Ezequiel 40

Ezequielta revelacionchö Israelman chätsinqan

1Babiloniaman prësu apayämanqan ishkay chunka pitsqa (25) wataman aywaykaptinnam punta kaq killa chunka junaqchö Dios Yaya poderösu kayninwan illaqpita Israelman apamarqan. Jerusalénta Babilonia runakuna juchutsiyanqanpita chunka chusku watanam päsashqa karqan.

2Israel nacionman revelacionchö apamarmi altu jirkaman Dios Yaya chätsimarqan. Tsaypita sur kaqläpa rikachakurmi markanöraq maytsika wajikunata rikarqä.#Apoc. 21.10. 3Tsayman chaykatsimaptinmi broncipita rurashqatanö runata rikarqä. Lïnupita rurashqa cordelnin y mïdikuna väran aptashqam#Apoc. 11.1; 21.15. punku lädunchö ichiraykarqan. 4Tsay runam nimarqan: <<Runapa tsurin, ninqäkunata shumaq tantiyanaykipaq alcäbu kay. Llapanta rikätsinaqpaqmi kayman Dios Yaya apamushushkanki. Llapan rikanqaykita Israel runakunata willanki>>.

Rupay yarqamunan kaqlächö patiu punku

5Tsay templu#1Rey. 6; 2Crón. 3. patiuchömi tumat murällata rikarqä. Tsay runa mïdinanpaq aptaranqan väram kimsa metru karqan. Tsaywan murällapa anchunta mïdiptinmi kimsa metru karqan. Tsaynöllam altunta mïdiptinpis kimsa metru karqan.

6Tsaypitanam aywarqan rupay yarqamunan kaqlächö kaykaq murälla punkuman. Punkuman yaykuna grädapa lätarkur perqapa anchunta mïdiptinmi kimsa metru karqan. 7-10Punkupa yaykuskirmi cada läduchö kimsa cuartukunata rikarqä. Tsay cuartukunam llapanpis karqan kimsa metru anchu y kimsa metru largu. Cuartukunata rakiq perqapa anchunmi ishkay metru pullan karqan. Tsay soqta cuartukunapita päsarkunachömi jatun cuartu karqan. Tsay cuartupa anchunmi chusku metru karqan. Tsay cuartupita templuman yaykunachömi juk metru anchu perqa karqan. Taksha cuartukunapita jatun cuartuman rakiq perqapa anchunmi kimsa metru karqan.

11Punkupa anchunmi soqta metru pullan karqan. Punku yaykuna perqata mïdiptinnam pitsqa metru anchun karqan. 12Cada taksha cuartu yaykunachö perqam pullan metru altu karqan. Cuartukunapa anchun y largunpis kimsa metrum karqan. 13Jukaq cuartupa ruri kuchunpita frentin kaq cuartupa ruri kuchunyaq mïdiptinmi chunka ishkay metru pullan karqan. 14Jatun cuartupa y wakin cuartukunapa anchunta tumat mïdiptinmi soqta chunka metru karqan. 15Yaykuna punkupita ruri kaq punkuyaq pasadïsuta mïdiptinmi ishkay chunka pitsqa metru largun karqan. 16Taksha cuartukunapis llapanmi ventänayuq karqan. Ruripanam rejïllankuna karqan. Tsaynöllam jatun cuartupapis ventänankuna karqan. Rakiq perqankunachönam palmërakuna dibujararqan.

Jatun kaq patiu

17Tsaypitanam tsay runa pushamarqan jatun kaq patiuman. Tsaychömi patiu kaqläpa rikarqä kimsa chunka (30) cuartukunata. Tsay patiuqa rumiwan entërunpa empedrashqam karqan. 18Altar kanqan patiupita mas bäjuchömi karqan. Anchunmi ishkay chunka pitsqa (25) metru karqan.

19Yaykuna punkupa frentinchömi juk punkupis karqan. Tsay punkuyaq mïdiptinmi pitsqa chunka (50) metru karqan. Tsaynömi karqan rupay yarqamunan kaqlä punkuchö. Tsaypitanam rikarqä norti kaqlä punku imanö kanqanta.

Norti kaqlächö patiu punku

20Norti kaqläpapis patiuman yaykuna punkum karqan. Tsay punkutapis largunta y anchuntam mïdirqan. 21Pasadïsupa cada lädunkunachömi kimsa cuartukuna karqan. Rupay yarqamunan kaqläpa kaykaq punkuchönöllam cuartukunata rakiq perqa y jatun kaq cuartupis karqan. Mïdiptinmi largun karqan ishkay chunka pitsqa (25) metru y anchunnam chunka ishkay metru pullan. 22Jatun cuartu, ventänakuna, palmëra dibujashqakunapis rupay yarqamunan kaqlä punkuchö kanqannöllam karqan. Tsayman yaykuyänanpaqpis qanchis grädakunam karqan. Tsaychöpis patiu kanqan kaqläpam jatun cuartu karqan. 23Rupay yarqamunan kaqlä punkupa frentinchö kaykanqannöllam norti kaqlä punku frentinchöpis ruri patiuman yaykunapaq juk punku karqan. Tsay punkuyaq mïdiptinmi pitsqa chunka (50) metru karqan.

Sur kaqlächö patiu punku

24Tsaypitanam sur kaqlächö punkuman pushamarqan. Llapanta mïdiptinmi wakin kaq punkukunanölla karqan. 25Cuartunkunapa ventänankunapis wakin kaqnöllam karqan. Largunta mïdiptinmi pitsqa chunka (50) metru karqan. Anchunta mïdiptinnam chunka ishkay metru pullan karqan. 26Lätananpaqpis qanchis grädakunam karqan. Jatun cuartupis patiu kaqlämanpam karqan. Rakiq perqakunachöpis palmërakunam ishkanlächö dibujashqa karqan. 27Sur kaqlächö punku yaykunapa frentinchöpis ruri kaq patiuman yaykuyänanpaq punkum karqan. Juk punkupita jukaq punkuyaq mïdiptinmi pitsqa chunka (50) metru karqan.

Ruri kaq patiuman yaykuna punkukuna

28Tsaypitam ruri kaq patiuman yaykuna juk punkuman pushamarqan. Tsay punkum sur kaqlächö karqan. Tsay punkuta mïdiptinmi wakin kaq punkukuna tamäñulla karqan. 29Taksha cuartunkuna, rakiq perqakuna y jatun cuartu coredorpis wakin kaqpa tamäñunnöllam karqan. Ventänakunapis coredor kaqläpam karqan. Mïdiptinmi ishkay chunka pitsqa (25) metru largun karqan y anchunnam chunka ishkay metru pullan. 30Lädunkunachö cuartukunata mïdiptinmi largun karqan chunka ishkay metru pullan y anchunnam ishkay metru pullan. 31Cuartukunata rakiq perqakunachömi palmërakuna dibujashqa karqan. Lätayänan grädakunapis pusaqmi karqan. Punkunam ura kaq patiuman rikakarqan.

32Tsaypitam rupay yarqamunan kaqlä ruri kaq patiu punkuman pushamarqan. Tsaychö mïdiptinmi wakin kaq punkukuna tamäñulla karqan. 33Taksha cuartunkuna, rakiq perqakuna y jatun cuartupis tsay tamäñullam karqan. Patiu kaqläpam ventänankunapis karqan. Mïdiptinmi largun karqan ishkay chunka pitsqa (25) metru. Anchunnam chunka ishkay metru pullan karqan. 34Rakiq perqakunachö palmërakunam dibujashqa karqan. Lätayänan grädakunapis pusaqmi karqan. Punku yaykunam ura kaq patiuman rikakarqan.

35Tsaypitanam norti kaqlä punkuman pushamarqan. Tsay punkuta mïdiptinmi wakin kaq tamäñulla karqan. 36Taksha cuartukuna, rakiq perqakuna, jatun cuartu y llapan ventänakunapis tsay tamäñullam karqan. Mïdiptinmi ishkay chunka pitsqa (25) metru largun karqan. Anchunnam chunka ishkay metru pullan karqan. 37Cuartukunata rakiq perqakunachömi palmërakuna dibujashqa karqan. Lätayänan grädakunapis pusaqmi karqan. Punku yaykunaqa ura kaq patiumanmi rikakarqan.

Wätakunata pishtayänanpaq kaq cuartu

38Tsay punku yaykunachömi juk cuartu karqan. Tsaychömi sacrificiupaq apayämunqan wätakunata pishtaskir mayllayaq. 39Tsay cuartuchömi pishtapakuyänanpaq jukaq lädunchö ishkay y jukaq läduchö ishkay mësakunapis karqan. Tsaychömi pishtayaq waykana sacrificiupaq, purificätsina sacrificiupaq y consagratsina sacrificiupaqpis. 40Tsay cuartupa waqtanchömi norti kaqlä punkuman lätana gräda lädunchö ishkay mësakuna karqan. Tsaynöllam jukaq läduchöpis ishkay mësakuna karqan. 41Tsaymi ruri cuartuchö chusku mësakuna y waqta punku lädunchö chusku mësakuna karqan. Llapan mësakunam pusaq karqan. Tsay mësakuna jananchömi sacrificiupaq wätakunata pishtayaq. 42Pishtapakuyänan manëjukunata churakuyänanpaqmi rumipita chusku mësakuna karqan. Tsay mësakunapa largunpis y anchunpis qanchis chunka pitsqa (75) centïmetrum karqan. Altunnam pullan metru karqan. 43Cuartupa ruri perqankunachönam ganchunkuna cuarta maslla tumat karqan. Mësakunachönam pishtayanqan wätakunapa aytsan churararqan.

Sacerdötikunapaq cuartukuna

44Ruri patiuchömi ishkay cuartukuna karqan. Juk cuartum norti kaqlä punku lädunchö karqan. Tsay cuartupa punkunmi sur kaqläpa karqan. Jukaq cuartunam sur kaqlä punku lädunchö karqan. Tsay cuartupa punkunnam norti kaqläpa karqan. 45Pushamaq runam nimarqan: <<Sur kaqläpa punkuyuq cuartum templuta cuidaq sacerdötikunapaq. 46Norti kaqläman punkuyuq cuartunam altarchö aruq sacerdötikunapaq kaykan. Tsay sacerdötikunam Sadocpita miraqkuna kayan. Leví trïbu majinkunapitam paykunalla Dios Yayapa puntanchö serviyänanpaq kayan>>.

Ruri kaq patiu y templuman yaykuna kaq cuartu imanö kanqan

47Tsaypitanam tsay runa ruri kaq patiuta mïdirqan. Mïdiptinmi largun y anchunpis pitsqa chunka (50) metru karqan. Tsay cuartum cuadrädu karqan. Altarnam templu puntanchö karqan. 48Tsaypitanam templuman yaykuna kaq cuartuman pushamarqan. Tsaychö ishkan lädu perqata mïdiptinmi ishkay metru pullan anchun karqan. Punkupa anchunta mïdiptinnam qanchis metru karqan. Punkupa cada lädunchö perqakunapa largunta mïdiptinmi juk metru pullan karqan. 49Tsay cuartupa anchunnam chunka metru karqan. Yaykuna punkupita frentinchö kaq punkuyaq mïdiptinmi soqta metru karqan. Tsayman lätayänanpaqmi chunka grädaskuna karqan. Templuman yaykunachömi ishkay paradorkuna ishkanlächö ichiräyarqan.

Currently Selected:

Ezequiel 40: qxn

Highlight

Copy

Compare