2 Corintios 3

Corinto wawqikuna y panikuna recomendación cartanö kayanqan

1Tsaynö niptï chaskiyämänayki rayku parlayanqäta ama yarpäyaytsu. Tsaynölla chaskiyämänaykipaq recomendación cartataraq wanayanqäta ama yarpäyaytsu. Wakin runakuna recomendación cartata puritsiyaptinpis qamkuna chaskiyämänaykipaqqa manam wanayätsu. Tsaynöllam juk markaman chäyaptï chaskiyämänanpaq qamkunapita recomendación cartata wanayätsu. 2Tsaypa rantinmi kikikikuna shonqükunachö qellqashqa recomendación cartä kayanki. Tsay cartatam pïmaypis liyiyan.#3.2 Tsaynö nirmi Pablo nirqan: Recomendación cartä mana kaptinpis willakuyanqäpita Jesucristuman creyikuyanqaykita musyarmi apóstol kanqäta pïmaypis musyayan. 3Tsaynöpam runakuna musyayan willakuyanqäta chaskir Jesucristo qellqanqan carta kayanqaykita. Tsay cartataqa manam tintawantsu qellqashqa, sinöqa imayyaqpis kawaq Dios Yayapa Espïritunwanmi. Tsaynöllam parara rumichötsu#Éxo. 24.12. qellqashqa, sinöqa shonquykikunachömi.#Jer. 31.33; Eze. 11.19; 36.26.

4Tsaynö kayanqaykitam musyayä Jesucristo salvayämanqanpita Dios Yayaman creyikur. 5Willakuyänäpaq manam yachayyuq kayanqämantsu confiakuyä, sinöqa Dios Yayamanmi. 6Paymi yanapayäman mushuq pactupaq#Jer. 31.31. willakuyänäpaq. Tsay mushuq pactuqa manam leykunapa poderninchö kawanapaqtsu nimantsik, sinöqa Espíritu Santu tantiyatsimanqantsiknö kawanapaqmi. Leykunapa poderninchö kawarqa wañushqanömi kawantsik.#Rom. 7.1-6. Peru Espíritu Santupa poderninchö kawarmi sïqa mana ushakaq kawayta tarintsik.

Moisés qellqanqan leykunapita Jesucristupa willakuynin mas alli kanqan

7Parara rumichö qellqashqa leykuna runakunata salvananpaq mana kaykaptinpis tsay leykunata Israel runakunaman Moisés chätsiptinmi qaqllan alläpa chipakyarqan. Tsay chipakyanqan ushakaqlla karpis alläpam chipakyarqan.#Éxo. 34.29. Tsaymi Moiséspa qaqllanta rikayta puëdiyarqantsu. 8Moisés apamunqan leykunapis tsaynö kushikuypaq kaykaptinqa ¿manaku Espíritu Santu apamunqan willakuy mas kushikuypaq kaykan? 9Mana salvakänapaq kaykarpis tsay leykuna alli kaykaptinqa salvamänapaq kaq willakuy mas allim kaykan. 10Tsay leykunaqa Espíritu Santu apamunqan willakuyman manam iwalantsu. 11Tsaymi ushakänanpaq kaq leykuna kushikuypaq kaptinpis Jesucristupa mana ushakaq willakuynin mas kushikuypaq kaykan.

12Tsayta musyarmi mana mantsakur willakuyä. 13Manam Moisésnötsu Diospa willakuyninta willakuyä. Payqa qaqllan chipakyanqan ushakaykanqanta Israel runakuna mana rikäyänanpaqmi vëluwan tsapakurqan.#Éxo. 34.33. Tsaynöpam leykuna ushakänanpaq kanqanta tantiyayarqantsu.

14Moiséspa qaqllan tsapakunqannömi Israel runakunapa yarpayninkunapis tsapashqanö kaykan. Tsaymi punta kaq pactuta liyir päsaqlla kanqanta kananyaqpis tantiyayantsu. Jesucristuman creyikurraqmi shumaq tantiyayanqa. 15Moisés qellqanqan leykunata liyirpis manam kananyaqpis tantiyayantsu. 16Peru Señornintsikman creyikurmi sïqa tantiyayanqana.

17Señornintsikqa Espíritu Santum. Paypa Espïritunta chaskirmi librina kantsik. 18Librina karmi Señornintsikta rikaqnö kaykantsik. Tsaymi runakuna rikämarnintsik kikin Señornintsikta rikaqnö kaykäyan. Tsaynöllam Señornintsikqa Espíritu kar waran waran yanapamantsik kikin kanqannö noqantsikpis kanapaq.#Rom. 8.29; Gál. 4.19; Fil. 3.10.

Currently Selected:

2 Corintios 3: qxn

Highlight

Copy

Compare