Hebreos 12

Mana ajayaypa Jesucristuman confiakunapaq ninqan

1Tsay unay runakunaqa yupaytapis mana puëdiypaqmi kunchawaraykämantsik. Tsaynö kaykaptinqa cörriq runa qepinta dëjaqnö tukuyläya jutsantsikta dëjashun. Llallinakuqkuna chäyänanpaq kaqman cörriyanqannö noqantsikpis Dios Yaya munanqannö wañunqantsikyaq kawashun. 2Salvamaqnintsik y tantiyatsimaqnintsik Jesucristo imanö kawanqanta tantiyakushun. Paymi runakunata salvar kushikunanpaq kanqanta musyar penqakuyta jitaskir cruzchö wañurqan. Tsaymi kananqa Dios Yayapa trönun derëcha kaq lädunchö jamaykan.#Fil. 2.6-11; Heb. 2.9.

3Dios Yayaman creyikuyanqaykita mana dëjayänaykipaq Jesucristo imanö ñakanqanta tantiyakuyay. Payqa jutsasapa runakuna contran shäriyaptinpis Dios Yaya munanqannömi imaypis kawarqan. 4Qamkunapa contraykikuna karpis manam ni mayqaykita wañutsiyäshunkiraqtsu. 5¿Qonqayashkankiku Dios Yaya wamrankunapaq palabranchö ninqanta? Tsaychömi nin:

<<Hïju, Dios Yaya corrigishuptiki ama jaqayaytsu.

Jaqayanqaykipa rantin chaskikuy.

6Kuyanqan kaqtam Dios Yaya corrigin.

Wamran kananpaq chaskinqan kaqtam yachakunanpaq castigan>>.#Job 5.17; Prov. 3.11-12.

7Pï runapis wamrantam corrigin. Tsaynöllam wamran kayaptiki Dios Yayapis corrigiyäshunki. Tsaymi Dios Yaya corrigiyäshuptiki chaskikuyänayki. 8Dios Yayapis wamran kaqtaqa llapantam corrigin. Mana corrigiyäshuptikiqa manam wamrankunatsu kayanki.

9Taytantsikpis mana cäsukuq kashqam corrigimashkantsik. Corrigimashqam jaqayanqantsikpa rantin cäsukushkantsik. Tsaynö kaykaptinqa Dios Yaya corrigimashqa masraq cäsukushun. Cäsukurqa mana ushakaq kawaytam tarishun.

10Taytantsikpis mandädunchö kanqantsikyaqllam munanqannö kawanapaq corrigimantsik. Peru Dios Yayam sïqa corrigimantsik pay jutsannaq kanqannö jutsannaq kanapaq. 11Corrigimanqantsik höra alläpa llakikurpis cäsukurqa Dios Yaya munanqannömi kawakushun.#Deut. 8.5; 1Cor. 11.31-32.

12Tsaynö kaykaptinqa makiki warkakashqanö kaptinpis y alaychö qonqurniki watakashqanö kaptinpis animakuyay.#Isa. 35.3-4. 13Nänipita mana yaqaypa aywaqnö imaypis allillata rurayay.#Prov. 4.26. Tsaynöpam rata ishkiqnö kayankitsu, sinöqa kutikashqa runanöna kayanki.

Dios Yayata cäsukunapaq ninqan

14Pïmaywanpis kuyanakur alli kawakuyay. Tsaynölla jutsata mana rurar Dios Yaya munanqannö kawakuyay. Jutsa ruraqkunaqa manam pipis Dios Yayapa puntanman chanqatsu. 15Shumaq tantiyayay. Mayqaykipis jutsaykikunata mana dëjarqa manam salvakuyankitsu. Ama jaqayashqa puriyaytsu. Jaqayashqa purirqa venënuyuq ayaq jachanö karmi wakin kaqkunatapis jaqayätsiyanki.#Deut. 29.18.

16Ama mayqaykipis fornicación jutsata rurayankitsu. Tsaynölla ama Esaúnöqa Dios Yayata mana cäsuq kayankitsu. Esaúqa mayor kay derëchunta juk plätu mikuyllapaqmi wawqinta rantikurqan.#Gén. 25.29-34. 17Musyayanqaykinömi tsay bendicionta taytanpita chaskiyta munar alläpa waqarpis chaskirqannatsu.#12.17 Kay textuchöqa Esaúta iwalatsin Diosta nëgaq runaman y derëchuntanam iwalatsin salvacionman.#Gén. 27.30-40.

18Qamkunaqa manam Sinaí jirkaman#12.18 Sinaí jirkapaq parlarmi Israel runakunawan Dios Yaya ruranqan unay kaq pactupaq nin. chaqnötsu kayanki. Tsay jirkachömi ninapis, paqaspis y alläpa wayrapis karqan. 19Cornëta waqamuqta y Dios Yaya mantsakaypaq parlamuqta wiyarmi alläpa mantsakar manana parlamunanpaq rugakuyarqan.#Éxo. 19.16-22; 20.18-21; Deut. 4.11-12; 5.22-27. 20Tsaynöllam alläpa mantsakäyarqan Dios Yaya niptin: <<Runatapis wätatapis jirkaman witsaq kaqtaqa saqmar [o flëchar] wañutsiyanki>>.#Éxo. 19.12-13.

21Alläpa mantsakaypaq kaptinmi Moiséspis nirqan: <<Alläpa mantsakaywanmi tsuktsukyaykä>>.#Deut. 9.19.

22Qamkunaqa Sión lömaman#12.22 Sión lömapaq parlarmi noqantsikwan Dios Yaya ruranqan mushuq pactupaq nin. y ciëluchö Jerusalénman chashqanömi kaykäyanki. Tsay markaqa imayyaqpis kawaq Dios Yayapa markanmi. Tsaychömi yupaytapis mana puëdiypaq maytsika angelkuna Dios Yayata kushishqa alabayan. 23Dios Yayaman llapan confiakuqkunawan qorikashqanömi kaykäyanki. Mayor wamra herenciata chaskiqnö kayaptikim shutikikunapis ciëluchö qellqashqana kaykan. Tsaynöllam pïmayta juzgaq Dios Yayapa puntanman y ciëluchö kaykaq llapan salvashqakunapa puntanman chashqanöna kaykäyanki.

24Tsaynöllam Jesucristupa puntanchö kaykaqnöna kaykäyanki. Paymi wañurqan Dios Yaya mushuq pactuta rurar salvamänapaq. Jesucristo yawarninta jichanqan manam Abel yawarninta jichanqannötsu.#Gén. 4.10. Abel yawarninta jichar wañunqanqa wañutsikuq runa castigashqa kananpaqmi karqan. Peru Jesucristo yawarninta jichar wañunqanmi sïqa perdonashqa kanapaq kaykan.

25Tsaynö kaykaptinqa Dios Yaya niyäshunqaykita ama yupaytupäyaytsu. Desiertuchö Moisés ninqanta mana cäsukuqkunata Dios Yaya castigaykarqa ciëlupita nimanqantsikta mana cäsukushqa peormi castigamäshun.

26Sinaí jirkachö Dios Yaya parlamuptin tsay jirkapis alläpam tsuktsukyarqan. Kananpis Dios Yaya palabranchömi nin: <<Yapaymi kay patsata tsuktsukyätsishaq. Manam kay patsallatatsu tsuktsukyätsishaq, sinöqa ciëlutapis tsuktsukyätsishaqmi>>.#Hag. 2.6.

27<<Yapaymi kay patsata tsuktsukyätsishaq>> nirqa llapan kamanqankunata tsuktsukyätsir ushakätsinanpaqmi musyatsimantsik. Tsaynö ruraptinmi mana ushakaqkunallana quëdayanqa.

28Dios Yayapa mandakuyninqa imaypis manam ushakanqatsu. Tsay mandakuytaqa chaskiykantsiknam. Tsaymi agradëcikur llapan shonquntsikwan payta alabashun. Paypita mantsakur munanqannö imaypis kawakushun. 29Mana cäsukuqkunataqa nina rupar ushanqannömi Diosnintsik ushakätsinqa.#Deut. 4.24; 9.3; Mat. 3.12; 2Tes. 1.7-8.

Currently Selected:

Hebreos 12: qxn

Highlight

Copy

Compare