Hebreos 10

1 Moisés qellqanqan leykunaqa manam mushuq pactunötsu, sinöqa mushuq pactupa llantunnöllam. Tsaymi tsay leykuna ninqannö wata wata wätakunata altarchö waykayaptinpis runakunapa shonqunkunaqa Dios Yaya munanqannötsu karqan. 2Shonqunkuna Dios munanqannö kaptinqa jutsankunata dëjaskir manam wätakunata altarchö waykayanmannatsu. 3Wata wata wätakunata waykarpis jutsa rurayanqantam mas yarparäyan. 4Chïvukunapa y törukunapa yawarninqa manam ni pipa jutsantapis mayllantsu.

5Tsaymi kay patsaman Jesucristo shamur Dios Yayata nirqan:

<<Sacrificiukunawan y tsaki mikuy ofrendakunawan manam contentutsu kanki.

Manam tsaykunata apamunäta munankitsu, sinöqa llapan shonqüwan qamta cäsunaqtam munanki.

6Waykana sacrificiukunapis y purificätsina sacrificiukunapis manam munanqaykinötsu.

7Tsaymi nirqaq: <Dios Yaya, munanqaykita ruranäpaq listum kaykä.

Cäsunaqpaqmi rölluchö qellqashqa kaykan> >>.#Sal. 40.6-8.

8Tsaymi puntata nirqan tsaki mikuykunata, waykana sacrificiuta, purificätsina sacrificiuta y wakin sacrificiukunatapis Dios Yaya mana munanqanta. Tsay sacrificiukunata rurananpaq Moisés qellqanqan leykunachö nikaptinpis tsaynömi nirqan. 9Tsaypitanam nirqan Dios Yaya munanqanta rurananpaq shamunqanta. Tsaymi tsay sacrificiukunaqa välinnatsu. Tsaypa rantinmi 10Jesucristo Dios Yaya munanqanta rurar sacrificiupaq noqantsik rayku juk kutilla wañurqan. Tsaynöpam perdonashqana kar Dios Yayapa puntanchö jutsannaqna kaykantsik.

11Israel sacerdötikunaqa waran waranmi wätakunata altarchö waykayan.#Éxo. 29.38. Tsaynö waykayaptinpis manam tsaykunawantsu runakunata Dios Yaya perdonan. 12Peru Jesucristum sïqa jutsantsikpita perdonamänapaq juk kutilla wañurqan. Kananqa Dios Yayapa derëcha kaq lädunchömi jamaykan. 13Tsaychömi kanqa llapan contrankunata poderninman Dios Yaya churanqanyaq.#Sal. 110.1.

14Jesucristo juk kutilla wañuptinmi akranqan runakuna imayyaqpis salvashqa kayänanpaq Dios Yaya perdonarqan. 15Tsaypaqmi Espíritu Santupis nin:

16<<Tsay junaqkuna päsaskiptinmi paykunawan pactuta rurashaq.

Tsaynö rurarmi leynïkunata shonqunkunaman churashaq.

Yarpayninkunamanmi leynïkunata qellqashaq.

Noqa Dios Yayam nï.#Jer. 31.33.

17Paykuna ima jutsata rurayanqantapis manam yarpäshaqnatsu>>.#Jer. 31.34.

18Tsaymi jutsantsikpita perdonamänapaq ima sacrificiutapis Dios Yaya wanannatsu.

Creyikuynintsikta mana dëjanapaq ninqan

19Wawqikuna y panikuna, Jesucristo yawarninta jichanqanpitam ciëluchö Lugar Santïsimuman mana mantsakuypa yaykushun. 20Noqantsik rayku wañurmi mushuq nänita kichapämashkantsik Lugar Santïsimuta tsaparaq cortïnata päsar yaykunapaq.#10.20 Lugar Santïsimuta tsaparaq cortïnata päsar yaykunapaq nirqa Dios Yayapa puntanman chänapaq kanqantam nin. 21Dios Yayapa wajinchö Jesucristo mandakuq sacerdöti kaptinmi 22llapan shonquntsikwan payman creyikur puntanman yaykushun. Jutsantsikkunata perdonamashqam shonquntsikpis mayllashqana. Bautizakushqam cuerpuntsikpis chuya yakuwan mayllashqana.#Eze. 36.25.

23Dios Yaya llapan prometimanqantsikta imaypis cumplinqanta musyaykarqa creyikuynintsikta mana dëjar Jesucristuman imaypis confiakushun. 24Kuyanakunapaq y allikunata ruranapaq juknin jukninwanpis animatsinakushun. 25Wakin kaq wawqikuna y panikuna qorikayta qeläkuyaptinpis noqantsikqa ama qeläkushuntsu. Jesucristo kutimunanpaqna kanqanta musyaykarqa animatsinakunapaq imaypis qorikäshun.

26Pipis Jesucristuta chaskishqana kaykar jutsa rurayta mana dëjaptinqa Dios Yaya manam perdonanqanatsu. Jesucristo noqantsik rayku wañushqa kaptinpis manam salvanqatsu. 27Tsaypa rantinmi día del juiciuchö lunyaypa lunyaykaq nina paykunata shuyaraykan. Tsay ninam Dios Yayapa contrankunata llapanta ushakätsinqa.

28 Moisés qellqanqan leykunata mana cäsuqtaqa ishkaq o kimsaq runa shimpiptinmi mana llakipaypa wañutsiyaq.#Deut. 17.6; 19.15. 29Tsaynö kaykaptinqa ¿manatsuraq mas peor castigashqa kayanqa Jesucristuta chaskishqa kaykar willakuyninta mana cäsuqkuna? Paykunaqa kikin Dios Yayapa Tsurintam manakaqman churaykäyan. Mushuq pactuta rurar salvamänapaq jichanqan yawarnintapis#Éxo. 24.8; Heb. 13.20. mana väliqtanömi rikäyan. Llakipämaqnintsik Espíritu Santutapis alläpam rabyatsiyan.

30Musyantsikmi tsaynö kaqkunapaq Dios Yaya rabyar ninqanta:

<<Mana allikunata rurayanqanpitam kikï juzgashaq.

Jutsata rurayanqanpitam castigashaq>>.#Deut. 32.35.

Mastam nirqan:

<<Akranqan runakunatam Dios Yaya juzganqa>>.#Deut. 32.36.

31Imayyaqpis kawaq Dios Yaya juzgashuptikiqa alläpa mantsakaypaqmi kanqa.

32Ama qonqäyaytsu Jesucristuta chaskiyanqayki witsay alläpa ñakaykarpis firmi kayanqaykita. 33Wakikim llapan runapa rikänanchö ashashqa y maqashqa kayashkanki. Wakikinam maqashqa y ashashqa wawqikunata yanapar animatsiyashkanki. 34Tsaynöllam carcelchö kaykaq creyikuqkunatapis llakipar yanapayashkanki. Imaykaykikunata apayaptinpis mana llakikurmi dëjayashkanki. Tsaynö dëjayashkanki ciëluchö mana ushakaq herenciata chaskiyänaykipaq kanqanta musyarmi.

35Kananpis tsaynölla Dios Yayaman mana ajayaypa confiakuyay. Tsaynö kawakurmi alli premiuta chaskiyanki. 36Imaykata ñakarpis Dios Yaya munanqannö kawakurqa pay prometiyäshunqaykitam chaskiyanki. 37Dios Yayapa palabranmi nin:

<<Salvador shamunanpaq ichikllanam faltaykan.

38Munanqänö kawaq runaqa noqaman confiakamurmi kawanqa.

Peru creyikuyninta dëjaqkunatam sïqa rikaytapis munätsu>>.#Hab. 2.3-4.

39Noqantsikqa manam creyikuyninta dëjaqkunanö infiernuman jitarpushqa kanapaqtsu kantsik. Tsaypa rantinqa Jesucristuman creyikur salvashqa kanapaqmi.

Currently Selected:

Hebreos 10: qxn

Highlight

Copy

Compare