Amós 1
1
1Kay libruchömi Amós willakunqan qellqashqa kaykan. Payqa Tecoa markachö täkuq üsha mitsikuq runam karqan. Amós willakunqan witsaymi Judá nacionchö Uzías rey kaykarqan#2Rey. 15.1-7; 2Crón. 26.1-23. y Israel nacionchönam Joáspa tsurin Jeroboam rey kaykarqan.#2Rey. 14.23-29. Amós willakunqanpita ishkay watataraqmi alläpa patsa kuyurqan. 2Willakurmi Amós nirqan:
<<Dios Yayam Sión lömapita leonnö qayarämun.
Jerusalénpita qayakamunqanmi maqakuynöraq wiyakämun.#Jer. 25.30; Joel 3.16.
Parlamuptinmi jirkachö qewakuna tsakinqa.
Carmelo jirkachö qewakunapis chipyatmi tsakinqa>>.
Siria nación runakunata Dios Yaya juzgananpaq ninqan
3 Dios Yayam nin:
<<Damasco markachö#1.3 Damasco markaqa Siria nacionpa capitalninmi karqan. täkuq runakunapa jutsankunaqa alläpanam kaykan.#Isa. 17.1-3; Jer. 49.23-27; Zac. 9.1.
Paykunam ërachö trïguta jarutsiqnö Galaad runakunata ushakätsiyashqa.#2Rey. 10.32-33.
Tsaynö rurayanqanpitam mana llakipaypa castigashaq.
4Tsaymi nina imaykata rupar ushanqannö rey Hazaelpa castankunata y rey Ben-adad shäritsinqan palaciuta ushakätsishaq.
5Damasco markaman yaykuna punkukunatapis llapantam pakishaq.
Bicat-avénchö y Bet-edénchö mandakuqkunatapis jankatmi ushakätsishaq.
Tsaypitanam contran runakuna shamur Siria runakunata Kir partiman prësu apayanqa>>.#2Rey. 16.9.
Dios Yayam tsaynö nin.
Filisteo runakunata Dios Yaya juzgananpaq ninqan
6 Dios Yayam nin:
<<Gaza markachö täkuq runakunapa jutsankunaqa alläpanam kaykan.
Paykunam juk marka entëruta edomita runakunaman runakunata rantikuyarqan.
Tsaynö rurayanqanpitam mana llakipaypa castigashaq.
7Nina imaykata rupar ushanqannömi Gaza markapa murällanta y palaciunkunatapis ushakätsishaq.
8Asdod markachö y Ascalón markachö reykunatapis jankatmi ushakätsishaq.
Mana llakipaypam Ecrón markachö täkuq runakunatapis ushakätsishaq.
Tsaynöpam filisteo runakuna#1.8 Filisteo runakunam Gaza, Asdod, Ascalón y Ecrón markakunachö täkuyarqan. llapanpis wañuyanqa>>.#Isa. 14.29-31; Jer. 47; Eze. 25.15-17; Joel 3.4-8; Sof. 2.4-7; Zac. 9.5-7.
Dios Yayam tsaynö nin.
Tiro runakunata Dios Yaya juzgananpaq ninqan
9 Dios Yayam nin:
<<Tiro markachö täkuq runakunapa jutsankunaqa alläpanam kaykan.#Isa. 23; Eze. 26.1—28.19; Joel 3.4-8; Zac. 9.1-4; Mat. 11.21-22; Luc. 10.13-14.
Paykunam castankunawan shumaq kawakuyänanpaq pactuta rurashqa kaykar juk marka entëruta edomita runakunaman tsay castan runakunata rantikuyarqan.
Tsaynö rurayanqanpitam mana llakipaypa castigashaq.
10Tsaymi nina imaykata rupar ushanqannö Tiro markapa murällanta y palaciunkunatapis ushakätsishaq>>.
Edomita runakunata Dios Yaya juzgananpaq ninqan
11 Dios Yayam nin:
<<Edom nacionchö täkuq runakunapa jutsankunaqa alläpanam kaykan.#Isa. 34.5-17; 63.1-6; Jer. 49.7-22; Eze. 25.12-14; 35.1-15; Abd. 1-14; Mal. 1.2-5.
Paykunam mana llakipaypa castankuna kaykaptin Israel runakunata espädawan wañutsiyarqan.
Tsaynö rurayanqanpitam mana llakipaypa castigashaq.
12Tsaymi nina imaykata rupar ushanqannö Temán markata y Bosrachö palaciukunatapis ushakätsishaq>>.
Amón nación runakunata Dios Yaya juzgananpaq ninqan
13 Dios Yayam nin:
<<Amón nacionchö täkuq runakunapa jutsankunaqa alläpanam kaykan.#Jer. 49.1-6; Eze. 21.28-32; 25.1-7; Sof. 2.8-11.
Paykunam chakrankunata qechuyänanpaq Galaadchö täkuq qeshyaq warmikunata espädawan pachankunata qashar wañuskatsirqan.
Tsaynö rurayanqanpitam mana llakipaypa castigashaq.
14Tsaymi nina imaykata rupar ushanqannö Rabá markapa murällanta y palaciunkunatapis ushakätsishaq.
Apäkuy tamyanöraqmi qayaykacharraq tsay markata ushakätsiyanqa.
15Mandaqnin reyta y mandäsiqninkunatapis juklä nacionmanmi prësu apayanqa>>.
Dios Yayam tsaynö nin.
Currently Selected:
Amós 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
