Eclesiastés 5

Dios Yayata prometinqantsikta cumplinapaq yätsinqan

1 1 (4.17) Dios Yayapa wajinman aywar alli yarpachakunki tsaychö yachakunqaykita cäsunaykipaq. Mana tantiyakuq runakunanö ama kankitsu. Paykunaqa sacrificiuta aparpis Dios Yayata manam cäsuyantsu. Mana tantiyakurmi jutsata rurayan.

2 2 (1) Llutallaqa Dios Yayata ni imatapis ama äninkitsu. Ni yarpayllaykichöpis mana cumplinaykipaq kaqtaqa ama äninkitsu. Paymi ciëluchö kaykan y qammi kay patsallachö kaykanki. Tsaynö kaykaptinqa mejor upällakunki.

3 3 (2) Alläpa yarpachakuqkunam mana allita sueñuyan.

Tsaynöllam alläpa parlaqkunapis manakaqkunata parlayan.#Prov. 10.19.

4 4 (3) Mana tantiyakuq runam llutalla änir Dios Yayata rabyatsin. Tsaynö kaptinqa Dios Yayata ima äninqaykitapis mana qonqar cumplinki.#Deut. 23.21-23; Sal. 66.13-14. 5 5 (4) Mana cumplinaykipaq kaptinqa ama ni imatapis äninkitsu.

6 6 (5) Cuidädutaq Dios Yayata imatapis llutalla prometiskir sacerdötipa puntanchö ninkiman: <<Mana shumaq tantiyakurmi änishkä. Manam cumpliyta puëdïtsu>>.

Tsaynö nir Dios Yayata rabyatsiptikim castigashunki.

7 7 (6) Runaqa munanqanta chaskinanpaq yarparmi alläpa parlar llutalla imatapis prometikun. Qamqa Dios Yayapita mantsakur ama tsaynö kankitsu.

Mana alli autoridäkuna kayanqan

8 8 (7) Maytsaychöpis waktsakunata alläpa sufritsiyaqta rikar o mana alli autoridäkunata rikar ama mantsakäyaytsu. Autoridäkunam tsaynö llutanta rurayan mas poderyuq kaq autoridäkuna favornin shäriyaptin. Y tsay poderyuq autoridäkunapapis mas mandakuq autoridäkunam favornin shäriyan. 9 9 (8) Tsaynö autoridäkuna mana allikunata ruraykäyaptinqa ¿nacionnintsik allitsakanqatsuraq? Tsaynölla ¿chakra runakunata rey yanapaykantsuraq?

Arur tarinqantsik ushakaqlla kanqan

10 10 (9) Qellaypaq ayrajaqkunaqa tarirpis manam contentakuyantsu. Rïcukunam mas rïcuyarpis contentakuyantsu. Tsaynö kayanqanpis manakaqllapaqmi.

11 11 (10) Imaykantsik mas kaptinmi imaykachöpis mas gastantsik. Wananqantsikpita masta katsirpis manam ni ima provëchuta jipintsiktsu, sinöqa rikayllam rikantsik.

12 12 (11) Aruq runam wallkata o atskata mikurpis kushishqa puñun. Peru rïcu runam sïqa imaykanpaqpis yarpachakur puñuytapis puëdintsu.

13 13 (12) Kay patsachömi rikashkä rïcu runa imaykata qorinqanpis afanninllapaq kanqanta. Tsaymi alläpa llakikuypaq. 14 14 (13) Tsay runaqa mana alli negociuman mëtikurmi llapan imaykankunata ushaskin. Tsaymi tsurinta dëjapunanpaq imanpis kantsu.

15 15 (14) Kay patsaman jinallantsik shamunqantsiknöllam jinallantsik aywakushunpis. Aywakur manam imantsiktapis apashuntsu.#Job 1.21; Sal. 49.17; 1Tim. 6.7. 16 16 (15) Tsaynö kaykaptinqa ¿imapaqtan välin tsayläya sufrir arunqantsikpis? Tsaymi llakikuypaq. 17 17 (16) Tsaynöllam kawanqantsikyaqqa llakikurnin alläpa yarpachakur, nanatsikur y resentïdu kawantsik.

18 18 (17) Tsaymi noqapa tantiyaynïpita mikushun, upyashun y kay vïdachö sufrir tarinqantsikkunata kushishqa gastashun. Tsaynö kawanqantsikmi päguntsik kaykan. 19 19 (18) Tsaynö kaptinqa Dios Yaya alistapämanqantsikta mikur upyar kushishqa kawashun. Tsaynö kushishqa kawanqantsikmi Dios Yayapa bendicionnin. 20 20 (19) Kushishqa kawanapaq Dios Yaya yanapamashqam yarpantsiktsu imayyaqlla kawanapaq kanqantapis.

Currently Selected:

Eclesiastés 5: qxn

Highlight

Copy

Compare