Hechos 25

Festupa puntanchö Pablo parlanqan

1Judea provinciapa gobernadornin kananpaq Cesareaman chanqanpita kimsa junaqtam Jerusalénman Festo aywarqan. 2Chaykuptinmi mandakuq sacerdötikuna y Israelchö mas mandakuq autoridäkuna Pabluta demandayarqan. 3Tsaynöllam Pabluta Jerusalénman apatsinanpaq rugayarqan. Tsaynö rugayarqan apaykäyaptillanna Pabluta wañutsiyta munarmi. 4Festunam nirqan: <<Pabluqa Cesarea markachömi prësu kaykan. Noqapis tsayman aywanäpaqmi kaykä. 5Tsayman wakikiwan aywashun ima jutsan kanqantapis shimpiyänaykipaq>>.

6Jerusalénchö juk semänanö kaskirmi Cesareaman Festo kutirqan. Chanqanpita waränin junaqmi despächunman jamaykur Pabluta jipitsimurqan. 7Pablo yaykuskiptinmi Jerusalénpita aywaq Israel runakuna juntapuskir imaykata tumpayarqan. Tsaynö tumpayaptinpis niyanqankuna manam rasunpatsu karqan. 8Tsaymi Pablo nirqan: <<Noqa manam Israel runakunapa leyninkunata ni templuntapis manakaqman churashkätsu. Romachö mandakuq Césarpa contranpis manam ni imata rurashkätsu>>.

9Festunam Israel runakunawan alli kayta munar Pabluta tapurqan: <<¿Jerusalénman aywayta munankiku tsaychö juzganaqpaq?>>

10Pablunam nirqan: <<Romachö mandakuq Césarmi churashushkanki pitapis juzganaykipaq. Pay churaykäshuptikiqa kayllachö juzgamay. Musyanqaykinöpis manam ni imatapis Israel runakunapa contran rurashkätsu. 11Wañutsishqa kanäpaqnö imatapis jutsata rurashqa karqa manam tsapakushaqtsu. Israel runakunapa contran imatapis mana rurashqa kaykaptïqa manam ni pipis paykunapa makinkunaman entregamanmantsu. Tsaypa rantinqa Romachö mandakuq César juzgamätsun>>.

12Tsaynö niptinmi yätsiqninkunawan Festo willanakuskir Pabluta nirqan: <<Mandamaqnintsik César Romachö juzgashunaykita munaptikiqa paymanmi apatsishayki>>.

Rey Agripapa puntanchö Pablo kanqan

13Juk ishkay junaqllatanam warmin Bereniciwan rey Agripa Cesareaman chäyarqan Festo watukaq. 14Atska junaq tsaychö quëdaptinmi Pablo qaykuranqanta willakur Festo nirqan: <<Juk runatam prësu qaykuraykaqta Félix dëjashqa. 15Jerusalénman aywaptïmi mandakuq sacerdötikuna y Israel mayor runakuna mañakayämashqa tsay runa wañutsishqa kananpaq. 16Tsaymi nishkä: <Contrankuna manaraq shimpiyaptin y acusayanqan runa manaraq defendikuptinqa Roma autoridäkuna manam ni pitapis llutallaqa wañutsiyantsu>.

17<<Tsaymi contrankuna chaykayämuptin waränin junaq despächüman jamaykur tsay prësuta saslla jipitsimurqä. 18Tsaychö noqa yarpanqänöqa contrankuna manam ni imatapis niyarqantsu. 19Tsaypa rantinmi costumbrinkunata manakaqman churanqanllata tumpayarqan. Tsaynöllam piñanakuyashqa wañushqana kaykaq Jesús shutiyuq runapaq. Pablum tsay runa kawaykanqanta nin. 20Imanö juzgayta mana puëdirmi Pabluta tapurqä: <¿Jerusalénman aywashwanku tsaychö arreglanäpaq?> 21Jerusalénman aywayta mana munarmi mandamaqnintsik César arreglananpaq mañakamashqa. Tsaymi Césarman apatsinqäyaq jina prësu kaykan>>.

22Tsaynö willayaptinmi Agripa nirqan: <<Noqapis tsay runa ninqantam wiyayta munä>>.

Tsaymi Festo nirqan: <<Munaptikiqa waray qayatsimushun pay ninqanta wiyanaykipaq>>.

23Tsaymi waränin junaq Agripa, Berenice, comandantikuna y llapan autoridäkunapis qorikäyänan jatun cuartuman yaykuyarqan. Llapan qorikaskiyaptinmi Pabluta jipiyämunanpaq Festo mandarqan. 24Chaykatsiyaptinmi nirqan: <<Tayta Agripa y llapayki kaychö qorikashqa kaykaqkuna, kay runata wañutsiyänanpaqmi Israel runakuna Jerusalénchö y kaychöpis qayaykachar mañakuykäyan. 25Peru tsaynö paykuna munayaptinpis wañunanpaqnöqa manam ni ima jutsantapis tarishkätsu. Romachö mandamaqnintsik César arreglananpaq kay runa mañakamaptinmi Romaman apatsinäpaq kaykä. 26Romaman manaraq apatsirmi cartata qellqashaq imanir apatsinqätapis César musyananpaq. Peru manam imata qellqanäpaqpis shumaq musyätsu. Rey Agripa, qamkuna yanapayämay Pabluta shumaq tapuykur mandakuq Césarman imatapis qellqanäpaq. 27¿Imanöpatan juk prësuta Césarman apatsishun imanir apatsinqantsiktapis mana willarqa?>>

Currently Selected:

Hechos 25: qxn

Highlight

Compare

Copy