Isaías 33
33
Dios Yaya salvamaqnintsik kanqan
1¡Allaw, wañutsikuq Asiria nación!
Wakin kaq nacionkunata atacayaptikipis manam ni mayqan nación atacayäshushkankiraqtsu.
Juk nacionkunata traicionaptikipis manam ni mayqan nación traicionayäshushkankiraqtsu.
Atacar ushaskiptikim kikikitapis atacayäshunki.
Juk nacionkunata traicionanqaykipitam kikikitapis traicionayäshunki.
2 Dios Yaya, llakipaykayällämay.
Qamllamanmi confiakayällämü.
Waran waran yanapaykayällämay.
Ñakaykuna chämuptinpis salvaykayällämay.
3Maqakuynöraq parlanqayki wiyakämuptinmi runakuna qeshpir aywakuyan.
Rabyanqaykita tantiyarmi llapan nación runakuna maytsaypa qeshpir aywakuyan.
4Paykunapatam imaykankunata contrankuna apakuyan.
Maytsika chukllushnöraqmi ushakätsiyan.
5Poderösu Dios Yayam ciëluchö kaykan.
Paymi Siónchö täkuq runakunata allita rurayänanpaq yachatsin.
6Paymi ima päsamashqapis yanapamäshun.
Tantiyatsimarnintsikmi yachayta qaramäshun.
Imayka mana allikunapitam salvamäshun.
Tsaymi Dios Yayapita mantsakur riquëzata katsiqnö kaykantsik.
7Contrantsikkunata rugakayämunanpaq kachakuykashqam mana llakipaypa atacamashkantsik.
Tsaymi valienti soldäduntsikkunawan autoridänintsikkuna llakikur cällikunachö waqaykäyan.
8Pipis manana puriptinmi nänikunapis tsunyaräkun.
Mana atacamänapaq äniskamarnintsikpis manam cumpliyantsu.#33.8 Kay textuchömi parlaykan Asiria runakunapaq. Asiriapa mandakuqnin rey Senaqueribmi Jerusalénta mana atacananpaq äniskirpis maytsika soldädunkunata mandarqan atacayänanpaq (2Rey. 18.14-17).
Testïgukunapa puntanchö äniskirpis manam cäsuyantsu.
Manam runa majintapis respitayantsu.
9Alläpa llakikuywanmi kay patsapis antsa kaykan.
Líbano jachapis penqakuypitam tsakiykan.
Sarón pampapis mana imakaq desiertum tikrashqa.
Basán jirkawan Carmelo jirkapis qarapatakashqam kaykäyan.
10Asiria runakunatam Dios Yaya nin:
<<Kanan castigayarniki qallaykuptïmi pï kanqäta musyayämanki.
11Qamkunapa yarpaynikikunaqa tsaki päjanömi.
Llapan rurayanqaykiqa trïgu päjanöllam.
Tsaymi päjata nina rupar ushaqnö qamkunatapis ushakätsiyäshayki.
12<<Llapan markaykikunapis uchpayanqanyaqmi rupar ushakanqa.
Tsakishqa kashata nina uchpayanqanyaq rupanqannömi ushakätsiyäshunki.
13Karuchö täkuqkuna, ruranqäkunapaq parlayanqanta wiyayay.
Cercachö täkuqkuna, poderösu kanqäta musyayay>>.
14Siónchö jutsayuq runakunam alläpa mantsakashqa kaykäyan.
Diosta mana cäsuqkunam alläpa mantsakar niyan:
<<Kay ñakaykuna nina rupaqnö kaykaptinqa ¿piraq kawanman?
Imaypis lunyaykaq ninanö kaykaptinqa ¿piraq salvakanman?>>
15Tsaykunapitam salvakanqa allillata ruraq runa,
rasun kaqllata parlaq runa,
pipa imantapis mana qechuq runa,
qarayta mana chaskipakuq runa,
wañutsiy niyaptinpis mana äniq runa,
y mana alli ruraykunapita witikuq runa.#Sal. 15.2-5; 24.3-5.
16Tsaynö kawakuq runam kay patsachö alli kawakunqa.
Rumi jananchö rurashqa alli wajiman tsinkakuqnömi kanqa.
Tsay runataqa manam ni imapis päsanqatsu.
Paypaqa mikuynin ni yakunpis manam pishinqatsu.
17Poderösu chipakyaykaq reytam rikäshun.
Nacionnintsikpa mujunninkunapis mas karuyaq kaykaqtam rikäshun.
18Tsaymi mantsatsimaqnintsik y chikimaqnintsikkunapaq yarpar nishun:
<<Impuestuta cobramaqnintsikkuna ni impuestu qellayta yupaqkunapis manam kayannatsu.
Chikimaqnintsik soldädukunapis törrintsikkunata manam rikäyannatsu>>.
19Tsay chikimaqnintsik juklä runakunam mana tantiyanqantsik idiömachö parlayan.
Paykunam valienti tukur pitapis respitayantsu.
Tsay runakunatam rikäshunnatsu.
20Tsaypa rantinmi Diosta alabana fiestata Siónchö ruraqta rikäshun.
Jerusalénchö runakuna kushishqa kawakuqtam rikäshun.
Estäcakuna mana sutakaptin y tsararaq waskakuna mana rachiptin puritsina carpa següru kanqannömi Jerusalén markapis següru kanqa.
21Tsaychömi Dios Yaya musyatsimäshun poderösu kanqanta.
Jerusalénta jatun mayu tumat tsaparaqnömi kanqa.
Tsaymi contrantsikkuna atacamaynintsikta munarpis puëdiyanqatsu.
22 Dios Yayam jueznintsik.
Dios Yayam leykunata entregamashkantsik.
Dios Yayam mandamaqnintsik rey.
Paymi chikimaqnintsikkunapita tsapämäshun.
23 Büquipa mastilninpita#33.23 Büquipa mastilninmi büquipa chawpinchö jatun ichiraq qeru. Büquipa vëlannam mastilninpita warkaraq jatun carpa. Vëlanta wayra pükaptinmi büqui aywan. waskakuna paskakaptin aywayta mana puëdinqannömi contrantsikkunapis ni imanakayta puëdiyanqatsu.
Wayra pükananpaq büquipa vëlan mana mashtakaptin aywayta mana puëdinqannömi kayanqa.
Tsaymi chikimaqnintsikkunata venciskir imaykankunatapis rakipunakushun.
Ratakunapis paykunapa imaykankunatam apakuyanqa.
24Siónchö täkuqkunatam tukuyläya jutsankunapita Dios Yaya perdonanqa.
Tsaychö täkuq runam ni mayqanpis <<qeshyaykämi>> niyanqatsu.
Currently Selected:
Isaías 33: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
