2 Corintios 8

Ofrendata qoriyänanpaq ninqan

1Wawqikuna y panikuna, Macedoniachö wawqikunata y panikunata Dios Yaya llakipar imanö yanapanqanta willayäshayki. 2Paykunam alläpa ñakarpis y alläpa muchuychö karpis kushishqa maytsika ofrendata qoriyashqa. 3Kikïmi rikashkä ofrendata churayänanpaq kaqpita masta churayanqanta. Tsaynö churayashqa kikinkunapa voluntäninkunapitam. 4Paykunam yapay yapay rugayämashqa wakin markakunachö ofrendata qoriyanqannö Jerusalénchö creyikuq majintsikkunapaq paykunapis qoriyänanpaq.#Rom. 15.26. 5Ofrenda qorir yarpäyanqäpitapis mas atskatam qoriyashqa. Puntataqa Señor Jesucristupa poderninchö kawayänanpaqmi prometiyashqa. Tsaypitanam imata yätsiyanqätapis Dios Yaya munanqannö cumpliyänanpaq niyämashqa.

6Qamkunapis ofrendata qorir qallayänaykipaqmi Tito animatsiyäshushkanki. Tsaymi payta rugarqä qamkuna kaqman kutimur mas animatsiyäshunaykipaq. 7Dios Yaya allim yanapaykäyäshunki payman creyikuyänaykipaq, shumaq parlayänaykipaq, alli yachayyuq kayänaykipaq, yanapakuq kayänaykipaq y yachatsiyanqaqnö pïmaytapis kuyayänaykipaq. Tsaynölla atska ofrendata qoriyänaykipaqpis Dios Yaya yanapaykuyäshunki.

8Wakinkuna kushishqa qoriyanqanta niyaq manam obligayarnikitsu, sinöqa kuyapäkuq kayanqaykita pïmaypis musyananpaqmi. 9Qamkunam musyayanki Señor Jesucristupis llakipäkuq kanqanta. Paymi gloriachö rïcu kayninta dëjaskir kay patsaman shamur waktsanölla karqan. Tsaynö karqan qamkunapis gloriaman char Dios Yayapa puntanchö rïcu kayänaykipaqmi.

10Kanan yätsiyanqaqta chaskiyay: Qanyan wata ofrendata qorir qallashqana kaykarqa 11kayäpushunqaykiman qorir sïguiyay. 12Llapan shonquykikunawan kushishqa qoriyaptikim ofrendaykikunata Dios Yaya chaskiyäshunki. Peru kayäpushunqaykillapita churayay. Churayanqayki ofrenda wallkalla kaptinpis ama llakikuyaytsu.

13Manam waktsayäyänaykita munartsu tsaynö niyaq, sinöqa llapantsikpis yanapanakunata munarmi. 14Jerusalénchö creyikuq majintsikkuna kanan faltapukuyaptinpis qamkunapaqa kanraqmi. Qamkuna muchuychö kayaptikim paykunapis yanapayäshunki. Juknin jukninwan yanapanakurqa manam faltapukushuntsu. 15Dios Yayapa palabranmi nin:

<<Atskata qoriyaptinpis manam sobrarqantsu.

Wallkallata qoriyaptinpis manam pishirqantsu>>.#Éxo. 16.18.

Yanapaqninkunawan Corintuman Tito aywayänanpaq ninqan

16Titupis noqanölla qamkunapaq yarpaptinmi Dios Yayata agradëcikü. 17Tsaymi qamkuna kaqman kutimunanpaq niptï kushishqa änimashqa. Qamkunawan kayta munarmi manaraq niptïpis shamuyta munaykan. 18Tituwanmi juk wawqitapis kachamü. Dios Yayapa willakuyninta alli willakuq kaptinmi kaychö kaq llapan wawqikuna y panikuna alli wawqi kanqanta niyan. 19Tsaymi Jerusalénman ofrendata apayaptï yanapayämänanpaq payta akrayashqa. Ofrendata chätsiyaptïnam yanapakuq kanqantsikta tantiyar Dios Yayata alabayanqa. 20Atska ofrendata chätsiyänäpaq yanapayämaptinmi pipis llutanta parlaykanqatsu. 21Dios Yayapa puntanchöpis y runakunapa puntanchöpis allillatam rurayta munä.

22Tituwanmi mas juk wawqitapis kachamü. Paypis Dios Yaya munanqannö kawakuq wawqim. Alli chaskiyänaykipaq kanqanta musyarmi paypis yanapayäshunaykipaq kushishqa shamuykan.

23Tito pï kanqanta tapuyäshuptiki noqawan willakur puriq kanqanta willayanki. Manam noqallata yanapamänanpaqtsu tsaynö purin, sinöqa qamkunatapis yanapayäshunaykipaqmi. Tsaynöllam paywan shamuq ishkay wawqikunapaq tapuyäshuptiki willayanki kaychö wawqikuna y panikuna paykunata kachayämunqanta y Cristo munanqannö alli kawakuyanqanta. 24Qamkuna kaqman chäyämuptin paykunata shumaq chaskiykuyanki. Tsaynöpam maytsaychöpis wawqikuna y panikuna musyayanqa ninqänölla llakipäkuq kayanqaykita.

Currently Selected:

2 Corintios 8: qxn

Highlight

Copy

Compare