Daniel 8

Carnërutawan chïvuta revelacionchö Daniel rikanqan

1Belsasar kimsa wata rey kaykaptinmi noqa Daniel yapay revelacionchö rikarqä. 2Tsay revelacionchömi Elam provinciachö kaykaq Susa markachö y Ulai mayu kuchunchö kaykarqä. 3Rikachakuykarmi ishkay largu waqrayuq carnëru mayu kuchunchö kaykaqta rikarqä. Jukaq waqran qepataraq jeqamushqa karpis mas jatunmi karqan. 4Tsaychömi rupay jeqanan kaqläpa, norti kaqläpa y sur kaqläpa tsay carnëru atacaykaqta rikarqä. Manam ni ima wätapis pärapuyta puëdirqantsu. Tsaynöllam poderninpita ni pipis salvakurqantsu. Tsay carnërum munanqanta rurar llapanpitapis mas poderyuq tikrarqan.

5Tsaykunapaq yarpachakuykaptïmi rupay jeqanan kaqläpita juk chïvu urkunchö jatun waqrayuq yuriskamurqan. Tsay chïvum maytsaypapis patsata mana jaruyllapa aywarqan. 6Mayu kuchunchö rikanqä ishkay waqrayuq carnëruman chaykurmi llapan kallpanwan rabyashqa waqrarqan. 7Rikaraykaptï waqraskiptinmi carnërupa ishkan waqran pakiskirqan. Chïvu paqchiskir alläpa jarukachaptinpis carnëru manam ni imanakaytapis puëdirqantsu. Tsaynö atacaptinmi ni pipis washayta puëdirqantsu.

8Tsaymi chïvuqa cada vez mas kallpasapa tikrarqan. Peru tsaynö alläpa poderyuq kaykaptinmi jatun waqran pakiskirqan. Tsay pakishqa waqranpa rantinmi chusku jatusaq waqrankuna wiñämurqan. Tsay waqrankunam chuskun lädupa toqrirarqan.

9Jukaq waqranpitam taksha waqra wiñar mas jatun tikrarqan. Tsay waqram wiñarqan sur kaqläpa, rupay yarqamunan kaqläpa y kuyaypaq nacionnintsik kaqläpa.#8.9 Tsay waqraqa Antíoco IV Epífanes shutiyuq reymi karqan. Paymi mandakuyta qallarqan kimsa pachak qanchis chunka (370) watatanöraq revelacionta Daniel rikanqanpita. 10Tsaynöllam wiñarqan ciëluchö kaykaq angelkunayaq. Tsaymi wakin kaq angelkunata y qoyllurkunata qarpaskamur jarutakurqan.#Apoc. 12.4. 11Angelpa mandakuqninpita mas poderyuq kanqanta yarparmi sacrificiuta templuchö waran waran waykayänanta amatsakur templutapis impüruyätsirqan.#8.11 Templutaqa impüruyätsin Dios Yaya prohibinqankunata tsaychö rurarmi. Tsaypaq masta musyanaykipaq liyinki Lev. 20.3; 21.12; Núm. 19.13, 20. Antíoco IV Epífanes shutiyuq rey templuta impüruyätsirnin imata ruranqanta musyanaykipaq liyinki 1 Macabeos 1.20-24, 44-50. 12Tsaynöpam waran waran waykayänanpaq kaq sacrificiuta waykayarqantsu y Diosman creyiqkunapis tsaychö adorayarqannatsu. Tsay waqraqa Dios Yaya ninqantapis llapantam manakaqman churarqan. Waqra munanqannömi llapanpis karqan.

13Tsaypitam juk ángel jukaq angelta tapuqta wiyarqä: <<¡Imayyaqraq waran waran waykayänanpaq kaq sacrificiuta waykayanqatsu! ¡Imayyaqraq Dios Yayata mana cäsur templuta manakaqman churayanqa! ¡Imayyaqraq Dios Yayaman creyikuqkunata ñakatsiyanqa!>>

14Tsaynö tapuptinmi jukaq ángel nirqan: <<Tsaynömi kanqa ishkay waranqa kimsa pachak (2,300) tardiyaq y alliqyaq. Tsaypitanam templu purificashqa kanqa>>.

Revelacionchö Daniel rikanqan imapaq kanqan

15Noqa Daniel revelacionchö rikanqäpaq yarpachakur kaykaptïmi illaqpita puntächö runa rikuqlla yuriskamurqan. 16Tsaypitam wiyarqä Ulai mayupita tsay runa rikuq nimuqta: <<Ángel Gabriel, tsay rikanqan imapaq kanqanta tantiyatsiy>>.#Luc. 1.19, 26.

17Ángel Gabriel puntäman shamuptinmi alläpa mantsakar pelatakaypa ishkirqä. Tsaymi nimarqan: <<Runapa tsurin, shumaq tantiyay. Llapan rikanqaykiqa ushanan tiempu chämuptinraqmi cumplinqa>>.

18Tsaynö parlapaykämaptinmi pelataraykanqächö desmayaskirqä. Peru sharkatsimarmi 19nimarqan: <<Kananmi tantiyatsishayki Dios Yaya rabyarnin castiganan tiempuchö ima päsananpaq kanqanta. Tsayqa ushanan tiempuchömi kanqa.

20<<Ishkay waqrayuq carnëruta rikanqaykiqa Mediapa y Persiapa mandakuqnin reykunam kayan. 21Rikanqayki chïvuqa Grecia nacionpa mandakuqnin reymi kaykan. Chïvupa urkunchö jatun rikanqayki waqraqa Grecia nacionpa punta kaq mandaqnin reymi kaykan. 22Tsay waqra pakiptin chusku waqrakuna wiñäyämunqanta rikanqaykiqa tsay nación chuskuman rakikänanpaqmi. Peru tsay rakikashqa nacionkunapa poderninqa manam puntata kanqannötsu kanqa.

23<<Tsay chusku nacionkuna poderninnaq tikrayaptin y runakunapa jutsan paqtaskiptinnam mana llakipäkuq sabïdu runa rey kananpaq yaykunqa.#8.23 Tsay sabïdu runaqa Antíoco IV Epífanes shutiyuq reymi karqan. 24Tsay reyqa alläpa poderyuqmi tikranqa. Peru manam kikinpa poderninwantsu tsaynö kanqa, sinöqa jukpa poderninwanmi. Munanqanta rurarmi imaykatapis jankat ushakätsinqa. Tsaynöllam poderyuqkunata y Dios Yayaman confiakuq santu runakunatapis ushakätsinqa.

25<<Alläpa sabïdu karmi pitapis engañanqa. Orgullösu karmi atskaq runakunatapis illaqpita wañutsinqa. Tsaynöllam mandakuqkunapa mandakuqnin Dios Yayapa contran shärinqa. Tsaynö kaykanqanchömi castïguwan wañunqa. Tsay castïguqa manam runapitatsu kanqa.

26<<Alliqpa y tardipa sacrificiuta mana rupatsiyänanpaq kanqanta revelashunqaykiqa rasunpam päsanqa. Peru ama pitapis tsaytaqa willankitsu. Atska wata päsaskiptinraqmi tsaykuna cumplinqa>>.

27Tsaynö nimaptinmi noqa Daniel alläpa mantsakarnin kallpannaq tikrar atska junaq qeshyarqä. Tsaypita kutikarkurnam rey nimanqanta yapay rurarqä. Peru tsay rikanqä imapaq kanqantapis mana tantiyarmi alläpa llakikurqä.

Currently Selected:

Daniel 8: qxn

Highlight

Copy

Compare