Ezequiel 43

Templuman Dios Yaya kutinqan

1Tsaypitanam pushamaq runa kutitsimarqan rupay yarqamunan kaqlä punkuman. 2Tsaychömi rikarqä Israel runakunata kuyaq Dios Yayapa chipakyaynin rupay yarqamunan kaqläpita shamuykaqta. Mayu jeqarnin qayaraqnöraqmi shamunqan wiyakämurqan. Chipakyayninwanmi kay patsapis alläpa atsikyarqan.#Eze. 10.3-4, 18-19; 11.22-23. 3Tsay rikanqämi karqan Jerusalénta ushakätsinanpaq Dios Yaya aywanqanta rikanqänö. Tsaynöllam Quebar mayu kuchunchö ñawpata rikanqänö karqan. Tsaymi patsaman sas pelatakuykurqä.

4Tsaypitam rupay yarqamunan kaqlä punkupa Dios Yayapa chipakyaynin qoshnipis templuman yaykurqan. 5Tsaynö rikaykaptïmi Dios Yayapa Espïritun pallarkamar ruri patiuman yaykatsimarqan. Tsaychömi rikarqä tsay qoshni templuchö junta kaykaqta.#1Rey. 8.10-11.

Templuchö imanö kananpaq

6Pushamaq runapa puntanchö kaykaptïmi templu rurinpita 7nimaqta wiyarqä: <<Runapa tsurin, kay wajichömi jamakunä trönu. Chakï ichiräkunan kaptinmi imayyaqpis Israel runakunawan kay templuchö kashaq.#Éxo. 25.8. Paykuna ni mandakuqnin reykunapis manam ïdulukunata yapay adorayanqanatsu. Mandakuqnin reykuna wañuyaptinpis reträtunta ruraskir manam adorayanqanatsu. Tsaynöpam santu shutïta manakaqman churayanqanatsu.

8<<Punta kaq templüpita reykunapa palaciunman juk perqallam rakirqan. Tsaynö amänulla kaptinmi palaciunkunachö ïdulukunata adorar santu shutïta manakaqman churayarqan. Tsaynöpam alläpa rabyarnin paykunata ushakätsishkä.

9<<Kananqa ïdulukunata amana adorayätsunnatsu. Unay reykuna pamparäyanqanman aywar tsay reykunatapis amana adorayätsunnatsu. Tsaykunata dëjayaptinqa paykunawanmi imayyaqpis kaykäshaq.

10<<Runapa tsurin, rikanqayki templu imanö kanqanta y ima tamäñu kanqantapis Israel runakunata willay. Tsayta musyarqa talvezchi jutsa rurayanqanpita penqakuyanman. 11Penqakuyaptinqa templu y punkunkuna imanö kanqanta rikanqaykita llapanta tantiyatsiy. Tsaynölla willanki templuchö imanö serviyämänanpaq yachatsinqä leykunatapis. Tsay leykuna ninqannölla llapanta rurayänanpaq y cumpliyänanpaq qellqay. 12Löma jananchö templu kaykanqan pampakuna llapanmi sagrädu kanqa. Tsayta musyarmi templuchö imanö serviyämänanpaq llapan leynïkunata cumpliyanqa>>.

Templuchö altar imanö kananpaq

13Kaychömi qellqashqa kaykan altarpa#Éxo. 27.1-2; 2Crón. 4.1. tamäñun. Altarpa kuchunpam tumat pullan metru jundu zanja karqan. Anchunnam pullan metru karqan. Zanjapa kuchunnam tumaypa juk cuarta mas karqan.

14Altar churaränanmi juk metru altu karqan. Anchunnam pullan metru karqan. Altarpa chawpinnam ishkay metru altu karqan. Tsaychömi pullan metru anchu juk patak karqan. 15Altarpa janannam ishkay metru altu karqan. Chuskun esquïnankunachömi waqrankuna karqan.

16Altar jananmi chuskun lädunpa tsay tamäñulla karqan. Largun y anchun soqta metru kaptinmi cuadrädu karqan. 17Altarpa jananpanam tumat canalëtanpis qanchis metru cada läduchö karqan. Tsay canalëtapa anchunmi pullan metru karqan y jundunnam cuarta maslla karqan. Altarman lätana grädaskunam rupay yarqamunan kaqläpa karqan.

18Tsaypitam pushamaq runa nimarqan: <<Runapa tsurin, Dios Yayam nin: <Sacrificiuta waykayänaykipaq y yawarta tsaqtsuyänaykipaq altarta rurar ushaskiyaptin purificäyanki. Kananmi imanö purificäyänaykipaq tantiyatsishayki.#Éxo. 29.35-37. 19Sadocpita miraq Leví casta sacerdötikuna purificätsina sacrificiuta waykayänanpaq juk mallwa töruta alistapanki. Tsay sacerdötikunallam altarnïchö serviyäman. Noqa Dios Yayam nï.

20<< <Tsay mallwa töruta pishtarmi yawarninwan tsaqtsunki altarpa chuskun waqrankunata, waqran uralänin patak chuskun esquïnankunata y altarpa jananpa tumat canalëtakunata. Tsaynö tsay altarta purificanki. 21Tsaypita purificätsina sacrificiupaq pishtayanqan mallwa törupa aytsanta templupita jipiskir waykayänanpaq kaq partichö waykanki.

22<< <Waränin junaqnam sänu chïvuta purificätsina sacrificiupaq waykayanqa. Tsaypa yawarninwanpis mallwa törupa yawarninwan ruranqaykinölla altarta purificanki. 23Tsaynö purificaskir mallwa sänu töruta y sänu carnëruta 24puntäman apamunki.#43.24 Puntäman apamunki ninqanqa altarnïman apamunki ninanmi. Tsaykunata pishtaskirmi sacerdötikuna kachitsarkur noqa Dios Yayapaq sacrificiuta waykayanqa.

25<< <Qanchis junaqyaqmi purificätsina sacrificiupaq juk chïvuta, juk mallwa töruta y sänu carnëruta waran waran waykayanqa. 26Tsaynö sacrificiuta waykarmi sacerdötikuna waran waran qanchis junaqyaq altarta purificäyanqa.

27<< <Qanchis junaqyaq tsaynö ruraskirmi pusaq junaqpitaqa waykana sacrificiupaq y alli päsakuy sacrificiupaq apayämunqanta sacerdötikuna waykar qallaykuyanqa. Tsaynö rurayaptinmi kushishqa chaskishaq>. Dios Yayam tsaynö nin>>.

Currently Selected:

Ezequiel 43: qxn

Highlight

Copy

Compare