Hechos 21

Jerusalénman Pablo aywanqan

1Paykunapita despidikuskirmi Cos islayaq büquiwan aywayarqä. Waräninnam Rodas islayaq aywayarqä y tsaypitanam Pátara markayaq chäyarqä. 2Tsaychömi Feniciaman aywaq büquita tariyarqä. Tsay büquiwan aywarmi 3Chipre islapita itsuq kaqläpa päsayarqä. Tsaypita Siria provinciapa aywarmi Tiro markaman chäyarqä. Tsaychömi büquiwan apayanqan cargankunata dëjayarqan.

4Tsaychö discïpulukunata#21.4 Discïpulukunapaq parlarmi Jesucristuman creyikuqkunapaq parlan. tariskirmi qanchis junaq paykunawan quëdayarqä. Paykunam Espíritu Santu tantiyatsiptin Pabluta niyarqan Jerusalénman mana aywananpaq. 5Tsay markapita aywakuyaptïmi wawqikuna warminkunawan y wamrankunawan lamar kuchunyaq pushayämarqan. Tsaychömi qonqurikuykur Dios Yayata llapäkuna mañakuyarqä. 6Tsaypita despidikuskirmi büquiman lätayarqä. Paykunanam wajinkunapa kutikuyarqan.

7Tiro markapita aywakurmi Tolemaida markayaq chäyarqä. Tsaychö wawqikunawan y panikunawan tinkuskirmi paykunawan juk junaq qoyäyarqä. 8Waränin junaq yarquskirmi Cesareaman chaykur Dios Yayapa alli willakuyninta willakuq Felipipa wajinman patsakuyarqä. Paytam Jerusalénchö mikuyta aypunanpaq soqta wawqikunatawan ñawpata akrashqa kayarqan.#Hech. 6.5; 8.5. 9Felipipa chusku tsurin jipashkunam Dios Yayapa profetïsankuna kayarqan.

10Tsaychö atska junaqna kaykäyaptïmi Judea provinciapita Agabo shutiyuq profëta chämurqan.#Hech. 11.28. 11Noqakuna kaykäyanqäman shamurmi Pablupa wachukunta aptarkur makinta y chakinta watäkurqan. Tsaypitam nirqan: <<Espíritu Santum nin: <Kaynömi kay wachukupa ämunta Israel runakuna Jerusalénchö watarätsiyanqa. Tsaypitam mana Israel runakunaman entregayanqa> >>.

12Tsayta wiyaykurmi llapan wawqikuna y panikunawan Pabluta rugayarqä Jerusalénman mana aywananpaq. 13Pablunam niyämarqan: <<¿Imanirtan waqar llakikatsiyämanki? Señor Jesucristupa shutinchö willakunqäpita manam wataränällapaqtsu listu kaykä, sinöqa Jerusalénchö wañunäpaqpis listum kä>>.

14Imaykanöpa rugayaptïpis Pablo mana cäsuyämaptinmi rugayarqänatsu. Tsaymi niyarqä: <<Dios Yaya munaptinqa jina tsaynöchi kanqa>>.

15Tsaypitanam Jerusalénman aywayänäpaq alistakuyarqä. 16Cesareachö täkuq wakin discïpulukunam compañayämar Mnasónpa wajinman pushayämarqan. Mnasónqa Chipripitam karqan. Paymi unaypitana Jesúspa discïpulun karqan. Paypa wajinmanmi patsakuyarqä.

Santiaguta Pablo watukanqan

17Jerusalénman chaykuyaptïnam wawqikuna y panikuna kushishqa chaskiyämarqan. 18Waränin junaq Santiaguta watukaq Pabluwan aywarmi mayor wawqikunatapis qorikashqa kaykäyaqta tariyarqä. 19Paykunata saludaskirmi Pablo willakurqan mana Israel runakuna kaqchö willakuptin Dios Yaya imata ruranqanta.#21.19 Tsaynö willakurmi Pablo tantiyatsirqan Jesucristuman creyikuyänanpaq mana Israel runakunata Dios Yaya tantiyatsinqanta, runakunata kutikätsinqanta y supaykunata qarqunqanta.

20Tsayta wiyaykurmi Dios Yayata kushishqa agradëcikuyarqan. Tsaypitam Pabluta niyarqan: <<Wawqi Pablo, musyankim waranqanpa Israel runakunapis Jesucristuman creyikuykäyanqanta. Paykunam llapan nikäyan Moisés qellqanqan leykunata cäsunapaq kanqanta. 21Paykunatam runakuna niyan: <Pabluqa juklä markachö täkuq Israel majintsikkunatam yachaykätsin Moiséspa leyninkunata mana cumpliyänanpaq. Manam munantsu wamrankunata señalatsiyänanta ni costumbrintsikkunata cumpliyänantapis>. 22Kanan ¿imatatan rurashun? Chämunqaykita musyarmi [tsaytsika runakuna qorikäyanqa].

23<<Kananmi nishayki imata ruranaykipaq kanqanta. Kaychömi chuskuq runakuna Dios Yayata prometiyanqanta cumpliykäyan. 24Tsay runakunawan templuman aywar purificäkuyay. Aqtsankunata rutukuyänanpaq gastunkuna alistapay.#Núm. 6.13-21. Tsaynöpam llapan tantiyayanqa contrayki parlaqkuna manakaqkunata parlaykäyanqanta. Tsaynöllam tantiyayanqa qampis Moisés qellqanqan leykunata cumplinqaykita.

25<<Jesucristuman creyikuq mana Israel runakunamanqa unaynam cartakushkantsik. Tsay cartachömi nishkantsik [tsay leykunata mana cumplirpis] ïdulukunapa shutinchö pishtayanqan aytsata, wätapa yawarninta y kikillan wañushqa wätakunapa aytsanta mana mikuyänanpaq y fornicación jutsata mana rurayänanpaq>>.#Hech. 15.29.

26Tsaymi willanakuyanqannölla waränin alliq tsay chuskun wawqikunawan Pablo aywarqan. Waqtachö purificäkuskirmi templuman yaykur sacerdötikunata willarqan ofrendankunata churar Dios Yayata prometiyanqanta imay cumpliyänanpaq kanqanta.

Pabluta prësu achkuyanqan

27Qanchis junaqta cumpliykäyaptinmi Asia provinciapita shamuq Israel runakuna rikäyarqan templuchö Pablo kaykaqta. Tsaymi Pabluta aptakurkur 28jinchi qayaykachar niyarqan: <<¡Israel majikuna, yanapayämay! ¡Kay runam maytsay markakunapa purin contrantsik parlar! ¡Tsaynöllam mana allikunata yachatsikur leynintsikta y templuntsiktapis manakaqman churaykan! ¡Sagrädu templuntsikta mana respitarmi mana Israel runakunata yaykatsimushqa!#Eze. 44.7-9.>>

29(Tsaynö niyarqan Trófimutawan Pabluta cällichö puriykäyaqta rikashqa karmi. Trófimuqa Éfeso markapita mana Israel runam karqan.)#Hech. 20.4.

30Tsaynö niyaptinmi llapan runakuna alläpa rabyashqa cörrilla shamur Pabluta qarachashqa waqta patiuman jipiskir templupa ruri patiun punkunkunata wichqaskiyarqan. 31Tsaychömi Pabluta wañutsiyta munar maqayarqan. Roma soldädukunapa comandantin tsayta musyaykurmi 32capitankunata y soldädukunata pusharkur cörrilla aywayarqan Pabluta maqayanqan kaqman. Soldädunkunawan comandanti chaykaqta rikaskirmi Pabluta dëjaskiyarqan. 33Comandantinam Pabluta prësu achkutsir ishkay cadenawan watätsirqan. Tsaypitanam runakunata tapurqan: <<¿Pitan kay runa? ¿Imatatan rurashqa?>>

34Peru juknö juknö qayaykachar büllata rurayaptinmi ima päsanqantapis mana musyar Pabluta cuartelman apatsirqan. 35Qepanpa aywar runakuna maqayta munayaptinmi grädaman chaykatsir soldädukuna Pabluta wintuypa cuartelman lätatsiyarqan. 36Paykunatam atskaq runakuna qatir <<¡wañutsun!>> niyarqan.

Runakunapa puntanchö Pablo willakunqan

37Cuartelman yaykatsiyänanpaq kaykaptinnam comandantita Pablo nirqan: <<Taytay, juk rätulla parlarkushun>>.

Niptinmi Pabluta nirqan: <<¿Griego parlayta yachankiku? 38Qamqa ¿manaku Egipto runa kanki? ¿Manaku qam gobiernupa contran shäriq kanki? ¿Manaku chusku waranqa (4,000) wañutsikuq runakunata pushashqa desiertupa puriq kanki?>>

39Pablunam nirqan: <<Noqaqa Cilicia provinciapa capitalnin Tarso markachö yuriq Israel runam kä. Taytay, Israel majïkunawan juk rätulla parlaskinäpaq rugakulläshayki>>.

40Tsaynö rugakuptinmi comandanti änirqan. Tsaynam grädachö ichiykur runakuna upällayänanpaq makinwan Pablo sëñasta rurarqan. Llapan upällaskiyaptinmi hebreo idiömachö parlapar nirqan:

Currently Selected:

Hechos 21: qxn

Highlight

Compare

Copy