Isaías 17
17
Damasco marka imanö kananpaq ninqan
1Kaychömi qellqashqa kaykan Damasco marka imanö kananpaq Dios Yaya revelanqan.#Jer. 49.23-27; Amós 1.3-5; Zac. 9.1.
Damasco markam jankat ushakar raqällana tikranqa.
2Aroer parti markakunachö manam täkuyanqanatsu.
Qewallana juntaptinmi pipis mana mantsatsishqa wätakunallana pärayanqa.
3Efraín runakuna#17.3a Efraín runakunapaq parlarqa norti kaqlächö Israel nación runakunapaqmi parlan. täkuyanqan corralashqa markakunapis manam kanqanatsu.
Damasco markachöpis rey manam kanqanatsu.
Siria nacionchö#17.3b Siria nacionpa capitalninmi Damasco markaqa karqan. quëdaq runakunapis Israel nacionchö wallkaqllana kayanqannömi kayanqa.
Llapanta mandaq Dios Yayam tsaynö nin.
Israel nación castigashqa kananpaq willakunqan
4Tsay witsaymi Israel nacionpis poderninnaq kanqa.
Tsay nacionmi uyu runanö kallpannaq kanqa.
5Refaim pampachö trïguta sëgaskiyaptin laströjunöllanam kanqa.
6Olïvu jachata tapsir wayuyninta qoriyaptin juk ishkayllana quëdaqnömi quëdanqa.
Mas rämasapa kaqkunachö kimsa chuskulla quëdaqnömi quëdanqa.
Israel runakunata kuyaq Dios Yayam tsaynö nin.
7Tsay witsaymi kamaqnin Dios Yayata rugayanqa.
Israel runakunapa santu Diosninmanmi confiakuyanqa.
8Juk dioskunata mañakuq manam perqayanqan altarkunaman aywayanqanatsu.
Manam kikinkuna rurayanqan Asera diösaman confiakuyanqanatsu
ni altarkunachö diosninkunaman inciensiuta qoshnïtsiyanqanatsu.
9Tsay witsaymi Israelchö corralashqa markakunachöpis täkuyanqanatsu. Heveo y amorreo runakunata Israel runakuna ushakätsiyanqannö ushakätsiyaptinmi jankat raqällana quëdanqa.
10Tsaynömi kayanki imaykapitapis salvayäshuqniki Dios Yayata qonqayanqaykipita.
Imaykapita tsapäyäshuqniki Dios Yayatam dëjayashkanki.
Tsaymi juklä nacionpita apatsimur sas poquq mikuykunata muruyaptikipis
11muruyanqayki junaqlla jeqaskamur waränillan tukturpis cosëcha kanqatsu.
Tsay junaq alläpa ñakar waqayaptikim shonquykikunapis alläpa nananqa.
12Lamar qayaraqnömi contrantsik nacionkuna piñakuyanqan wiyakämun.
Piñakur qayaykachäyanqanpis mayu jeqar bunyaypa bunyar aywaqnömi wiyakämun.
13Peru tsaynö qayarar shayämuptinpis Dios Yaya piñapaptinmi karupa qeshpir aywakuyanqa.
Jirkachö oqshata wayra apaqnö y polvuta shukukuy apaqnömi aywakuyanqa.
14Tsay runakunam patsa tutapaptin alläpa mantsakashqa kaykäyan.
Patsa waränanpaqqa manam kayannatsu.
Tsaynömi illakäyanqa imaykantsikta apaqkuna y markantsikta ushakätsiqkuna.
Currently Selected:
Isaías 17: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
