Hechos 26

1Festo tsaynö niptinmi Pabluta Agripa nirqan: <<Imanö kanqantapis kanan willayämay>>.

Tsaymi runakuna upälla kayänanpaq makinta pallarkur Pablo nirqan: 2<<Tayta Agripa, Israel autoridäkuna manakaqkunata parlayanqanta kanan defendikunäpaq puntaykiman qayatsimanqaykitam kushikü. 3Qammi musyanki Israel runakunapa costumbrinkuna imanö kanqanta y imapita piñanakuyanqantapis.#26.3 Tsay witsaymi Israel runakuna piñanakuyarqan mayqan librukuna sagrädu kanqanta, ángel kanqanta o mana kanqanta, wañuqkuna kawamunanpaq o mana kawamunanpaq kanqanta y mas wakin kaqkunapaqpis. Tsaymi kanan parlamunqäta wiyaykamänaykipaq rugakuq.

4<<Markächöpis y Jerusalénchöpis llapan Israel majïkunam musyayan wamra kanqäpita imanö kawanqäta. 5Tsaynöllam musyayan ñawpapita fariseo kar Moisés qellqanqan leykunata wakin runakunapitapis mas cumplinqäta.#Hech. 23.6; Fil. 3.5. Tsaytaqa kikinkunam willayäshunkiman.

6<<Unay aylluntsikkunata Dios Yaya prometinqankunaman creyikuptïmi runakuna demandayäman. 7Tsay prometinqankunata Dios Yaya cumplinanpaq kanqanta creyikurmi chunka ishkay trïbu Israel runakuna paqasta junaqta serviyan. Tayta Agripa, noqapis paykunanölla creyikunqäpitam demandayäman. 8¿Imanirtan creyiyankitsu wañushqakunata Dios Yaya kawatsimunanpaq kanqanta?

9<<Unaymi noqapis yarparqä Nazaret markapita Jesúsman creyikuqkunapa contran shärir allita ruraykanqäta. 10Mandakuq sacerdötikuna kachayämaptinmi Jesúsman creyikuqkunata Jerusalénchö atskaqta carcelman qaykatsirqä. Wañutsiyaptinmi <allim wañutsiyanki> nirqä. 11Llapan sinagögakunachöpis Jesústa nëgayänanta munarmi atskaqta prësu achkumurqä. Alläpa chikir prësu achkumunäpaqmi karu markakunamanpis aywarqä.#Hech. 8.3; 22.4-5.

Jesucristo parlapanqanta Pablo willakunqan

Hechos 9.1-9; 22.6-16

12<<Tsaymi mandakuq sacerdötikunapita ordinta jipiskir Damascumanpis aywaykarqä. 13Taytay rey, pullan junaqnö aywaykäyaptïmi rupaypitapis mas chipakyarraq atsikyaykamurqan. 14Tsaynö chipakyaykamuptinmi llapäkuna shikwaskiyarqä. Tsaychömi hebreo idiömachö nimuqta wiyarqä: <Saulo, Saulo, ¿imanirtan qatikachämanki? Qaruchapa puntanta töru jaytar däñakunqannömi kikillayki däñakuykanki>. 15Tsaymi nirqä: <Taytay, ¿pitan kanki?> Tsaymi nimarqan: <Noqaqa qatikachaykanqayki Jesúsmi kä. 16¡Sharkuy! Qamtam yuripushkaq servimaqnï y willakuqnï kanaykipaq. Tsaymi kanan rikanqaykikunata y rikätsinaqpaq kaqkunatapis willakunki. 17Israel runakunapita y mana Israel runakunapitapis tsapäshaykim. Mana Israel runakunamanmi willakuq kachaykaq. 18Ninqäkunata willakuptikim runakuna tantiyakur tutapaychönö kawayanqanpita atsikyaychönöna kawayanqa. Satanáspa poderninchö kawayanqanpitam Dios Yayapa poderninchöna kawayanqa. Noqaman creyiyämuptinmi jutsankunapita perdonashaq. Tsaynöpam salvashqa kaqkunawan Dios Yayapita herenciata chaskiyanqa>.

Jesús mandanqanta Pablo cäsunqan

19<<Tayta Agripa, ciëlupita tsaynö revelaykämaptinqa ¿imanirtan cumplïmantsu? 20Tsaymi Damascuchö runakunata willakuyninta willakur qallaykurqä.#Hech. 9.20, 28-29. Tsaypitam Jerusalénchö y Judeachö kaq wakin markakunachöpis willakurqä. Tsaynöllam mana Israel runakunatapis willarqä. Llapantam willakurqä jutsankunapita arrepentikur Dios Yaya munanqannö kawakuyänanpaq. 21Tsayta willakunqäpitam wakin Israel runakuna templuchö prësu achkuskayämar wañutsiyämayta munayashqa. 22Tsaymi yachayyuqta y mana yachayyuqtapis Dios Yaya yanapamaptin willakuyninta kananyaqpis willakuykä.

<<Moisés y wakin profëtakuna qellqayanqanchö niyanqannöllam willakuykä. 23Paykuna qellqayanqanchömi nin Dios Yaya kachamunqan Cristo ñakar wañunanpaq kanqanta. Tsaynöllam nin llapan runakunapitapis mas puntata kawamur#1Cor. 15.20. Israel runakunapaq y mana Israel runakunapaqpis aktsi kanqanta>>.#Isa. 42.6; 49.6.

Jesúsman creyikunanpaq Agripata parlapanqan

24Pablo tsaynö willakuptinmi Festo jinchi nirqan: <<¡Pablo, alläpa estudiarmi löcuyashkanki!>>

25Pablunam nirqan: <<Tayta Festo, manam löcutsu kä. Noqaqa rasun kaqllatam parlaykä. 26Kay willakunqätaqa pïmaymi musyan. Rey Agripapis musyaptinmi mana mantsakur parlamü. 27Tayta Agripa, ¿profëtakuna qellqayanqanta creyinkiku? noqam musyä creyinqaykita>>.

28Agripanam nirqan: <<¿Tsay nimanqaykillawan cristiänu kanätaku yarpanki?>>

29Niptinmi nirqan: <<Saslla chaskinayki o tsaypitaraq chaskinayki kaptinpis Dios Yayatam mañakü qampis y kaychö wiyaykämaqkunapis Jesucristuman noqanö creyikuyänaykipaq. Peru manam munätsu noqanö cadenashqa kayänaykita>>.

30Tsaypitanam rey Agripa, gobernador Festo, Berenice y llapan qorikashqa kaykaqkunapis sharkur 31yarquskiyarqan. Tsaymi kikinkunapura ninakuyarqan: <<Kay runaqa manam ni imata rurashqatsu wañutsishqa kananpaq ni carcelchö qaykuränanpaqpis>>.

32Tsaymi Festuta Agripa nirqan: <<Mandakuq César arreglananpaq Pablo mana mañakushqa kaptinqa dëjaykushwanmi karqan>>.

Currently Selected:

Hechos 26: qxn

Highlight

Compare

Copy