Amós 5
5
1Israel runakuna, llakikuy cantutanö kanan cantaptï shumaq wiyayämay.
2Doncëlla jipashnö kuyakuypaq kaykarmi nacionniki ushakanqa.
Jankat ushakätsishqa kaptinmi ni pipis shäritsiyta puëdinqatsu.
3 Dios Yayam nin:
<<Israel nacionchö juk markapita waranqa (1,000) runakuna guërraman aywarmi pachakllana (100) kawaykar kutiyämunqa.
Juk markapita pachak runakuna guërraman aywarmi chunkaqllana kutiyämunqa>>.
4 Dios Yayam nin:
<<Israel runakuna, noqata ashiyämay.
Ashiyämarqa kawayankim.
5Peru Bet-elmanqa ama aywayaytsu.
Gilgalman ni Beersebamanpis ama chäyaytsu.
Gilgal markachö täkuq runakunatam juk nacionman prësu apayanqa.
Bet-el markatapis jankatmi ushakätsiyanqa>>.
6 Dios Yayata ashirqa kawayankim.
Mana cäsukuyaptikiqa imaykatapis nina ushaqnömi llapaykita ushakätsiyäshunki.
Tsay höraqa Bet-elchö adorayanqayki ïdulukuna manam mayqanpis salvayäshunkitsu.
7Qamkunaqa waktsakuna quëjakuyaptin manam justiciata rurayankitsu.
Jutsayuq kaqpa janan shärirmi jutsannaq kaqpa contran kayanki.
8 Dios Yayam Pléyades niyanqan qoyllurkunatawan Orión niyanqan qoyllurkunatapis kamashqa.
Paymi paqastapis junaqman tikratsin.
Junaqtam alläpa tutapayman tikratsin.
Lamarpita pukutayta pallarkurmi tamyatsimun.
Shutinpis Yahwehmi.
9Kallpasapa runatam ushakätsin.
Altu murällayuq markakunatam juchutsin.
10Qamkunam demandanakuychö alli justiciata ruraq kaqta chikiyanki.
Rasunpa kaqta willakuq testïgukunatam qarquyanki.
11Impuestuta pägatsirmi waktsakunatapis mikuyänanpaq qorikuyanqanta qechuykäyanki.
Tsaynö kayanqaykipitam llaqllashqa rumiwan kuyakuypaq wajikunata ruraskatsirpis täkuyankitsu.
Üvata plantarpis vïnunta manam upyayankitsu.
12Musyämi jutsata rurar mana cäsuyämanqaykita.
Qamkunaqa qarayta chaskipakurmi jutsayuqkunapa janan shäriyanki y jutsannaq kaqta culpatsayanki.
13Tsaynö culpatsayänaykita musyarmi yachayyuq runakunapis upällalla kakuyan.
Mana alli kayaptikim pïmaypis mantsaq mantsaqlla kakuyan.
14Alli kawakuyänaykipaq mana allikunata rurayaytsu, sinöqa alli kaqkunallata rurayay.
Tsaymi llapanta mandaq Dios Yaya yarpäyanqaykinö yanapayäshunki.
15Llutan ruraykunata dëjaskir alli kaqkunallatana rurayay.
Despächuykikunachöpis alli justiciata rurayay.
Tsaynö rurayaptikiqa Josépita miraqkuna mana ushakäyänaykipaq talvezqa llapanta mandaq Dios Yaya llakipaykuyäshunkiman.
16Poderösu y llapanta mandaq Dios Yayam nin:
<<Pläzakunachöpis waqakuyllam kanqa.
Cällikunachöpis alläpa llakikurmi qayaraykachäyanqa.
Chakrachö aruqkunatapis waqäsiyänanpaqmi qayayanqa.
Waqaqkunawanmi paqta waqayanqa.
17Shamur castigayaptiqmi llapan üva chakrakunachöpis Israel runakuna waqakuyanqa>>.
Dios Yayam tsaynö nin.
18¡Ay, imanöraq kayanki Dios Yaya juzganan junaq chämuptin!
¿Imanirtan munayanki tsay junaq shamunanta?
Tsay junaq alli kananpaq kanqanta yarpäyaptikipis alläpa mantsakaypaqmi kanqa.
19Tsay junaqqa leonpita qeshpiykar ösuwan tinkuqnömi kanqa.
Tsaynöllam wajinman yaykuskir perqaman achkukuptinpis uchkupita culebra kanimuqnö kanqa.
20Tsaymi Dios Yaya juzganan junaq chämuptin kushikuyanqanpa rantin alläpa llakikuyanqa.
Tutapaychönö karmi ni imanakaytapis puëdiyanqatsu.
21<<Noqapaq fiesta rurayanqaykitapis alläpam melanä.
Qorikaykur janan shonqulla adorayämanqaykitapis alläpam chikï.
22Waykana sacrificiukunata tsaki mikuykunata noqapaq waykayaptikipis manam chaskishaqtsu.#Isa. 1.11-14.
Wera kaq mallwa töruta alli päsakuy sacrificiupaq waykayaptikipis manam chaskishaqtsu.
23Arpata töcar kushishqa cantayanqaykitapis manam wiyayta munätsu.
24Noqam munä runa majikikunawan alli kawakur munanqänö kawakuyänaykita.
Mayu mana ushakar aywaqnö qamkunapis runa majikikunawan imaypis alli kawakuyay.#1Sam. 15.22; Prov. 21.3; Jer. 7.22-23; Ose. 6.6; Miq. 6.6-8.
25<<Israel runakuna, chusku chunka (40) wata desiertupa purirpis manam noqapaqtsu wätakunata y tsaki mikuykunata waykayarqayki.
26Tsaypa rantinmi rey kanqanta yarpar Sicut shutiyuq ïduluta aparishqa puritsiyarqayki.
Tsaynöllam qoyllur rikuq Quiún ïdulutapis aparishqa puritsiyarqayki.
Tsaykunatam diosnikikuna kayänanpaq kikikikuna rurayarqayki.
27Tsaymi Damascupita juklä partiman qarqutsiyäshayki>>.#Hech. 7.42-43.
Dios Yayam tsaynö nin.
Paypa shutinqa Llapanta Mandaq Dios Yayam#5.27 Hebreo idiömachömi shutin kaykan Elohim Tsaba..
Currently Selected:
Amós 5: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
