Ezequiel 47

Templupita pashtamuq yaku imanö kanqan

1Tsaypitanam tsay runa templu punkuman kutitsimarqan. Tsaychömi rikarqä kikin punkupa marcun chakinpita yaku pashtaykämuqta.#Joel 3.18; Zac. 13.1; 14.8; Juan 7.38; Apoc. 22.1. Altarpa sur kaqläninpa päsarmi rupay yarqamunan kaqläpa yaku aywaqta rikarqä. 2Tsaypitam ruri kaq patiupita y jatun kaq patiupita norti kaqlä punkupa waqtayaq tumatsimar rupay yarqamunan kaqlä punkuyaq pushamarqan. Tsaychömi punkupita sur kaqläpa yaku yarqaykämuqta rikarqä.

3Tsaypitam cordelta aptarkur rupay yarqamunan kaqläpa aywar pitsqa pachak (500) metruta tsay runa mïdirqan. Tsay mïdinqan kaqläpa tsimpatsimaptinmi utsuputüyaqlla yaku karqan. 4Yapay pitsqa pachak (500) metruta mïdiskirnin tsimpatsimaptinmi qonqurnïyaqna karqan. Tsaypita yapay pitsqa pachak (500) metruyaq mïdiskir tsimpatsimaptinmi tseqlläyaqna yaku karqan. 5Yapay pitsqa pachak (500) metruta mïdiptinqa mananam chakillapa tsimpayta puëdirqänatsu. Yaku alläpa jeqashqana kaptinmi nädayparaq tsimparqä. 6Tsaychömi nimarqan: <<Llapan rikanqaykita shumaq tantiyay>>.

Tsaypitanam mayu kuchullanpa kutitsimarqan. 7Kutirnam mayupa ishkanlä kuchunkunachö atska jachakunata rikarqä. 8Tsaypitam nimarqan: <<Kay yakum rupay yarqamunan kaqlä Arabá pampapa päsar Kachi Lamarman chan. Tsayman charmi puchquq yakuta alli yakumanna tikratsinqa. 9Kay yaku maymanpis chanqan kaqchömi tukuyläya wätakuna kawayanqa. Puchquq yakuta mishkiqman tikratsiptinmi maytsika pescädukunapis kanqa. Kay yaku maymanpis chanqan kaqchöqa llapanmi kawayanqa.

10<<En-gadi partipita En-eglaim partiyaq kay mayu kuchunkunachömi pescädukuq runakunapis atarräyankunata majar tsakitsiyanqa. Mediterráneo Lamarchö kanqannömi tukuyläya maytsika pescädukuna kanqa. 11Peru pätsin kaq y qochan kaqmi sïqa tsaynö puchqulla kanqa.

12<<Kay mayupa ishkanlä kuchunkunachömi tukuyläya früta jachakuna wiñanqa. Raprankuna mana shushuptinmi imaypis mana päraypa wayunqa. Templupita yarqamuq yaku kuchunchö karmi wayuyninpis tiempullanchö poqunqa. Tsaymi wayuyninkuna mikunapaq kanqa y raprankunanam jampipaq kanqa>>.#Apoc. 22.2.

Israel nacionpa mujunninkuna imanö kanqan

13 Dios Yayam nin: <<Kananmi tantiyatsishayki chunka ishkay trïbu Israel runakuna posesionta chaskiyaptin may maypa mujunninkuna kananpaq kanqanta.#Núm. 34.1-12. Josépita miraqkunam ishkay trïbupaq kaqtanö posesionta chaskiyanqa.#47.13 Josépita miraqkunachömi Efraín trïbu Manasés trïbu kayarqan. 14Wakin kaq trïbukunam iwal posesionta chaskiyanqa. Unay castaykikunata kay nacionta entregashqa kaptïmi kay nación qamkunapaq kanqa.

15<<Norti kaqläpam Israel nacionpa mujunnin Mediterráneo jatun lamarpita qallaykur Hetlón markapa aywaq nänipa päsar Zedad partiyaq chanqa. 16Tsaypitam Hamat, Berota y Sibraim partikunapa chanqa. Sibraim partim kaykan Damascupita Hamatman aywaqchö. Tsaypitam Hazar-haticón partipa chanqa. Tsay partim tinkun Haurán partiwan. 17Tsaymi norti kaqläpa tinkuq mujun chanqa Mediterráneo Lamarpita Hazar-enán partiyaq. Tsaymi kanqa Damasco norti kaqlächö y Hamat sur kaqlächö.

18<<Rupay yarqamunan kaqläpanam Israel nacionpa mujunnin Haurán y Damasco partipa chanqa. Tsaypitam Jordán mayupa aywar rupay yarqamunan kaqlä lamar#47.18 Rupay yarqamunan kaqlä lamarqa Kachi Lamarmi. lädun Tamar markayaq chanqa. Jordán mayu kay tsimpanchömi Israel nación kanqa y wak tsimpanchönam Galaad marka kanqa.

19<<Sur kaqläpanam Israel nacionpa mujunnin kanqa Tamar markapita qallaykur Cadeschö kaykaq Meriba yakupa päsar Mediterráneo jatun lamaryaq. Tsaynöllam sur kaqläpapis mujunnin kanqa.

20<<Rupay jeqanan kaqläpam Mediterráneo Lamar kuchullanpa Israel nacionpa mujunnin kanqa. Tsay kuchun norti kaqläpa aywarmi Hamat partiyaq chanqa. Tsaynömi rupay jeqanan kaqläpa mujunnin kanqa.

Posesionta aypunakuyanqan

21<<Nacionnikikunata chunka ishkay Israel trïbupura aypunakuyanki. 22Cada trïbu chaskinqanchö runakuna posesionta chaskiyänanpaq sortiyaypa aypunakuyanki. Qamkunachö yuriq juklä runakunapa tsurinkuna kaptinpis tsaynö sortiyaypa aypuyanki. Markaykikunachö yuriq juklä runakunata Israel runatanöna rikäyanki. Tsaymi marka majikikunata chakran aypuyanqaykinölla paykunatapis aypuyanki. 23Maychöpis täkuyanqan kaq trïbuchömi juklä runakunapis posesionninkuna chaskiyanqa>>. Dios Yayam tsaynö nin.

Currently Selected:

Ezequiel 47: qxn

Highlight

Copy

Compare