Isaías 37

Rey Ezequías mantsakanqan

2 Reyes 19.1-13; 2 Crónicas 32.20-23

1Asiria nacionpa mandakuqnin rey ninqanta willaykuyaptinmi rey Ezequías alläpa mantsakar shukuranqan llatapanta rachiskir lütu llatapata shukukurqan. Tsaypitanam templuman aywar Dios Yayata mañakurqan. 2Amozpa tsurin profëta Isaíasta willayänanpaqmi kacharqan palaciuta cuidaq Eliaquimta, secretariu Sebnata y mas mayor sacerdötikunata. Tsaynö kachaptinmi lütu llatapankuna shukushqa llapan aywayarqan. 3Isaías kaqman chaykurmi rey Ezequías ninqanta willayarqan: <<Kanan junaqmi alläpa llakikuychö y penqakuychö kaykantsik. Qeshyakunanpaq warmi ñakar kallpannaq kanqannömi noqantsikpis kallpannaq kaykantsik. 4Dios Yayam wiyashqa kanqa Asiria nacionpa mandakuqnin rey kachamunqan capitán paypa contran parlanqanta. Tsaynö parlanqanpita Dios Yaya castigaykullätsun. Taytay, tsay runa ninqannö mana ushakätsimänapaq Dios Yayata mañakuykullay>>.

5Rey Ezequíaspa yanapaqninkuna tsaynö willayaptinmi 6Isaías nirqan: <<Dios Yaya ninqanta mandamaqnintsik reyta willar niyay: Asiria nacionpa mandakuqnin rey kachamunqan runakuna manakaqman churamar imaykata niyäshuptikipis ama mantsakaytsu. 7Noqam permïtishaq markanchö mana allikuna päsaykanqanta willayaptin tsay rey kutikunanpaq. Kutiykuptinmi markanchö wañutsiyanqa>>.

8Tsayyaqmi Asiria nacionpa mandakuqnin reyqa Laquis markapita Libna markaman atacaq aywarqan. Aywaykanqanta musyaskirmi Jerusalénman kachanqan runakuna paypa qepanta aywayarqan. 9Libnachö kaykarmi Asiria nacionpa mandakuqnin rey wiyarqan Etiopía nacionpa mandakuqnin Tirhaca soldädukunawan atacaq shamuykäyanqanta. Tsaymi guërraman yarqunanpaq Ezequíaspaq cartata qellqarkur kachakunqan runakunawan apatsir nirqan:

10Judá nacionpa mandakuqnin rey Ezequías: Confiakunqayki Diosnikich nishushkanki Jerusalénta atacayta mana puëdiyänäpaq. Tsaynö nishuptikipis ama creyiytsu. 11Musyankim llapan Asiria nacionpa mandakuqnin reykuna mayqan naciontapis ushakätsiyta munarqa ushakätsiyanqanta. ¿Tsaytsuraq qam salvakankiman? 12Unay ayllükunapis Gozán, Harán y Resef nacionkunatam ushakätsiyarqan. Telasarchö täkuq Bet-edén runakunata ushakätsiyaptin manam ni mayqan diosninkunapis salvarqantsu. 13Hamat, Arfad, Sefarvaim, Hena y Iva nacionkunapa mandakuqnin reykuna ushakäyanqannömi qampis ushakanki.

Dios Yayata Ezequías mañakunqan

2 Reyes 19.14-19

14Tsay cartata liyiskirmi Ezequíasqa templuman apaykur Dios Yayapa puntanman carta kicharaykaqta churarqan. 15Tsaychömi Dios Yayata mañakur nirqan: 16<<Israel runakunata kuyaq Dios Yaya, llapan imaykatam podernikichö katsinki. Querubinkunapa chawpinchömi jamaykanki.#Éxo. 25.17-22; Núm. 7.89. Japallaykim kay patsachö llapan nacionkunapaq poderyuq kanki. Qamllam kay patsata y ciëlutapis kamashkanki. 17Dios Yaya, mañakamunqäta wiyaykallämay. Imanö kayanqäta rikaykullay. Senaquerib kachamunqan capitán imaykatapis contrayki ninqanta ama qonqaykuytsu.

18<<Taytay, cartachö ninqannöllam Asiria nacionpa mandakuqnin reykuna nacionkunata jankat ushakätsir 19adorayanqan ïdulukunatapis waykayashqa. Tsay ïdulukunaqa manam rasunpa poderyuqtsu, sinöqa qerupita, rumipita rurashqallam karqan. Tsaymi Asiria runakuna ushakätsiyaptinpis tsay ïdulukuna ni imanäyarqantsu.

20<<Dios Yayallä, Asiria nacionpa mandakuqnin reypa makinpita salvaykallämay. Tsaynöpam maytsay nacionchö täkuq runakuna japallayki poderösu Dios kanqaykita musyayanqa>>.

Senaqueribpaq Isaías willakunqan

2 Reyes 19.20-37; 2 Crónicas 32.20-21

21Tsaypitam Amozpa tsurin Isaías kacharqan rey Ezequíasta willananpaq: <<Israel runakunata kuyaq Dios Yayam nin: <Noqam wiyashkä Asiria nacionpa mandakuqnin rey Senaqueribpa makinpita salvanaqpaq mañakamanqaykita. 22Tsaymi tsay reypaq nï:

<< <Qamta manakaqman churashurnikim Sión asikun.

Jerusalén markapis päsaptikim umanta aywipäshunki.

23¿Imanirtan manakaqman churamar ashamashkanki?

¿Imanirtan conträ parlashkanki?

¿Imanirtan yuraq ñawikipa rikarämashkanki?

¿Manaku Israel runakunapa santu Diosnin kanqäta musyanki?

24<< <Kachamunqayki runakunawan ashatsimarmi nishkanki:

<<Yupaytapis mana puëdiypaq carrëtäkunawanmi jirkakunaman yaykushkä.

Pipis mana yaykunan Líbano jirkakunayaqmi chashkä.

Tsaychömi jatusaq cedrukunata wallushkä.

Kuyakuypaq pïnukunatam wallushkä.

Mas altu jirkakunamanmi chashkä.

Mas kuyakuypaq muntikunamanmi yaykushkä.

25Juklä nacionkunachömi pözuta uchkur yakuta upyashkä.

Chakilläwanmi Egiptuchö llapan mayukunatapis tsapashkä>>.#37.24-25 Tsaykunatam rey Senaquerib nirqan alläpa aja kaqkunata ruranqanta aläbakur.

26<< <Tsaynö nir ¿manaku tantiyanki llapan imaykachöpis yanapanqaqta?

Manam kikillaykipitatsu nacionkunata vencishkanki.

Noqam vencinaykipaq unaypitana permïtishkä.

Noqa permïtiptïmi llapantapis ushakätsishkanki.

Tsaymi alli murallashqa markakunatapis juchuskatsir montunashqa rumitanö dëjashkanki.

27Noqa permïtiptïmi tsay markakunachö täkuqkunapa kallpankunapis ushakashqa.

Alläpa mantsakarmi qewanö ushakäyashqa.

Waji jananchö wiñaq qewakuna achaywan tsakiqnömi ushakäyashqa.

28<< <Llapan ruranqaykitam musyä.

Musyämi maypa aywanqaykita y maypita shamunqaykita.

Musyämi conträ shärinqaykitapis.

29Conträ shärir alläpa allish tukunqaykipitam senqaykiman arguyllata churashaq.

Shimikimanmi bozalta churashaq.

Tsaypitanam shamunqayki nänillapa kutitsishayki> >>.

30Tsaypitanam Ezequíasta Isaías nirqan:

<<Ninqäkuna rasunpa kanqanta musyanaykipaq kanan willashayki ima päsananpaq kaqtapis.

Kay wata y watanpis trïgu kikillan shushuskir jeqamuqllatam mikuyanki.

Peru jukaq watam sïqa murupakur cosechayanki.

Tsaynöllam üvakunata plantar cosechayanki.

31<<Kawaykar quëdaq Judá runakunam alli jawayuq jachanö mana maypa yarqur markankunachö täkuyanqa.

Alli wayuq jachanömi atskaman mirayanqa.

32Manam llapan Jerusalén runakunatsu wañuyanqa.

Sión lömachö täkuq wakin runakunam kawaykar quëdayanqa.

Llapanta mandaq Dios Yayam kuyayäshurniki salvayäshunki>>.

33<<Asiria nacionpa mandakuqnin reypaqmi Dios Yaya nin:

Jerusalénman manam yaykunqatsu.

Manam ni juk flëchayllapis flëchanqatsu.

Manam escüdun aptashqa atacanqatsu.

Marka tsaparaq perqa waqtankunamanpis manam allpata montunatsinqatsu.

34Shamunqallanpam shumaqlla kutikunqa.

Manam ni imanöpa Jerusalénman yaykunqatsu.

Noqa Dios Yayam nï.

35Kikïmi kay markata salvashaq.

Runakuna alabayämänanpaqmi tsaynö salvashaq.

Servimaqnï Davidta prometishqa karmi tsaynö cumplishaq>>.

36Tsay paqasmi Asiria soldädukunapa campamentunman aywar Dios Yayapa angelnin pachak pusaq chunka pitsqa waranqa (185,000) soldädunkunata wañutsirqan. Waränin alliq kawaykar quëdaq soldädukuna shärikaskamurmi maytsika soldädu majinkuna wañushqata tariyarqan. 37Tsaymi Asiria nacionpa mandakuqnin rey Senaquerib campamentunkunata paskaskir soldädunkunawan Nínive markaman kutikuyarqan.

38Jukpunmi diosnin Nisrocta templunchö Senaquerib adoraykaptin tsurinkuna Adramelec y Sarezer yaykuskir espädawan wañuskatsiyarqan. Tsaypitam Ararat partiman qeshpir aywakuyarqan. Senaqueribpa rantinmi jukaq tsurin Esar-hadónna rey yaykurqan.

Currently Selected:

Isaías 37: qxn

Highlight

Copy

Compare