Eclesiastés 6

1Kay patsachö mastapis mana allikunata maytsaychömi rikashkä. 2Imaykayuq kananpaq y respitashqa kananpaq pitapis Dios Yaya yanapanqantam rikashkä. Tsaynö yanapaptinmi ima munanqantapis tarin. Tsaynö tarirpis manam kikin probichantsu, sinöqa juklä runakunam imaykankunata probichayan.#Sal. 39.6. Tsaymi alläpa llakikuypaq.

3Talvez cäsu kanman juk runa pachak (100) tsuriyuq karpis y atska wata kawashqa karpis llakishqalla kawanqan y wañuptin shumaq mana pampayanqan. Tsay runapaqqa mas allim kanman karqan manaraq yurir shullunö wañuptin. 4Shulluqa mas allim kaykan manakaqllapaq kashqa karpis, mana musyakaylla pampashqa karpis, shutinnaqlla kashqa karpis, 5atsikyay patsata mana rikashqa karpis y imata mana musyashqa karpis. 6Tsay runa ishkay waranqa (2,000) wata kawashqa karpis kushishqa mana kawakurqa shullu wamrapitapis mas peormi kaykan. Ishkanpis wañukuqllam kayan.

7Runaqa pachallanpaqmi waran waran arun. Peru tsaynö kaptinpis wanayninqa manam ni imaypis ushakantsu. 8Tsaynöllam yachayyuq y mana yachayyuq karpis, waktsa y rïcu karpis imallatapis wanantsik. 9Tsaynö kaykaptinqa imantsikpis kanqallanwan contentakushun. Tsaymi mas alli kaykan <<kayta wakta katsïman>> nir mana contentu kanqantsik. Mana contentakur kawarqa wayrata achkuyta munaqnöllam kaykantsik.

10Llapan päsanqantam unaypitana Dios Yaya permïtishqa karqan. Imanö kanapaqpis Dios Yayam unaypitana destinarqan. Noqantsikpita mas poderösu kaykaptinqa yarpanqannö permïtinqanpita Dios Yayapa contran ama parlashuntsu. 11Alläpa parlarmi mana conviëniqkunata parlantsik. Tsaynö parlarmi ni imata jipintsiktsu.

12Kay patsachö kawanqantsik llantunö päsaqlla kaptin manam ni pipis musyantsu noqantsikpaq ima mas alli kanqanta. Tsaynöllam ni pipis musyantsu wañukuptin kay patsachö ima päsananpaq kanqantapis.#Job 8.9; 14.2; Sal. 39.5-6; 102.11; 109.23.

Currently Selected:

Eclesiastés 6: qxn

Highlight

Copy

Compare