Amós 8

Poqushqa frütakunata revelacionchö Amós rikanqan

1Tsaypitanam poqushqa frütakuna canastachö kaykaqta revelacionchö Dios Yaya rikätsimarqan. 2Paymi tapumarqan: <<Amós, ¿imatatan rikaykanki?>>

Tsaymi nirqä: <<Taytay, poqushqa frütakuna canastachö wiñaraykaqtam rikaykä>>.

Dios Yayanam nimarqan: <<Runakuna mikuyänanpaq poqushqa frütakuna listu kanqannömi Israel runakuna castiganäpaq listu kaykäyan. Tsaymi paykunata manana perdonashaqnatsu.

3<<Tsaynö castigaptïmi Israel runakuna maytsaychö wañushqa jitaräyanqa. Palaciuchö kushishqa cantayanqanpa rantinmi wañushqakunapaq llakikur waqayanqa. Tsaynö llapan ushakäyaptinmi tsunyaranqa>>. Dios Yayam tsaynö nin.

4Kay niyanqaqta shumaq wiyayämay.

Qamkunam yana ashnuykikunatanö mana pägar humildikunata arutsiyanki.

Waktsakunatam alläpa sufritsiyanki.

5Tsaymi niyanki:

<<¡Imayraq llullu killa fiesta ushakanqa trïguntsikta rantikunapaq!

¡Imayraq jamay junaqpis ushakanqa tsaki mikuynintsikta rantikunapaq!

Negociuta rantikurmi pësuchö y tupuchö engañakurnin gänashun>>.#Lev. 19.35-36; Deut. 25.13-16; Prov. 11.1; Miq. 6.10-11.

6Qamkunaqa qellaypaq ayrajashqa karmi trïgupa gransantapis rantikuyanki.

Dëbikuyanqanta pägakuyta mana puëdiq waktsakunatam serviyäshunaykipaq rantiyanki.

Paykunata mana llakiparmi rantiyanki wallkalla qellaywan o juk par llanqillawan.

7Tsaymi Jacobpita miraq runakunata kuyaq Dios Yaya jurar nin:

<<Jutsata rurayanqaykita manam ni imaypis qonqäshaqtsu.

8Jutsaykikunapita ¿manatsuraq kay patsapis tsuktsukyanqaraq?

Nilo mayu kuyuypa kuyurraq jichar aywaqnömi kay patsapis janaqman uraman kuyur tsuktsukyanqa.

Mana llakipar castigayaptiqmi entëru Israelchö täkuq runakuna waqapakuyanqa>>.

9 Dios Yayam nin:

<<Castigayanqaq junaqmi rupay pullan junaqchö kaykaptin patsata tutapaskatsishaq.

Pullan junaq atsikyaykarmi entëru mundupis tutapayman tikranqa.#Joel 2.10.

10Fiestata rurayanqaykipa rantinmi waqapakurllana kayanki.

Llakikur waqakuypaqtam cantayankipis.

Lütu llatapata shukukurkurmi llakikur kayanki.

Llakikuypitam umaykikunatapis qala pututa rutukuyanki.

Japallallan wamraykikuna wañuskiptin waqayanqaykinömi alläpa llakir waqayanki.

Ima rurayanqaykipis gustunnaq llakikuypaqmi kanqa>>.

11Poderösu Dios Yayam nin:

<<Chaykämunnam entëru nacionchö alläpa muchuywan castigayänaqpaq junaqkuna.

Manam mallaqaytsu ni yakunaytsu tsay muchuy kanqa, sinöqa willakuynïta wiyayta munaymi.

12Willakuynïta wiyayta munarmi maytsaypapis runakuna aywayanqa.

Lamarpa kuchunpita jukaq kuchunyaq aywarpis willakuynïta manam tariyanqatsu.

Norti kaqläpita rupay yarqamunan kaqläyaq aywarpis manam tariyanqatsu.

13Tsay witsaymi willakuynïta mana wiyar kuyakuypaq jipashkuna y mas valienti kaq jövinkunapis yakunar desmayashqanö kayanqa.

14Tsaynöllam Samariachö ïdulukunata adoraqkuna, Danchö ïdulupa shutinta parlaqkuna y Beersebachö ïdulukunapa shutinkunata parlaqkunapis llapan wañur ushakäyanqa>>.

Currently Selected:

Amós 8: qxn

Highlight

Copy

Compare