Isaías 16

1Moabita runakunam Judá nacionpa mandakuqnin rey yanapananpaq rugakur üshakunata apatsiyanqa.

Desiertuchö Sela markapitam Sión lömaman apatsiyanqa.

2Moabpita qeshpir aywaq warmikunam Arnón mayu väduchö qorikaykur shuyaräyanqa.

Tsay warmikunam imapis mantsakätsiptin qeshunpita qeshpir aywakuq pishqunö kayanqa.

3Jerusalén runakunatam rugakur niyanqa:

<<¡Llakipäyämar yanapaykayällämay!

¡Conträkunapita tsapaykayällämay!

¡Qeshpiyämuptï poderninkunaman ama entregaykayällämaytsu!

4¡Qamkuna kaqman tsinkakayämuptï pakaykayällämay!

¡Ushakätsimaqnïkunapita tsapaykayällämay!>>

Moabita runakuna, chikiyäshuqnikikunam imay karpis ushakäyanqa.

Ushakätsiyäshuqnikikunam wañuyanqa.

Wañutsiyäshuqnikikunam aywakuyanqa.

5Peru Davidpita miraqmi sïqa rey kanqa.

Paymi llakipäkuq kanqa.

Mana chaskipakuq juezmi kanqa.

Mana shuyarätsiypam pitapis alli justiciata ruranqa.

6Musyantsikmi moabita runakuna alläpa allish tukuyanqanta.

Paykunam wakinpitapis mas poderyuq tukuyan.

Manam ni pitapis respitayantsu.

Alläpa baduläquim kayan.

7Tsaymi moabita runakuna alläpa waqayanqa.

Kir-haresetchö rurayanqan päsasyuq biscöchukuna ushakaptinmi alläpa llakikur waqayanqa.

8Hesbónchö y Sibmachö üvakunam qarwatanqa.

Nacionkunapa mandaqninkuna atacarmi alli wayuq üvakunata jarutakuyanqa.

Jazeryaq y tsunyakunayaqmi tsay üvakuna murushqa kaykan.

Tsaynöllam Kachi Lamar tsimpankunachöpis wayun.

9Sibmachö üvakuna ushakaptin Jazerchö waqayanqannömi noqapis alläpa waqashaq.

Hesbón y Eleale markakunatam weqïwan parqushaq.

Cosëcha witsay üvata cosechayanqanpa rantinmi atacaqnin soldädukunawan maqanakur qayaraykachäyanqa.

10Tsaymi alli wayuq chakrakunachö kushikuypis kanqanatsu.

Üva chakrakunachöpis manam cantayanqanatsu.

Üva jarukuyänankunachöpis mananam vïnupaq üvata jaruyanqanatsu.

Manam kushikur qayaykachäyanqanatsu.

11Tsaymi Moab nacionpaq y Kir-hareset markapaq llakikü.

Arpapa cuerdannöraqmi shonqüpis alläpa llakikur tsuktsukyan.

12Moabita runakunam altarninkunamanpis pishipayanqanyaq manakaqllapaq aywayanqa.

Templunmanpis manakaqllapaqmi mañakuq aywayanqa.

13Moab nación tsaynö ushakänanpaqmi unaypitana Dios Yaya nirqan. 14Peru kananmi Dios Yaya nin: <<Kananpita kimsa watatam Moab nación runakuna maytsikaq kayanqanpita wallkaqllana kawaykar quëdayanqa. Kimsa wata arunanpaq conträtu ruraq runa cada junaqta yupanqannömi tsay kimsa wata yupashqalla kanqa>>.

Currently Selected:

Isaías 16: qxn

Highlight

Copy

Compare