Isaías 38
38
Qeshyanqanpita rey Ezequías kutikanqan
2 Reyes 20.1-11; 2 Crónicas 32.24-26
1Tsay witsaymi rey Ezequías alläpa antsa qeshyarnin wañuykarqanna. Tsaymi Amozpa tsurin profëta Isaías watukaqnin aywar nirqan: <<Dios Yayam nin: <Qam mananam kutikankinatsu. Llapan imaykaykikunatapis dispönir testakuy> >>.
2Tsaynö niptinmi Ezequíasqa wajipa perqan kaqläpa tikraskir Dios Yayata mañakur 3nirqan: <<Dios Yayallä, llapan shonqüwan ninqaykita cäsukur munanqaykinö kawakunqäta yarpaykullay>>.
Tsaynö nirmi alläpa llakikur waqarqan.
4Tsaynö rugakuptinmi Isaíasta Dios Yaya nirqan: 5<<Kutir Ezequíasta willanki: <Unay aylluyki David servinqan Dios Yayam nin: Alläpa waqar mañakamanqaykitam wiyashkä. Tsaymi qeshyanqaykipita kutikätsishayki. Chunka pitsqa wata masraqmi kawakunki.
6<< <Kawaykaptikillaraqmi qamtawan Jerusalén marka runakunata Asiria nacionpa mandakuqnin reypa poderninpita librayäshayki. 7Tsay ninqäta cumplinäpaq kanqanta musyanaykipaqmi juk milagruta rurashaq. 8Acazpa relojninchö señalanqan chunka grädatam llantuta qepaman kutitsishaq> >>.
Ninqannöllam rupaypa llantun chunka grädata qepaman kutirqan.
9Judá nacionpa mandakuqnin rey Ezequíasmi qeshyanqanpita kutikarkur kay alabanzata qellqarqan:
10Noqam yarparqä jövinllaraq kaykar wañukunäpaq kanqanta.
Wañushqakuna kaqman aywakur imaypis atsikyay patsata manana rikänäpaqmi yarparqä.
11Tsaynöllam kay patsachö Dios Yayata ni runakunatapis manana rikänäpaq kanqanta yarparqä.#38.11 Kay versïculuchö ninqanqa kay patsachö Dios Yayapis ni runakunapis yanapayämanqanta mananam probichashaqnatsu ninanmi.
12Dios Yaya, üsha täpana tsukllata ushakätsiqnömi ushakätsimanki.
Awaq runa telarchö awata rutuskir dëjaqnömi dëjamashkanki.
Paqasta y junaqtapis manana rikänäpaqmi illaqpita apakamayta munashkanki.
13Tullükunata león kaptuptin nanaywan qayaraqnömi waraypa qamta rugakushkaq.
Paqaspa junaqpapis alläpam sufritsimashkanki.
14Grüllakuna#38.14 Grüllaqa qewlla rikuqmi peru jatunmi. y wayanïtukuna waqaqnömi nanatsikur waqashkä.
Paluma waqaqnömi nanaywan waqashkä.
Ñawïpis alalaptinmi ciëlupa rikarämur rugakurniki mañakamushkä.
Alläpam sufrishkä. Dios Yaya, ¡llakipaykallämay!
15Kikiki castigamaptikiqa alfin imanäshaqraq.
Alläpa llakikurmi wañunqäyaq umpuräkushaq.
16Dios Yayallä, runakunaqa corrigiptikiraqmi munanqaykinö kawakuyänanpaq tantiyakuyan.
Noqapis corrigimaptikiraqmi munanqaykinö kawakunäpaq tantiyakushkä.
Kanan kutikätsimarmi kawayta qaramashkanki.
17Tsaymi sufrinqäpa rantin allillana kawakuykä.
Tukuyläya jutsätam perdonamashkanki.
Wañuykaqtanam salvamashkanki.
18Wañushqakunaqa mananam alabayäshunkinatsu.
Pamparaqkunaqa prometinqaykita cumpliptikipis manam rikäyannatsu.#Sal. 88.10-12.
19Peru kawaqkunam sïqa alabayäshunki.
Tsaynöllam noqapis qamta alabaq.
Prometinqaykita cumplinqaykitam tsurinkunatapis taytankuna willayan.
20 Dios Yaya, qammi wañuypita salvamanki.
Tsaymi templuykichö arpata töcar waran waran imaypis alabayäshayki.
21Ezequías kutikänanpaqmi Isaías nirqan: <<Hïgusta aqaskir reypa qerinman emplastuta churayay. Tsay emplastuwanmi kutikanqa>>.
22Tsaymi rey Ezequías Isaíasta tapurqan: <<¿Imanöpatan musyashaq Dios Yaya kutikätsimaptin templunman aywanäpaq?>>
Currently Selected:
Isaías 38: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
