Isaías 10
10
1¡Allaw imanöraq kayanki, mana allita rurar favornikikunalla leyta ruraqkuna!
Qamkunam tsay leynikikunawan runakunata alläpa sufritsiyanki.
2Waktsakunatapis manam cäsuyankitsu.
Paykuna demandakuyaptinpis manam justiciata rurayankitsu.
Viüdakunapa imaykankunatam qechuykäyanki.
Waktsayashqakunatam suwapuyanki.
3Dios Yaya castigayäshunqayki junaq ¡imanöraq kayanki!
Ushakätsiyäshunaykipaq karu nacionpita chäyämuptin washäyäshunaykipaq ¡pimanraq witiykuyanki!
Riquëzaykikunatapis ¡maymanraq pakäyanki!
4Ni imanakayta mana puëdiykaqtam wakikita prësu apayäshunki y wakikitam wañutsiyäshunki.
Dios Yaya tsaynö castigayäshurnikipis rabyashqallam kaykanqa.
Yapay castigayäshunaykipaqpis listum kaykan.#Isa. 5.25; 9.12, 17, 21.
Asiria nacionta castigananpaq Dios Yaya willanqan
5¡Allaw, imanöraq kanqa Asiria nacionpa mandakuqnin rey!#Isa. 14.24-27; Nah. 1.1—3.19; Sof. 2.13-15.
Tsay rey imayka garutikuna tukrünö kaptinmi pipis rabyatsimaqtaqa paywan castigatsï.
6Mana cäsuyämar rabyatsimaq nación runakunamanmi payta mandä.
Paykunata venciskirmi cällichö qetätanö jarukachaskir imaykankunatapis apan.
7Peru tsayta rurananpaq mandaptïpis tsay rey manam cäsumantsu.
Manam sueñuyllanchöpis yarpantsu.
Tsaypa rantinmi maytsay nacionkunata ushakätsiyta yarpan.
8Tsaymi nin:
<<Capitannïkunapis mandakuq reykunanömi poderyuq kayan.
9Calno markatapis Carquemis markatanöllam ushakätsishkä.
Hamat markatapis Arfad markatanöllam ushakätsishkä.
Samaria markatapis Damasco markatanöllam ushakätsishkä.
10Vencinqä nación runakuna adorayanqan ïdulukuna poderyuq kayaptinpis jankatmi vencishkä.
Jerusalénchö y Samariachö adorayanqan ïdulukuna poderyuq kayanqanpitapis tsay ïdulukunam mas poderösu kayarqan.
Tsaynö kaptinpis llapantam vencishkä.
11Ïdulunkunaman confiakuyaptinpis Samariata vencinqänölla ¿manatsuraq Jerusaléntapis ïduluntinta vencishaq?>>
12Tsaynö parlar allish tukur poderyuq tukunqanpitam Asiria nacionpa mandakuqnin reyta Dios Yaya castiganqa. Sión lömachö y Jerusalénchö täkuq runakunata castigayta ushaskirmi paytapis castiganqa.#2Rey. 19.20-32. 13Tsay mandakuq reymi allish tukur nishqa:
<<Poderyuq kar y alli yarpayyuq karmi llapanta rurashkä.
Nacionkunapa mujunninkunatam ushakätsishkä.
Llapan riquëzankunatam apamushkä.
Valienti kaynïwanmi reykunatapis vencishkä.
14Qeshuchö runtuta tariskir apaqnömi juklä nación runakunapa riquëzankunatapis jankat apamushkä.
Tsaynö ruraptï manam ni pï amatsamashqatsu ni parlakushqatsu>>.
15¿Acäsu jächaqa manijaqninpita mas poderyuqku?
Tsaynöllam trosadörapis sutaqninpita mas poderyuqtsu.
Tukrupis manam üsaqninta munanqanpatsu apan.#10.15 Tsaynöllam Asiria nacionpa mandakuqnin reypis kikinpa poderninwantsu nacionkunata vencishqa, sinöqa Dios Yaya yanapaptinmi.
16Tsaymi llapanta mandaq Dios Yaya Asiriapa soldädunkunata qeshyaywan castiganqa.
Allish kayanqanpa rantinmi nina lunyaqnöraq fiebri qeshyaywan castiganqa.
17 Santu Dios Yayam Israel runakunapa salvaqnin kar aktsinö kaykan.
Kananmi nina lunyar rupaqnö kanqa.
Tsaymi kashakunata nina rupaqnö Asiria nacionpa soldädunkunata juk junaqllachö ushakätsinqa.
18Asiriachö kuyakuypaq jachakunatam jankat ushakätsinqa.
Runakuna muruyanqanta y plantayanqantam jankat ushakätsinqa.
19Tsaymi muntichö jachakuna wallkallana quëdaptin ayka kayanqantapis wamrallana yupanqa.
Kawaykar quëdaq Israel runakuna Diosman confiakuyänanpaq ninqan
20Tsay witsaymi Israel runakuna wallkaqlla kawaykar quëdayanqa.
Paykunam ushakätsiqnin Asiria runakunaman confiakuyanqanatsu.
Tsaypa rantinmi Israel runakunapa santu Diosninllamanna confiakuyanqa.
21Dios Yayamanmi wallkaqlla yapay confiakuyanqa.
Jacobpita miraq runakunapita wallkaqllam poderösu Dios Yayaman kutiyanqa.
22Lamar kuchunchö arenïllanöraq kayänan kaykaptinpis Israel runakunam wallkaqlla quëdayanqa.
Wallkaqlla quëdananpaqmi nacionninkunata Dios Yaya ushakätsinqa.
23Yarpanqannömi llapanta mandaq Dios Yaya llapanta ushakätsinqa.#Gén. 22.17; Rom. 9.27.
24Llapanta mandaq Dios Yayam nin: <<Siónchö täkuq kuyanqä runakuna, Asiria runakunata ama mantsayaytsu. Egipto runakuna unay aylluykikunata sufritsiyanqannö sufritsiyäshuptikipis ama mantsayaytsu. 25Kananpitam sasllana qamkunapaq rabyashqa kaykanqä päsanqana. Tsaypitam Asiria runakunata ushakätsishaq. 26Paykunata alli astaptïmi madianita runakunata Oreb qaqachö Gedeón vencinqannö kanqa.#Jue. 7.25. Tsaynöllam kanqa väräta lamar jananpa Moisés toqriptin Egipto runakunata tallpukätsinqänö. 27Tsay witsaymi lasaq qepita aparitsiqnö ñakatsiyäshuptiki salvayäshayki. Yüguta matankätsiqnö katsiyäshuptikipis makinkunapita jipiskirmi alli kawakuyänaykipaq bendicionnïta churamushaq>>.
Israel nacionta Asiria runakuna atacayanqan
28¡Asiria soldädukunam Ajat partimanna chäyashqa!
¡Tsaypitam Migrón partipa aywar Micmas partimanna chäyashqa!
29¡Raqrata päsaskamurmi Geba partichöna patsashqa kaykäyan!
Tsayta rikarmi Ramá runakuna alläpa mantsakäyan.
Saúlpa markan Gabaachö täkuqkunam qeshpir aywakuyashqa.
30¡Galimchö täkuqkuna, llapan kallpaykikunawan qayaykachäyay!
¡Laischö täkuqkuna, tsayta wiyayay!
¡Allaw, imanöraq kaykäyan Anatot markachö täkuqkuna!
31Madmena runakunam maytsaypa witsikäyashqa.
Gebimchö täkuqkunam tsinkakuyashqa.
32Kanan höram Asiria runakuna Nob partichö shütaykäyan.
Tsaychömi alistakuykäyan Jerusalénchö Sión lömata atacaq yaykuyänanpaq.
33Tsaynö alistakuyaptinpis llapanta mandaq Dios Yayam Asiria runakunata ushakätsinqa.
Jatun qeruta walluqnömi paykunata ishkitsinqa.
Allish tukuyaptinpis jatusaq jachata wallur patsaman ishkitsiqnömi ushakätsinqa.
34Jirakashqa jachata jächawan tsaquqnömi ushakätsinqa.
Líbanuchö jatusaq qerukunata qapapaqtaraq ishkitsiqnömi paykunatapis ushakätsinqa.
Currently Selected:
Isaías 10: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
