Amós 7
7
Revelacionchö chukllushkunata Amós rikanqan
1Reypa cosëchanta qorir ushaskir kikinkunapa qepashqa cosëchankunata manaraq qoriyaptinmi Dios Yaya maytsika chukllushkunata kay patsaman kachamunanpaq alistanqanta revelacionchö rikätsimarqan.#Joel 1.4; 2.2-11. 2Tsay chukllushkuna llapan qewakunata ushaykäyaqta rikätsimaptinmi rugakur nirqä: <<Dios Yaya, perdonaykayällämay. Jacobpita miraq wallkaqllana kaykaqtach kay maytsika chukllushkunaqa ushaskayämanqa>>.
3Tsaymi Dios Yaya llakipämar nimarqan: <<Rugakamanqaykipitam chukllushkunata manana kachamushaqnatsu>>.
Revelacionchö ninata Amós rikanqan
4Tsaypitanam Dios Yaya revelacionchö rikätsimarqan Israel nacionta ninawan castiganqanta. Tsay ninam patsa rurinpita pashtamuq yakuta tsakitsirnin entëru Israel nacionta usharqan.#Joel 1.19-20.
5Tsaymi rugakur nirqä: <<Dios Yaya, ama tsaynö ushakaykatsillaytsu. Mana perdonayämaptikiqa Jacobpita miraq wallkaqlla kaykaqtach jankat ushakaskatsiyämanqa>>.
6Tsaymi Dios Yaya llakipämar nimarqan: <<Rugakamanqaykipita manam tsaytapis rurashaqtsu>>.
Revelacionchö plomädata Amós rikanqan
7Tsaypitam perqa lädunchö plomädan aptashqa Dios Yaya ichiraykaqta revelacionchö rikarqä. 8Tsaymi tapumarqan: <<Amós, ¿imatatan rikaykanki?>>
Tsaynam nirqä: <<Taytay, albañilpa plomädan aptashqa ichiraykaqtam rikaykä>>.
Tsaymi nimarqan: <<Plomädawan perqa derëchu o wiksu kanqanta musyayanqaykinömi Israel runakuna imanö kawakuyanqanta musyashaq. Jutsata rurar kawayanqanpita mananam perdonashaqnatsu.
9<<Isaacpita miraq ayllunkuna#7.9 Isaacpita miraqkunam Israel runakuna kayan. ruratsiyanqan altarkunatam ushakätsishaq.
Ïdulukunata adorayänan wajikunatam Israel nacionchö jankat juchutsishaq.
Espädäta aptarkurmi aywashaq rey Jeroboampita miraqkunata ushakätsinäpaq>>.
Sacerdöti Amasías profëta Amóspa contran shärinqan
10Amós tsaynö willakuptinmi Bet-elchö sacerdöti Amasías Israel runakunapa mandakuqnin rey Jeroboamman willakatsir nirqan: <<Amósmi contrayki willakur puriykan. Israel runakuna pay ninqanta cäsuyaptinmi kay nacionnintsik ushakanqa. 11Paymi kaynö willakur puriykan: <Jeroboamta espädawan wañuskatsirmi Israel runakunata juk nacionman prësu apayanqa> >>.
12Amóstanam sacerdöti Amasías nirqan: <<¡Profëta, kaypita sas aywakuy! Willakunqaykipita gänayta munarqa Judá nacionman aywar willakuy. 13Kay Bet-elchö Israel nacionpa templun kaptinmi reypis Diosta adoraq shamun. Tsaynö kaykaptinqa kaychö amana willakuynatsu>>.
14Amósnam nirqan: <<Noqaqa manam profëtatsu ni profëtapa tsurintsu kä, sinöqa üshakunata mitsipukur kikillan jeqashqa hïguskunata pallakurllam vïdäta päsakü. 15Peru Dios Yayam üshäkunata mitsikur puriykaqta qayaskamar nimashqa: <Israel runakunaman ayway willakuynïta willakunaykipaq>. 16Tsaymi kanan shumaq wiyamay Dios Yaya qampaq ninqanta.
<<Qammi ninki: <Israel runakunapa contran ama ni imatapis willakuytsu.
Tsaynölla Isaacpita miraqkunapaqpis ama ni imata parlaytsu>.
17<<Tsaymi Dios Yaya nin:
<Qampa warmikim kay markachö prostitüta kanqa.
Tsurikikunatam warmita ollqutapis espädawan wañutsiyanqa.
Chakraykikunatapis sortiyarmi rakipunakuyanqa.
Kikikipis wañunkim Diosta mana cäsuq runakunapa nacionninkunachö.
Israel majikikunatam juklä karu nacionman prësu apayanqa> >>.
Currently Selected:
Amós 7: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
