Amós 2
2
Moab nación runakunata Dios Yaya juzgananpaq ninqan
1 Dios Yayam nin:
<<Moab nacionchö täkuq runakunapa jutsankunaqa alläpanam kaykan.#Isa. 15.1—16.14; 25.10-12; Jer. 48; Eze. 25.8-11; Sof. 2.8-11.
Paykunam Edom nacionpa mandakuqnin reypa tullunkunata uchpayanqanyaq waykayarqan.
Tsaynö rurayanqanpitam mana llakipaypa castigashaq.
2Tsaymi nina imaykata rupar ushanqannö Moab nacionta y Queriotchö palaciukunatapis ushakätsishaq.
Guërrachö qayaykacharraq cornëtankunata töcaykäyaptinmi moabita runakunata soldädukuna wañutsiyanqa.
3Tsay nacionpa mandakuqnin reytam ushakätsishaq.
Mandäsiqninkunatapis jankatmi wañutsishaq>>.
Dios Yayam tsaynö nin.
Judá nación runakunata Dios Yaya juzgananpaq ninqan
4 Dios Yayam nin:
<<Judá nacionchö täkuq runakunapa jutsankunaqa alläpanam kaykan.
Paykunam mandamientükunata y leynïkunata mana cäsur unay ayllunkuna adorayanqan ïdulukunata adorayan.
Tsaynö rurayanqanpitam mana llakipaypa castigashaq.
5Tsaymi nina imaykata rupar ushanqannö Judá nacionta y Jerusalénchö palaciukunatapis ushakätsishaq>>.#Ose. 8.14.
Israel nación runakunata Dios Yaya juzgananpaq ninqan
6 Dios Yayam nin:
<<Israel runakuna, qamkunapapis jutsaykikuna alläpanam kaykan.
Qamkunam jutsannaq runakunata rantikuykäyanki.
Llanqipa chanintanölla jaqayki kaykaptinpis waktsakunatam servikuqpaq rantikuykäyanki.
Tsaynö rurayanqaykipitam mana llakipaypa castigayäshayki.
7Waktsakunatawan qollmi shonqukunatam munayanqaykita ruraykätsiyanki.
Juez kaykarpis quëjakuyanqanta manam justiciata rurayankitsu.
Wakikim taytaykikunawanpis tsay warmillawan kakuyanki.
Tsaynö karmi santu shutïta respitayankitsu.
8Prenda jaqipuyäshunqayki llatapata mashtaykurmi altarkuna lädunchöpis warmikunawan puñuyanki.#2.8 Prenda jaqipunqan llatapata patsa tutapaptin entregananpaq kanqanta musyanaykipaq liyinki Éxo. 22.26-27; Deut. 24.12-13.
Tsaynöllam manakaqpita multata pägakatsiyanqayki qellaywan vïnuta rantiskir juk dioskunata adorayanqayki wajikunachö upyaykäyanki.
9<<Qamkunata kuyarmi amorreo runakunata ushakätsishkä.#2.9 Egiptupita Canaánman Israel runakuna charmi Dios Yaya yanapaptin amorreo runakunata ushakätsiyarqan. Tsaypitam paykuna täkuyanqan markakunachö Israel runakuna takuyarqan.#Deut. 3.8-11.
Cedru qerukunanö jatusaq kaykaqta y encina jachakunanö chukru kaykaqtam tsay runakunata ushakätsishkä.
Jachata wayuynintawan jawantinta illakätsiqnömi ushakätsishkä.
10Amorreo runakuna täkuyanqanman chäyänaykipaq kikïmi Egiptupita jipiyämurqaq.
Kikïmi chusku chunka (40) wata desiertupa pushayämurqaq amorreo runakuna täkuyanqan markakunata entregayänaqpaq.#Éxo. 20.2; Deut. 8.2-16.
11Wakin kaq tsurikikunatam profëta kayänanpaq akrashkä.
Wakin kaqtanam nazareo runa kayänanpaq akrashkä.#Núm. 6.1-8.
Israel runakuna, ¿tsaynö kananpaq churayanqaqta manaku tantiyayanki?>>
Dios Yayam tsaynö nin.
12<<Qamkunam nazareo runakunata mana munaykäyaptin amälas vïnuta upyatsiyashkanki.
Profëtakunatapis willakuynïta mana willakuyänanpaqmi amatsayashkanki.
13Tsaynö kayanqaykipitam alläpa cargashqa carrëta imaykatapis jarur ushakätsinqannö qamkunatapis ushakätsiyäshayki.
14Mayjina cörrirpis makïpita manam qeshpiyankitsu.
Mayjina kallpasapa karpis manam defendikuyta puëdiyankitsu.
Mayjina valienti karpis manam salvakäyankitsu.
15Flëchayta munarpis manam puëdiyankitsu.
Mayjina cörrirpis manam qeshpiyta puëdiyankitsu.
Bestiayki montashqa qeshpirpis manam salvakäyankitsu.
16Tsay junaqmi mayjina valienti karpis armaykikunata jitaskir qarashtulla qeshpir aywakuyanki>>.
Dios Yayam tsaynö nin.
Currently Selected:
Amós 2: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
