Hechos 20

Macedoniaman y Acayaman Pablo aywanqan

1Tsaypitanam discïpulukunata qayaskir Dios Yaya munanqannö imaypis kawakuyänanpaq Pablo animatsirqan. Despidikuskirnam Macedonia provinciapa aywakurqan. 2Tsay provinciachö markan markan purirmi Jesucristuman creyikuqkunata shumaq animatsirqan.

Tsaypitanam Greciaman#20.2 Greciapaq parlarmi Acaya provinciapaq parlan. Acaya provinciachömi Corinto marka karqan. chaykur 3kimsa killa tsaychö täkurqan. Tsaypita Siriaman büquiwan kutikunanpaqna kaykarmi Israel runakuna wañutsiyänanpaq willanakuyanqanta musyaskirqan. Tsaymi büquiwan aywanqanpa rantin chakillapana Macedonia provinciapa päsarqan. 4Paypa paqtanmi aywayarqan Pirrupa tsurin Sópater, Aristarco, Segundo, Gayo, Timoteo, Tíquico y Trófimo. Sópatermi Berea markapita karqan. Aristarcuwan Segundum Tesalónica markapita kayarqan. Gayuqa Derbe markapitam karqan. Timoteo, Tíquico y Trófimunam Asia provinciapita kayarqan. 5Paykuna puntaskirmi Troas markachö shuyäyämarqan.#20.5 Kay libruta qellqaq Lucaspis Pabluwanmi purirqan. 6Levadürannaq Tantata Mikuna fiesta päsaskiptinmi Filipuspita büquiwan yarquyarqä. Pitsqa junaqta Troasman chaykurmi puntaqkunata taripaskir juk semäna tsaychö kayarqä.

Euticuta Pablo kawatsimunqan

7Domingu junaqmi Santa Cënata mikuyänäpaq wawqikunawan y panikunawan qorikäyarqä. Waränin alliqnam aywakunan kaptin pullan paqasyaq Pablo yachatsikurqan. 8Yachatsikunqan cuartuchömi atska mechërukunata tsaritsiyarqan. 9Tsay cuartuqa kimsa kaq pïsuchömi karqan. Ventänanchömi juk jöven Eutico shutiyuq jamaykarqan. Atska höra Pablo yachatsikuptinmi jamaykanqanchö puñukaskir ventänapita jeqarpurqan. Tsaymi wañushqatana pallariyämurqan. 10Pablo yarpuskirmi tsay jövinta abrazarkur wawqikunata y panikunata nirqan: <<¡Ama mantsakäyaytsu! ¡Kawaykanmi!>>

11Qorikäyanqan cuartuman kutiskirnam Santa Cënata mikuyarqan. Patsa waranqanyaq yachatsikuskirmi Pablo aywakurqan. 12Tsay jövintanam kawaykaqtana wajinman pushayarqan. Kawamunqanta rikarmi llapanpis kushikuyarqan.

Troaspita Miletuman Pablo aywanqan

13Troas markapitam Asón markayaq chakillapa Pablo aywarqan. Noqakunanam büquiwan puntayarqä Asónchöna Pabluta qoriyänäpaq. 14Asónchö qorikaskirmi llapäkuna büquiwan Mitilene markaman aywayarqä. 15Mitilenipita aywakurnam waränin junaq Quío niyanqan isla lädunpa päsayarqä. Tsaypita waränin junaqnam Samos islaman chäyarqä. Tsaypita [Trogilio markachö shütaykurmi] juk junaqtaraq Mileto markaman chäyarqä. 16Pentecostés fiestapaq Jerusalénman imaykanöpapis chayta munarmi Asia provinciachö qoyayta Pablo munarqantsu. Tsaymi Éfesuman mana charlla aywayarqä.

Éfesuchö mayor wawqikunata Pablo yätsinqan

17Mileto markaman chaykurnam Éfesuchö täkuq mayor wawqikunata Pablo qayatsirqan. 18Chaykuyaptinnam nirqan: <<Qamkunam musyayanki kay Asia provinciaman chämunqä junaqpita imanö kawakunqäta. 19Israel runakuna conträ shäriyaptin ñakarpis waqarpis Señor Jesucristuta llapan shonqüwanmi servishkä. 20Dios Yaya munanqannö kawakuyänaykipaqmi runakunapa puntanchöpis y wajikikunachöpis llapanta yachatsiyashkaq. 21Israel runakunata y mana Israel runakunatam tantiyatsishkä jutsankunapita arrepentikur Señornintsik Jesucristuman creyikuyänanpaq.

22<<Kananqa Espíritu Santu pushamaptinmi Jerusalénman aywaykä. Peru tsayman chaykuptï ima päsamänanpaq kaqtapis manam musyätsu. 23May markaman aywaptïpis Espíritu Santum musyatsiman carcelman qaykatsiyämänanpaq y ñakatsiyämänanpaq kanqantapis. 24Peru tsayta musyarpis manam llakikütsu. Noqaqa wañunqäyaqmi Señor Jesucristo nimanqannö [kushishqa] willakushaq Dios Yaya llakipäkuq kanqanta.

25<<Qamkuna kaqchö kaykar Dios Yayapa mandakuyninpaq willakunqäta wiyamaqkuna, kananpitaqa mananam ni mayqayki rikäyämankinatsu. 26-27Dios Yayapa willakuynintam qamkunata llapanta willayashkaq. Tsaymi mayqaykitapis Dios Yaya juzgar condenayäshuptiki jutsayuqtsu kashaq. 28Tsaynö kaykaptinqa cuidädutaq jutsata rurayankiman. Mayor wawqikuna kayänaykipaq Espíritu Santu churaykäyäshuptikiqa mitsikuq runa üshankunata alli mitsinqannö Dios Yayapa iglesianta#1Tim. 3.15. shumaq rikäyanki. Paymi iglesianta rantinanpaq kikinpa yawarninta jicharqan.

29<<Noqa musyämi aywakuskiptï mana alli yachatsikuqkuna mallaqashqa löbunö shayämunanpaq kanqanta. Paykunam mana allikunata yachatsikur Dios Yayaman creyikuqkunata engañayanqa. 30Tsaynöllam qamkunapitapis mana alli yachatsikuqkuna yurikar discïpulukunata#20.30 Discïpulukunapaq parlarqa Jesucristuman creyikuqkunapaqmi parlan. creyitsiyta munayanqa. 31Tsaynö kananpaq kaykaptinqa shumaq cuidakuyay. Yarpäyay kimsa wata paqasta junaqta jukniki juknikita waqaykur waqaykur yachatsiyanqaqta. 32[Wawqikuna,] kananmi llakipäkuq Dios Yayapa poderninman qamkunata dëjayaq. Paypa willakuyninmi poderyuq kaykan shumaq tantiyatsiyäshunaykipaq. Tsaynöpam llapan salvashqa kaqkunawan paqta herenciata#Col. 1.12; 3.24; Tito 3.7; Heb. 10.34; 1Ped. 1.4. chaskiyanki.

33<<Noqaqa manam pipa qellayninta, qorinta ni llatapantapis munapashkätsu. 34Musyayanqaykinöllam wananqäkunapaq y noqawan puriqkuna wanayanqankunapaqqa kikï arushkä. 35Tsaynöpam qamkunata yachatsiyashkaq noqanö arur faltäpukuqkunata yanapayänaykipaq. Señor Jesucristum nirqan: <Imata chaskir kushikunqantsikpitapis mas kushikuypaqmi pitapis yanapanqantsik> >>.

36Pablo tsaynö yachatsikuskirmi paykunawan qonqurikuykur Dios Yayata mañakurqan. 37Mañakuyta ushaskiptinmi llapan waqar payta abrazarkur mutsayarqan. 38<<Mananam rikäyämankinatsu>> niptinmi alläpa llakikuyarqan. Tsaypitam aywakunanpaq büqui kaykanqanyaq pushayarqan.

Currently Selected:

Hechos 20: qxn

Highlight

Compare

Copy