Ezequiel 48

Norti kaqlächö Israel trïbukunapa posesionninkuna maychö kananpaq ninqan

1<<Kanan tantiyatsishayki Israel trïbukunapa posesionninkuna maypa kananpaq kanqanta. Dan trïbukuna chaskiyanqan posesionmi Israel nacionpa norti kaqlä kuchunchö kanqa. Paykunapa mujunninkunam Hetlón markapa aywaq nänipa päsar Hamat partiyaq chanqa. Tsaypitam chanqa Hazar-enányaq. Tsaymi kaykan Damascupa y Hamatpa sur kaq mujunnin tinkuqchö. Dan trïbukuna chaskiyanqan posesionpa largunmi Israel nacionpa anchun kanqannölla kanqa. Tsaymi rupay yarqamunan kaqlä mujunpita qallaykur hasta rupay jeqanan kaqlä mujunyaq kanqa.

2<<Dan trïbukunapa posesionninkunapita sur kaqlächömi Aser trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

3<<Aser trïbukunapa posesionninkunapita sur kaqlächömi Neftalí trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

4<<Neftalí trïbukunapa posesionninkunapita sur kaqlächömi Manasés trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

5<<Manasés trïbukunapa posesionninkunapita sur kaqlächömi Efraín trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

6<<Efraín trïbukunapa posesionninkunapita sur kaqlächömi Rubén trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

7<<Rubén trïbukunapa posesionninkunapita sur kaqlächömi Judá trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

Judá trïbupa posesionninpita sur kaqlächö juk partita rakiyänanpaq ninqan

Ezequiel 45.1-6

8<<Judá trïbukuna chaskiyanqan posesionpita sur kaqlächö juk partita rakiyanki. Anchun kanqa soqta chunka ishkay pullan kilömetru. Largunnam rupay yarqamunan kaqläpita rupay jeqanan kaqläyaq kanqa. Tsaymi lädunchö trïbukuna chaskiyanqan posesionpa largunnölla kanqa. Tsay partipa chawpinchömi templu kanqa.

9<<Tsaychö noqapaq rakiyanqayki partipa largun kanqa chunka ishkay kilömetru pullan y anchunna pitsqa kilömetru. 10Tsay partim sacerdötikunapaq kanqa. Norti kaqläpam largun kanqa chunka ishkay pullan kilömetru. Rupay jeqanan kaqläpam anchun kanqa pitsqa kilömetru. Tsaynöllam rupay yarqamunan kaqläpa anchun pitsqa kilömetru kanqa. Sur kaqläpanam largun kanqa chunka ishkay kilömetru pullan. Tsay partipa chawpinchömi templü kanqa.

11<<Sacerdötikunapaq rakiyanqayki partiqa kanqa servimaq Sadoc sacerdötipita miraq sacerdötikuna täkuyänanpaqmi. Israel runakuna y levitakuna mana cäsuyämaptinpis paykunam cäsukayämarqan. 12Noqapaq rakiyanqayki partichö sacerdötikunapaq rakiyanqayki partim mas sagrädu kanqa. Levitakunapa posesionnin lädunchömi kanqa.

13<<Sacerdötikunapa posesionnin lädunchömi levitakunapa posesionninkuna kanqa. Largunmi kanqa chunka ishkay pullan kilömetru y anchunnam pitsqa kilömetru. 14Tsay posesiontaqa manam rantikuyanqatsu, cambiakuyanqatsu ni pitapis entregayanqatsu. Tsay noqapaq kaq posesionqa sagrädum kaykan.

15<<Sobraq kaq partipa largunmi kanqa chunka ishkay kilömetru pullan y anchunnam pitsqa kilömetru. Tsay partiqa manam sagrädutsu kanqa, sinöqa wakin runakuna täkuyänanpaq y wätankunata mitsikuyänanpaqmi kanqa.

<<Tsay chawpichömi marka kanqa. 16Tsay markapa largun y anchunpis tsay tamäñullam kanqa. Cada lädupa largunmi kanqa ishkay waranqa ishkay pachak pitsqa chunka (2,250) metru. 17Tsay markapa lädunkunapanam tumat qewa kanqa wätaykikunata mitsikuyänaykipaq. Tsay qewa kanqanpam anchun y largunpis pachak ishkay chunka pitsqa (125) metru kanqa.

18<<Markapa ishkan lädunpa sobraq kaqnam rakiyanqayki sagrädu partipa cercankunachö kanqa. Rupay yarqamunan kaqläpa largunmi pitsqa kilömetru kanqa y rupay jeqanan kaqläpanam pitsqa kilömetru largun kanqa. Markachö täkuq runakuna mikuyänanpaqmi ishkanlächö murupakuyanqa. 19Markachö täkuq Israel runakunam mayqan trïbu karpis tsay chakrakunachö aruyanqa.

20<<Sacerdötikunapaq, levitakunapaq, markapaq y murupakuyänanpaq rakiyanqayki partiqa llapanta juntawarkuptinmi anchunpis largunpis ishkay chunka ishkay kilömetru pullan kanqa.

Mandakuq autoridäpaq rakiyanqan imanö kananpaq ninqan

Ezequiel 45.7-8

21<<Mandakuq autoridäpapis posesionninmi kanqa. Paypa posesionninpa chawpinchömi sagrädu parti y markapaq rakiyanqayki parti kanqa. Tsaymi mandakuq autoridäpa posesionninpa anchun chunka ishkay kilömetru pullan kanqa. Largunnam Israel nacionpa jukaq mujunnin kuchunpita hasta jukaq mujunnin kuchunyaq kanqa.

<<Tsay posesionpa chawpinchömi sagrädu parti kanqa. Tsaychömi templu kanqa. 22Tsay chawpi kaq partichömi Leví trïbukunapa posesionnin y markapaq rakiyanqayki parti kanqa. Norti kaqlächömi Judá trïbukunapa posesionnin kanqa. Sur kaqlächönam Benjamín trïbukunapa posesionninkuna kanqa.

Sur kaqlächö Israel trïbukunapa posesionninkuna maychö kananpaq ninqan

23<<Tsaypita sur kaqläpam wakin kaq trïbukunapa posesionninkuna kanqa. Benjamín trïbukuna chaskiyanqan posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

24<<Benjamín trïbukunapa posesionninkunapita sur kaqlächömi Simeón trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

25<<Simeón trïbukunapa posesionninkunapita sur kaqlächömi Isacar trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

26<<Isacar trïbukunapa posesionninkunapita sur kaqlächömi Zabulón trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla.

27<<Zabulón trïbukunapa posesionninkunapita sur kaqlächömi Gad trïbukunapa posesionninkuna kanqa. Tsay posesionninkunapa mujunninmi kanqa rupay yarqamunan kaqläpa rupay jeqanan kaqläpa nacionninpa mujunnin kanqannölla. 28Gad trïbukuna chaskiyanqan posesionninkunapa sur kaq mujunninmi Tamarpita qallaykur Meriba-cadeschö yaku kaykaqpa päsanqa. Tsaypita Egipto raqrayaq päsarmi jatun Mediterráneo Lamaryaq chanqa.

29<<Tsaynömi Israel runakunata trïbunpa trïbunpa posesionninkuna rakipuyanki>>. Dios Yayam tsaynö nin.

Markapa punkunkuna imanö kananpaq ninqan

30<<Kanan tantiyatsishayki markapa punkunkuna imanö kananpaq kanqanta. Norti kaqläpam markapa largun kanqa ishkay waranqa ishkay pachak pitsqa chunka (2,250) metru. 31Cada punkupa shutinmi kanqa Israel trïbukunapa shutin. Norti kaqläpam kanqa Rubén punku, Judá punku y Leví punku.

32<<Rupay yarqamunan kaqläpam markapa largun kanqa ishkay waranqa ishkay pachak pitsqa chunka (2,250) metru. Tsay kaqlächömi kanqa José punku, Benjamín punku y Dan punku.

33<<Sur kaqläpam markapa largun kanqa ishkay waranqa ishkay pachak pitsqa chunka (2,250) metru. Tsay kaqlächömi kanqa Simeón punku, Isacar punku y Zabulón punku.

34<<Rupay jeqanan kaqläpam markapa largun kanqa ishkay waranqa ishkay pachak pitsqa chunka (2,250) metru. Tsay kaqlächömi kanqa Gad punku, Aser punku y Neftalí punku. 35Markata tumat tsaparaq perqanmi isqun waranqa (9,000) metru kanqa. Tsay markapam imaypis shutin kanqa Dios Yayam Tsaychö Täkun#48.35 Hebreo idiömachömi shutin Yahweh Shammah.>>.

Currently Selected:

Ezequiel 48: qxn

Highlight

Copy

Compare