2 Pedro 2

Mana alli yachatsikuqkuna imanö kawayanqanta ninqan

Judas 3-16

1Israel nacionchö llulla profëtakuna ñawpata kayanqannömi qamkunachöpis llutan yachatsikuqkuna kayanqa. Paykunaqa Dios Yayapa willakuqnin tukurmi creyitsiyäshurniki manakaqkunata yachatsiyäshunki. Tsaynöllam salvakuq Señor Jesucristutapis nëgayanqa. Paykunatam día del juiciuchö Dios Yaya illaqpita ushakätsinqa.

2Paykuna yachatsiyanqanta chaskirmi atskaq ollqukuna y warmikunapis jutsata rurar kawayanqa. Tsaynö kawayaptinmi Dios Yayapa willakuynintapis manakaqman churayanqa. 3Qellaypaq ayrajashqa karmi alli tukurlla engañayäshunki. Paykunata infiernuman jitarpunanpaq unaypitanam Dios Yaya destinarqan. Tsaymi paykunata alläpa ñakay shuyaraykan.

4Jutsa ruraq angelkunatapis Dios Yaya manam perdonarqantsu, masbienmi infiernuman jitarpurqan. Tsay tutapaymanmi wichqarqan día del juiciuchö juzgananpaq.

5Noé kawanqan witsaypis jutsasapa runakunata manam perdonarqantsu. Tsay runakuna Dios Yaya munanqannö kawayänanpaq Noé willakuptinpis manam cäsuyarqantsu. Tsaymi apäkuy tamya diluviuwan Dios Yaya ushakätsirqan. Tsaynö ushakätsirpis Noétawan qanchis runakunallatam salvarqan.#Gén. 6.1-7; 8.18.

6Tsaynöllam Sodoma y Gomorra markakunatapis uchpayanqanyaq Dios Yaya rupatsirqan.#Gén. 19.24. Tsaynö rurarqan castigakuq kanqanta jutsasapa runakuna musyayänanpaqmi. 7Peru tsay markakunata rupatsirpis Lottam sïqa alli runa kaptin salvarqan. Paymi tsay markakunachö täkuq mana alli runakuna jutsata rurayaptin ni imanayta puëdirqantsu.#Gén. 19.1-16, 29. 8Paykuna kaqchö täkur jutsa rurayanqanta rikar y manakaqkunata parlayanqanta wiyarmi waran waran alläpa llakikurqan.

9Tsaynöpam musyantsik pay munanqannö kawaq kaqtaqa ima ñakaypitapis Dios Yaya salvamänapaq kanqanta. Peru jutsa ruraqkunatam sïqa día del juiciuchö mana llakipaypa castiganqa.

10Mana llakipaypam castiganqa uman achachashqa pïmaywanpis kakuqkunata. Tsay runakunam Dios Yayata cäsuyantsu. Yachayyuq tukurmi supaykunatapis mana mantsar ashayan. 11Ciëluchö kaykaq angelkunapis runakunapita mas poderyuq y Dios Yayapa puntanchö kaykarpis supaykunata manam ashayantsu.

12Tsay runakunam mana tantiyar tsaynö ashayan. Wätakunanö yarpayninnaq karmi wañutsishqa kayänanpaq yuriyashqa. Mana allita ruraykäyanqanllachömi ushakäyanqa. 13Wakin kaqta sufritsiyanqanpitam kikinkunapis sufriyanqa. Pïmay rikay manakaqkunata ruraykarpis mana penqakurmi asikachäyan. Mikuyänaykipaq qorikäyanqaykichöpis llutankunata parlarmi kushikuyan.

14Tsay runakunaqa warmikunata rikarmi munapaykäyan. Jutsata rurarpis manam ajayäyantsu. Manaraq shumaq tantiyaqkunatam llutankunata yachatsiyan. Runa majinta imaykanö engañaytam yachayan. Tsaynö kayanqanpitam mana llakipaypa castigashqa kayanqa.

15Dios Yaya munanqannö ñawpata kawashqa karpis kananqa llutankunata rurarmi kaykäyan. Beorpa tsurin Balaam qellay rayku mana allikunata ruranqannömi paykunapis mana allikunata ruraykäyan. 16Qellaypaq rayku Balaam aywaykaptinmi china ashnun parlarnin mana aywananpaq amatsarqan.#Núm. 22.4-35.

17Tsay runakunaqa pashtaq yaku tsakishqanö y wakpa kaypa aywaq tsaki pukutaynömi kayan. Paykunapaqqa alistashqanam kaykan alläpa tutapay [imayyaqpis] tsaychö wichqaräyänanpaq. 18Paykunaqa alabakurmi yachaq tukur imatapis parlayan. Jutsankunata tsayraq dëjashqa kaqkunatam llutankunata rurayänanpaq animatsiyan.

19Runakunatam prometiyan yachatsiyanqanta chaskir libri kawakuyänanpaq kanqanta. Tsaynö prometirpis kikinkunaqa manam libritsu kayan, sinöqa jutsapa poderninchömi kaykäyan. Ima viciupis runata dominaptinmi tsay viciupa poderninchöna kayan.#Juan 8.34; Rom. 6.6, 16.

20Salvamaqnintsik Señor Jesucristuta chaskishqa kaykar jutsa rurayllachö yapay kakurqa punta kanqanpitapis mas peormi tikran.#Mat. 12.45; Luc. 11.26. 21Diospa willakuyninta chaskishqa kaykar jutsa rurayman kutinan kaykarqa mejor ama tsay sagrädu willakuyninta chaskiyanmantsu karqan. 22Jutsa rurayman kutiqkunapaqmi rasunta niyan: <<Allquqa lanzanqantam yapay mikun. Kuchipis armaskatsiyaptin yapaymi qetächö qochpaskin>>.#Prov. 26.11.

Currently Selected:

2 Pedro 2: qxn

Highlight

Copy

Compare