Isaías 32
32
Alli rey mandakunanpaq ninqan
1Juk reymi kanqa alli justiciata rurar mandakuq.
Yanapaqnin autoridäkunam alli justiciata rurayanqa.
2Paykunam marka majinkunata shumaq rikäyanqa.
Tsaymi mana alli runakuna shukukuynö atacayaptinpis runakunata tsapäyanqa.
Mangädanö desgracia päsaptinmi yanapayanqa.
Tsaki jirkakunachö yakunömi kayanqa.
Alläpa achaptin runakuna llantukuyänanpaq jatun qaqanömi kayanqa.
3Tsay witsaymi Dios Yaya ninqanta runakuna shumaq cäsuyanqa.
Pay munanqannö kawakuyänäpaqmi shumaq tantiyakuyanqa.
Ninqanta cäsuyänanpaqmi llapanta shumaq wiyayanqa.
4Mana tantiyaqpis allinam tantiyayanqa.
Gägukuna y mana parlayta puëdiqkunapis allinam parlayanqa.
5Mana alli runataqa manam <<alli runam kanki>> niyanqanatsu.
Engañakuqkunatapis manam <<respitädu runam kanki>> niyanqanatsu.
6Mana alli runaqa mana allillatam parlan.
Mana allikunata rurananllapaqmi yarpan.
Dios Yayapaqpis llutankunatam parlan.
Mallaqaqkunatapis manam mikuyta qaraykuntsu.
Yakunaqkunatapis manam yakuta qaraykuntsu.
7Engañakuq runam pïmaytapis engañan.
Mana allikunata yarparmi umpuran.
Waktsakuna y qollmi shonqukuna demandakuyaptinpis manakaqtam tumpan.
8Peru alli runam sïqa shumaq yarpachakur imatapis ruran.
Tsaymi paytaqa pïmaypis respitayan.
Jerusalén warmikunapaq ninqan
9Tantiyakuyay, mana yarpachakuq warmikuna.
Imapis mana päsayäshunaykipaq kanqanta yarpaqkuna, niyanqaqta shumaq wiyakuyay.
10Kananpita juk wata päsaskiptinmi üvapis ni ima mikuypis cosechayänaykipaq kanqatsu.
Tsaymi alläpa mantsakäyanki.
11Imaykayuq kar tranquïlu kawakuq warmikuna, ¡mantsakar tsuktsukyäyay!
Llatapaykikunata llushtiskir lütu llatapatana shukukuyay.
12Alli wayuq chakrakuna mananam wayunqanatsu.
Üva cosëchapis manam kanqanatsu.
Tsayta rikarmi makikikunatapis tsoqparkur waqayanki.
13Chakraykikunatapis kashawan jachakunallanam qopinqa.
Kushishqa täkuyanqayki wajikikuna y markaykikunam munti jachakunallana tikranqa.
14Rey täkunqan palaciuchöpis mananam ni pï täkunqanatsu.
Cällikunachö maytsikaq runakuna karpis waray warantinqa tsunyam kanqa.
Markapa murällanwan törrinkunapis raqällanam kanqa.
Tsaychömi chucaru ashnukunallana kushishqa relinchayanqa.
Wätakunallatanam tsaychö mitsikuyanqa.
Espïritunta Dios Yaya kachamunanpaq ninqan
15Tsaynömi kanqa ciëlupita Espïritunta Dios Yaya noqantsikman kachamunqanyaq.
Espïritunta kachamuptinmi desiertupis muruna chakraman tikranqa.
Chakrakunam qoriytapis mana puëdiypaq wayunqa.#Isa. 29.17.
16Tsunya jallqakunachö y qechwakunachömi allitana runakuna rurayanqa.
17Maytsaychömi alli kawakuyanqa.
Imapitapis mana mantsakurmi imaypis kushishqa kawakuyanqa.
18<<Kuyanqä runakuna karmi markaykikunachö y wajikikunachöpis mana yarpachakurna täkuyanki.
19Jachakunata runtu tamya ushaptinpis,
juklä markakunata contrankuna juchutsiyaptinpis
20qamkunata imapis mana ñakatsiyäshuptikim kushishqa kawakuyanki.
Atska yakuyuq chakrakunachömi murupakuyanki.
Alli qewachömi yuntaykikunatapis y ashnuykikunatapis mitsikur kushishqa kawakuyanki>>.
Currently Selected:
Isaías 32: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
