Hebreos 11

Dios Yayaman confiakuyanqan

1Dios Yayaman confiakurmi musyantsik pay prometimanqantsikkunata cumplinanpaq kanqanta. Tsaymi prometimanqantsikkunata manaraq rikarpis chaskinapaq shuyaraykantsik. 2Dios Yayaman confiakuq unay runakunapis Dios munanqannömi kawakuyarqan.

3Dios Yayaman confiakurmi kay patsatapis ciëlutapis pay ninqanllawan kamanqanta tantiyantsik. Llapan rikanqantsiktam mana kaqpita kamarqan.#Gén. 1.1; Sal. 33.6, 9; Juan 1.3.

4Abelpis Dios Yayaman confiakurmi wawqin Caínpita mas allin kaq sacrificiuta Dios Yayapaq waykarqan. Abel waykanqanta chaskirmi Dios Yaya musyatsirqan alli runa kanqanta.#Gén. 4.3-10. Abel unayna ushakashqa kaykaptinpis ruranqantam kananyaqpis yarpantsik.

5Enoctapis Dios Yayaman confiakuptinmi kawaykaqta Dios Yaya apakurqan. Dios Yayapa palabranchömi nin Dios Yaya munanqannö Enoc kawakunqanta.#Gén. 5.21-24.

6Dios Yayaman mana confiakurqa manam ni imanöpapis pay munanqannö kawashuntsu. Dios Yayaman confiakunapaqqa pay kanqanta creyishun. Tsaynölla creyishun payta ashiqkunata yanapanqanta.

7Noépis Dios Yayaman confiakurmi arcata rurarqan diluviupita tsurinkunawan y llumtsuyninkunawan salvakäyänanpaq. Diluviu kananpaq kanqanta Dios Yaya willaptinmi diluviuta manaraq rikarpis arcata rurarqan. Tsaymi mana creyikuq runakunata Dios Yaya ushakätsirpis Noéta salvar jutsannaqta chaskirqan.#Gén. 6.13-22.

8Abrahampis Dios Yayaman confiakurmi markanta dëjaskir Dios Yaya entregananpaq kaq nacionman aywakurqan. Tsaymi may nacionman chänanpaq kanqantapis mana musyaykar Dios Yaya ninqannö aywakurqan.#Gén. 12.1-5. 9Dios Yaya prometinqan nacionman chaykurpis payman confiakurmi carpakunallachö juklä runanölla täkurqan. Abrahamtanö Dios Yaya prometiptinmi Isaacpis y Jacobpis tsaynölla täkuyarqan. 10Abraham tsaynö täkurqan Dios Yaya shäritsinqan mana ushakaq markaman chänanpaq kanqanta musyarmi.#Heb. 13.14.

11Sarapis Dios Yayaman confiakurmi chakwanyanqanyaq qolluq kaykarpis qeshyaq karqan. Paymi Dios Yaya prometinqanta cumplinanpaq kanqanta creyirqan.#Gén. 17.19; 18.11-14; 21.2; Rom. 4.17-22. 12Tsaynöpam Abraham alläpa awkinna kaykaptinpis tsurin yurirqan. Tsaypitanam paypa tsurin y tsurinpita miraqkunapis jatun nación kanqanyaq mirayarqan. Paykunam yupaytapis mana puëdiypaq qoyllurnöraq y lamar kuchunchö arenïllanöraq maytsikaq kayan.#Gén. 15.5; 22.17.

13Dios Yaya prometinqanta manaraq chaskirpis Abraham, Sara, Isaac y Jacob payman confiakuykarllam wañukuyarqan. Manaraq chaskirpis Dios Yaya cumpliykaqta rikarmi kushikuyarqan. Paykunam kay patsachö qorpanölla kayanqanta tantiyayarqan.#1Crón. 29.15; Sal. 39.12. 14Tsaynö tantiyarmi ciëluchö kaykaq markaman aywakuyänanpaq shuyaräyarqan. 15Paykunaqa unay täkuyanqan markankunaman kutiyta manam yarpäyarqantsu. Markankunapaq llakirqa imaykanöpapis kutiyanmanmi karqan. 16Markankunapaq llakiyanqanpa rantinmi ciëluchö mas alli kaq markapaq yarpäyarqan. Tsaymi paykunapa Diosnin kayta Dios Yaya penqakuntsu. Tsay markatam alistashqallatana paykunata shuyaraykätsin.

17Abrahampis Dios Yayaman confiakurmi japallan tsurin Isaacta altarchö waykananpaq Dios Yaya niptin waykananpaq pusharqan.#Gén. 22.1-14. 18Tsaynö pusharqan Isaacpita atskaman mirananpaq Dios Yaya prometishqa kaykaptinpis.#Gén. 21.12. 19Tsaymi yarparqan wañutsiptinpis Isaacta kawatsimunanpaq kanqanta. Rasunpa kawamushqatanömi Abraham payta chaskirqan.#Gén. 22.13.

20Isaacpis Dios Yayaman confiakurmi Jacobman y Esaúman bendicionta churarqan.#Gén. 27.27-29, 39-40.

21Jacobpis Dios Yayaman confiakurmi Josépa tsurinkunaman bendicionta churarqan. Wañukunanpaqna kaykarmi bendicionninta churar tukrunman tukmakurkur Dios Yayata adorarqan.#Gén. 47.31—48.20.

22Josépis Dios Yayaman confiakurmi Israel majinkunata willarqan Egiptupita yarquyänanpaq kanqanta. Wañunanpaqna kanqanta musyarmi paykunata nirqan: <<Kaypita aywakur tullükunatapis aparkur aywakuyanki>>.#Gén. 50.24-25; Éxo. 13.19.

23Moiséspa maman taytanpis Dios Yayaman confiakurmi Faraón mandanqanta cäsuyarqantsu. Tsaymi Moisés yuriptin kuyakuypaq kanqanta rikar kimsa killantin pakarätsiyarqan.#Éxo. 1.22; 2.2.

24Moiséspis Dios Yayaman confiakurmi jatunyaskirqa Faraónpa warmi tsurinpa wawannö#Éxo. 2.10. kayta munarqantsu. 25Tsaymi Faraónpa wajinchö jutsata rurar kawanqanpa rantin Israel majinkunawan sufrir kawarqan. 26Dios Yayapita premiuta chaskinanpaq kanqanta musyarmi Egiptuchö rïcu kayta munarqantsu, sinöqa Cristo rayku sufrinqan mas alli kanqantam tantiyarqan.

27Dios Yayaman Moisés confiakurmi Faraónpita mana mantsakur Dios Yayata rikaykaqnö Egiptupita aywakurqan. 28Dios Yayaman confiakurmi Israel runakunata nirqan Pascua fiestata rurar punkupa marcunkunata yawarwan llushiyänanpaq. Tsaynö llushitsirqan wañutsikuq ángel yawarta rikar Israel runakunapa wajinkunachö mayor tsurinkunata mana wañutsinanpaqmi.#Éxo. 12.21-30.

29Israel runakunapis Dios Yayaman confiakurmi Puka Lamar tsakishqapa päsayarqan. Peru Egipto runakunam sïqa qepanta yaykuyanqanchö shinqar wañuyarqan.#Éxo. 14.21-31.

30Dios Yayaman confiakur Israel runakuna Jericó markata qanchis junaq tumapaykäyaptinmi murällanpis juchuskirqan.#Jos. 6.12-21.

31 Prostitüta Rahabpis Dios Yayaman confiakurmi rikapakuq Israel runakunata kushishqa chaskirqan.#Jos. 2.1-21. Tsaynöpam mana cäsuq runakuna ushakäyaptinpis payqa ushakarqantsu.#Jos. 6.22-25.

32Dios Yayaman confiakuqkunam maspis kayanraq. Peru tiempum kantsu Gedeónpaq,#Jue. 6.11—8.32. Baracpaq,#Jue. 4.6—5.31. Sansónpaq,#Jue. 13.2—16.31. Jeftépaq,#Jue. 11.1—12.7. Davidpaq,#1Sam. 16.1—1Rey. 2.11. Samuelpaq#1Sam. 1.1—25.1. y profëtakunapaq willakunäpaq. 33Dios Yayaman confiakurmi wakinqa nacionkunata venciyarqan, wakinqa runakunata alli juzgayarqan y wakinnam Dios Yaya prometinqanta chaskiyarqan. Wakintaqa leonkunapis manam mikuyarqantsu.#Dan. 6.1-28. 34Wakintaqa ninapis manam ruparqantsu.#Dan. 3.1-30. Wakinnam espädawan wañutsiyänanpaq kaykaptinpis qeshpiyarqan. Kallpannaqkunapis valorayänanpaqmi Dios Yaya yanaparqan. Tsaymi juk nacionpita shamuq soldädukunatapis Dios Yayaman confiakur venciyarqan. 35Tsaynöllam Dios Yayaman confiakuq warmikunapis rikäyarqan wañushqa sutaraykaq wawankuna kawayämunqanta.#1Rey. 17.17-24; 2Rey. 4.25-37.

Wakintanam ñakatsiypa wañutsiyarqan. Dios Yayata nëgatsiyänan rayku ñakatsiyaptinpis Dios Yaya kawatsimunanpaq kanqanta musyarmi nëgayarqantsu. 36Tsaynöllam wakinpis sufriyarqan runakuna ashayaptin, astayaptin#Jer. 20.2; 37.15. y carcelman qaykatsiyaptin.#1Rey. 22.26-27; 2Crón. 18.25-26; Jer. 20.2; 37.15; 38.6. 37Wakintam saqmar wañutsiyarqan.#2Crón. 24.21. Wakintam serruchuwan roquypa wañutsiyarqan. Wakintanam espädawan wañutsiyarqan.#Jer. 26.23. Wakinnam alläpa waktsa kar üsha qaratsallapita y cabra qaratsallapita llatapankuna shukushqa markan markan chikishqa puriyarqan. 38Runakuna chikiyaptinmi desiertukunapa y tsunya raqrakunapa purir machaykunaman tsinkakuyaq. Dios Yayaman mana confiakuqkunaqa manam ni mayqanpis paykunanö alli kayarqantsu.

39Confiakuyanqanpita Dios Yaya paykunata alli rikaptinmi kay patsachö ni mayqanpis Dios Yaya prometinqanta chaskiyarqantsu. 40Tsaypa rantinmi mas alli kaqta chaskiyänanta Dios Yaya munarqan. Tsaynöpam paykunapis y noqantsikpis prometinqan salvacionta iwal chaskishun.

Currently Selected:

Hebreos 11: qxn

Highlight

Copy

Compare