Hebreos 8
8
Mushuq pactuta Dios Yaya ruranqan
1Shumaq tantiyakuyay: Mandakuq sacerdöti Jesucristo poderösu Dios Yayapa trönun derëcha kaq lädunchömi jamaykan.#Sal. 110.1. 2Kananqa ciëluchö kaq Sagrädu Carpachömi mandakuq sacerdöti kaykan. Tsay carpataqa manam runakunatsu shäritsiyashqa, sinöqa kikin Dios Yayam.
3Kay patsachö mandakuq sacerdöti tsaki mikuy ofrendakunata y sacrificiukunata Dios Yayapaq apanqannömi mandakuq sacerdöti Jesucristupis noqantsik rayku wañur Dios Yayapaq sacrificiunö karqan.#Heb. 7.27; 9.14. 4Kay patsallachö karqa Jesucristo manam sacerdöti kanmantsu karqan. Kay patsachöqa Moisés qellqanqan leykunachö ninqannömi ofrendakunata y sacrificiukunata altarchö waykayänanpaq unayna sacerdötikuna kayan. 5Paykunam ciëluchö Sagrädu Carpatanö templutanö rurayanqallanchö Dios Yayata serviyan. Tsaytam musyantsik Moisésta Dios Yaya nishqa kaptin: <<Llapanta ruratsinki kay jirkachö rikätsinqaqtanölla>>. Paytam Sagrädu Carpata shäritsinanpaq rikätsir tsaynö nirqan.#Éxo. 25.40.
6Peru Jesucristum sïqa kay patsachö kaq sacerdötikuna Dios Yayata serviyanqanpitapis mas alli servin. Tsaynöllam favornintsik ruranqan mushuq pactupis unay kaq pactupita mas alli. Tsay mushuq pactuchömi mas alli kaqkunata Dios Yaya prometimantsik. 7Unay kaq pactuchö imapis mana faltaptinqa manam yapay juk pactuta Dios Yaya ruranmantsu karqan. 8Peru unay kaq pactuta runakuna cumpliyta mana puëdiyaptinmi Dios Yaya nirqan:
<<Jukpunmi Israel runakunawan y Judá runakunawan mushuq pactuta rurashaq.
9Tsay pactuqa manam unay ayllunkunata Egiptupita jipimur ruranqä pactunötsu kanqa.
Unay ayllunkuna tsay pactuta mana cumpliyaptinmi paykunata cäsushkänatsu.
Noqa Dios Yayam nï.
10Tsay junaqkuna päsaskiptinmi Israel runakunawan pactuta rurashaq.
Tsaynö rurarmi leynïkunata yarpayninkunaman churashaq.
Shonqunkunamanmi leynïkunata qellqashaq.
Paykunapa Diosninkunam kashaq.
Paykunanam kuyanqä runakuna kayanqa.
Noqa Dios Yayam nï.
11Tsay witsaymi waktsapis rïcupis llapan reqiyämanqa.
Tsaymi reqiyämänanpaq ni pipis runa majinta ni wawqinta yätsinqanatsu.
12Paykunapa llapan jutsankunatam perdonashaq.
Ima jutsata rurayanqantapis manam yarpäshaqnatsu>>.#Jer. 31.31-34.
13Mushuq pactupaq tsaynö parlarmi Dios Yaya tantiyatsimantsik unay pactu makwayashqana kanqanta. Makwayarnam ushakanqa.
Currently Selected:
Hebreos 8: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
