Ezequiel 42

Sacerdötikunapa cuartunkuna

1Tsaypitanam tsay runa pushamar norti kaqlä jatun patiuchö sacerdötikunapaq cuartunkuna kaqman chätsimarqan. Tsay cuartukunaqa templupa qepan patiu kaqmanpa y tsaychö jatun waji kaqmanpam rikakarqan. 2Tsay cuartukunapa largunta mïdiptinmi pitsqa chunka (50) metru karqan y anchunnam ishkay chunka pitsqa (25) metru.

3Tsay cuartukunapa waqtanchömi templupa qepanchö chunka metru anchu patiu karqan. Frentinchönam rumiwan empedrashqa jatun patiu karqan.

Tsay cuartukunam kimsa grädaman qatashqa karqan. 4Punkunkunanam norti kaqläpa rikakarqan. Tsay lädupam juk pasadïsu päsarqan pitsqa metru anchu y pitsqa chunka (50) metru largu.

5Ultimu kaq grädachö cuartukunam mas taksha karqan. Peru chawpi kaq grädachö cuartukunam sïqa mas jatusaq karqan. Patsachö kaq cuartukunanam mas jatusaq karqan. 6Kimsa pïsu cuartukuna kaykarpis manam patiuchö kaq cuartukunanötsu paradoryuq karqan. Tsaymi cada pïsu cuartukuna urapita janaqyaq mas taksha karqan.

7-8Tsay cuartukunapa largunmi ishkay chunka pitsqa (25) metru karqan. Punku lädunchö perqanam ishkay chunka pitsqa (25) metru karqan. Frentichö kaq pasadïsum pitsqa chunka (50) metru karqan. 9Jatun patiupita cuartukunaman yaykuyänanpaq punkunam rupay yarqamunan kaqlächö karqan.

10Tsaynöllam sur kaqläpapis cuartukuna karqan. Tsay cuartukunam templu qepan waji frentinchö y templu qepan patiu frentinchö karqan. Tsay wajipa y patiunpa murällan waqtanchömi tsay cuartukuna karqan.

11Norti kaqlä cuartukunapa frentinchö pasadïsu kanqannöllam sur kaqlä cuartukunapa frentinchöpis pasadïsu karqan. Tsaynöllam sur kaqlä cuartukunapa largun, anchun, yarqunan y punkunkunapis norti kaqlä cuartukunanölla karqan.

12Sur kaqlä cuartukunaman yaykuyänanpaqmi pasadïsu qallaykunanpita punku karqan. Tsay punkum rupay yarqamunan kaqläpa rikakarqan.

13Pushamaq runam nimarqan: <<Norti kaqlächö y sur kaqlächö cuartukunam sagrädu kayan. Tsay cuartukunachömi Dios Yayapa puntanchö serviqnin sacerdötikuna#42.13 Dios Yayapa puntanchö serviqnin sacerdötikuna ninanqa Dios Yayapa altarninchö serviq sacerdötikuna ninanmi. mas sagrädu kaq ofrendakunata mikuyanqa. Tsay cuartukuna sagrädu kaptinmi tsaki mikuy ofrendakunata, purificätsina sacrificiukunata y consagratsina sacrificiukunatapis tsayman churayanqa.

14<<Templuchö kanqanpita jatun patiuman manaraq yarqurmi llatapankunata sacerdötikuna cambiakuyanqa. Tsaynö cambiakuyanqa templuchö shukukuyanqan llatapa sagrädu kaptinmi. Juk llatapata cambiakuskirraqmi runakunawan tinkuyänanpaq yarqayämunqa>>.

15Templuta y tsaychö patiukunata mïdir ushaskirnam tsay runa rupay yarqamunan kaqlä punkupa yarqatsimarqan. Tsaypitam murällatana tumat mïdirqan. 16Aptaranqan värawan rupay yarqamunan kaqläpa mïdiptinmi ishkay pachak pitsqa chunka (250) metru karqan. 17Norti kaqläpa mïdiptinmi ishkay pachak pitsqa chunka (250) metru karqan. 18Sur kaqläpa mïdiptinmi ishkay pachak pitsqa chunka (250) metru karqan. 19Tsaypita rupay jeqanan kaqläpa mïdiptinmi ishkay pachak pitsqa chunka (250) metru karqan. 20Tsaymi murällapa largun y anchunpis ishkay pachak pitsqa chunka (250) metru karqan. Tsay murällam rakirqan sagrädu kaqpita mana sagrädu kaqta.

Currently Selected:

Ezequiel 42: qxn

Highlight

Copy

Compare