2 Pedro 1
1
Apóstol Pedro saludakunqan
1Creyikuq majïkuna:
Noqa Simón Pedrum, Jesucristupa serviqnin apóstol kar, qamkunaman kay cartata cartakamü. Qamkunatapis Jesucristo kuyayäshurnikim noqakunatanö salvayäshushkanki. Paymi Diosnintsik y salvamaqnintsik. 2Qamkunapaqmi mañakü Dios Yayata y Señornintsik Jesucristuta reqiyaptiki llakipäyäshunaykipaq y waran waran alli kawayta qarayäshunaykipaq.
Dios Yaya munanqannö kawanapaq ninqan
3Payta reqishqam munanqannö kawanapaq Dios Yaya poderninwan tukuynöpa yanapamantsik. Llakipäkuq y alli ruraq karmi tsaynö kawanapaq qayamashkantsik. 4Tsaynöllam imayyaqpis yanapamänapaq änimashkantsik. Tsaynömi yanapamäshun jutsannaq kanqannölla noqantsikpis jutsa rurayta dëjaskir jutsannaqna kanapaq.
5Tsaynö kaykaptinqa Dios Yayaman imaypis creyikuyay. Payman creyikur allita rurayay. Allita rurar palabranta yachakuyay. 6Palabranta yachakur mana alli yarpayta venciyay. Mana alli yarpayta vencir wañuyanqaykiyaq cäsukuyay. Cäsukur Dios Yaya munanqannö imaypis kawakuyay. 7Dios Yaya munanqannö kawakur juk castanölla alli rikänakuyay Alli rikänakur pïmaywanpis kuyanakur kawakuyay.
8Waran waran tsaynö kawayaptikiqa Señornintsik Jesucristuta reqiyanqayki manam envänutsu kanqa. 9Tsaynö mana kawakurqa qapra rikayta mana puëdinqannömi Dios Yaya perdonayäshunqaykitapis qonqaskiyashkanki.
10Wawqikuna y panikuna, Dios Yaya qayayäshunqaykita y akrayäshunqaykita tantiyayänaykipaq imaykanöpis pay munanqannö kawakuyay. Tsaynö kawarqa manam jutsaman imaypis ishkiyankitsu. 11Tsaynöpam mandakuyninman chäyaptiki salvamaqnintsik Señor Jesucristo kushishqa chaskiyäshunki.
12Tsaymi unayna musyayaptikipis y Diospa willakuyninta shumaq yachakushqa kayaptikipis tsaykunataqa imaypis yarpätsiyäshayki. 13Kawanqäyaqqa tsaykunata imaypis yarpätsiyäshaykim. 14Wañunäpaqna kanqäta Señor Jesucristo musyatsimashqa kaptinmi 15qamkunata yarpätsiyaq wañukuptïpis yätsiyanqaqkunata imaypis yarpäyänaykipaq.
Jesucristo kutimunanpaq ninqan
16Señornintsik Jesucristo poderösu kanqanta y kutimunanpaq kanqanta manam yarpaylläpitatsu yachatsiyaq, masbien chipakyaqtaraq kikï rikashqa karmi yachatsiyaq. 17Chipakyaqman tikraskiptinmi Dios Yaya gloriapita nimurqan: <<Paymi kuyay Tsurï. Paypitam kushikü>>. 18Tsaynö nimunqantam kikï wiyashkä sagrädu jirkachö Jesucristuwan kaykar.#Mat. 17.1-5; Mar. 9.2-7; Luc. 9.28-35.
19Tsaymi masraq tantiyantsik profëtakuna willakuyanqan rasunpa kanqanta. Tsaynö kaykaptinqa profëtakuna qellqayanqankunata shumaq cäsukuyay. Tsaykunaqa tsakaychö aktsi atsikyanqannömi kaykan. Patsa waraptin waraq lucëru shonquykikunachö atsikyanqanyaq tsaynö cäsukuyay.#1.19 Waraq lucëru shonquykikunachö atsikyanqanyaq ninanqa Jesucristo kutimunqanyaq ninanmi.
20Shumaq tantiyakuyay. Ama yarpäyaytsu Dios Yayapa palabranta runakuna yarpayllanpita qellqayanqanta. 21Dios Yayapa profëtankuna manam imaypis kikinkunapa yarpayllanpitatsu qellqayarqan, sinöqa Espíritu Santu tantiyatsiptinmi Dios Yayapa yarpayninta qellqayarqan.#2Tim. 3.16.
Currently Selected:
2 Pedro 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
