Isaías 46
46
Babilonia nacionpa diosninkuna Dios Yayaman mana iwalanqan
1Bel diosmi vencishqa kaykan.
Nebo diospis manakaqman churashqam kaykan.#46.1 Bel dios y Nebo diosmi Babilonia runakuna adorayanqan dioskuna kayarqan. Tsay dioskuna vencishqa kayanqanta y manakaqman churayanqantam nirqan Persia nacionpa mandakuqnin rey Ciro Babilonia nacionta vencinanpaq kaptin.
Tsay diosninkunatam bestiakunawan chaqnarkur apayan.
Alläpa lasarmi bestiakunatapis pishipätsir aywapakätsin.#Jer. 50.2; 51.44.
2Tsay ïdulukunaqa ishkiskatsiyaptinpis manam shäriyantsu.
Confiakuyanqan runakunatapis manam salvayantsu.
Tsay runakunatam ïdulunkunatawan juklä nacionman prësu apayan.
3Dios Yayam nin:
<<Jacobpita miraq Israel runakuna, wiyayämay.
Mamaykipa pachallanchöraq kayanqaykipitam tsapäyashkaq.
Yuriyanqaykipitam marqashqa puritsiyashkaq.
4Tsaynöllam awkinyäyaptikipis rikäyäshayki.
Jankat soquyashqatam yanapayäshayki.
Qamkunatam kamayashkaq.
Maypa pusharpis cuidayäshaykim.
5<<¿Pimanraq iwalatsiyämanki?
¿Piraq noqanö kanman?
6Wakin kaq runakunam qorita y yuraq qellayta balanzachö pësarkur ïdulu ruraqta pägar ruratsiyan.
Ruraskatsirmi tsay ïdulupa puntanman qonqurikuykur adorayan.
7Wintushqa aparmi churaränanman churayan.
Churayanqanpitaqa manam kuyuntsu.
Tsay ïduluqa mayjina rugayaptinpis manam salvantsu.#Jer. 10.5.
8<<Mana cäsukuq runakuna, tsayta tantiyakur penqakuyay.
9Unaypitana castaykikunata imanö yanapanqäta yarpäyay.
Noqallam Dios kä.
Noqapita masqa manam juk Dios kantsu.
Manam ima ïdulupis noqanöqa kantsu.
10Noqam unaypitana ima kananpaqpis willakatsï.
Imapis päsananpaq atska wata faltaykaptinmi musyatsikü.
Ruranäpaq yarpanqätam llapanta rurä.
11<<Rupay yarqamunan kaqläpitam juk runata qayashkä.
Aytsapaq ayrajaq condornömi karu nacionpita shamunqa.
Ninqäta rurananpaqmi tsay runata pushamushaq.
Yarpanqänöllam llapanta rurashaq.
12<<Salvanäpaq kaqta mana creyiqkuna, cäsuyämay.
13Karu nacionchö kayanqaykipitam kutitsiyämushayki.
Qoriyämunaqpaq ichikllanam pishin.
Siónchö täkuyänaykipaqmi kutitsiyämushayki.
Kuyanqä Israel runakuna kayaptikim salvayäshayki>>.
Currently Selected:
Isaías 46: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
