayam karu nacionchö täkuq runakunata bandërawan sëñasllapa qayanqa.
Mayjina karuchö täkuqkunamanmi wichyakunqa.
Qayakunqanta wiyarmi maytsaypitapis atacamänapaq sas shayämunqa.
27Tsay runakunam pishipayanqatsu ni ishkiyanqatsu.
Manam puñuyanqatsu ni puñunäyanqatsu.
Wachukunkunapis manam paskakanqatsu ni llanqinkunapis rachinqatsu.
28Flëchankunapis awjanö puncham kanqa.
Flëchakuyänankunapis previnishqallanam kanqa.
Bestiankunapa shillunkunapis chukru ruminömi kanqa.
Carrëtankunapa ruëdankunapis shukukuynöraqmi tumanqa.
29Tsay runakunam alläpa qayaykachar atacamäshun.
Leonkuna qayaräyanqannöraqmi wiyakanqa.
Wätakunata leonkuna apayanqannömi prësu apamäshun.
30Tsay runakunam atacamäshun bunyaypa bunyar lamar kuchunman chaqnö.
Patsapis tutapaqnöraq kaptinmi junaq kanqanpis musyakanqatsu.
Currently Selected:
Isaías 5: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
