2 Corintios 2
2
1Ñawpata qamkuna kaqman shamur llakikatsiyanqaqnö yapay llakikatsiyaynikita manam munätsu. 2Qamkunata llakikatsiyaptiqqa ¿piraq kushikatsimanqa? 3Tsaymi shamunqäpa rantin cartallata cartakamushkä. Manam munashkätsu shamuptï llakikatsiyämänaykita, sinöqa llapantsikpis kushikunatam munashkä. Musyarqämi qamkuna kushikuyaptiki noqakunapis kushikuyänäpaq kanqanta.
4Tsay cartata qellqamur jaqayashqalla kaykäyanqaykita yarparmi alläpa yarpachakur waqarqä. Manam llakikuyänaykipaqtsu cartakamurqä, sinöqa qamkunata alläpa kuyayanqaqta musyayänaykipaqmi.
Contran runata Pablo perdonanqan
5Conträ runaqa manam noqallatatsu llakikatsimashqa, sinöqa qamkunatapis llakikatsiyäshushkankim. 6Tsay runata corrigiyanqayki allim. 7Alläpa mana llakikunanpaq perdonar animatsiyay. 8Tsaymi qamkunata rugayaq payta llakipar alli rikäyänaykipaq.
9Tsay cartatam qamkunaman cartakamurqä tsay runata corrigiyänaykipaq. Tsaynöpam musyayta munarqä cäsuyämanqaykita o mana cäsuyämanqaykita. 10Tsay perdonayanqayki runatam noqapis perdonä. Imallapis perdonanäpaq kaptinqa Jesucristupa puntanchömi qamkuna rayku payta perdonashkä. 11Musyantsikmi Satanás imaykanöpapis runakunata chikinakatsinqanta. Tsaymi tsay runata perdonashqa jaqayätsinakuyman Satanás jitarpamäshunnatsu.
Troaschö Pablo llakikunqan
12Troas markaman Jesucristupa alli willakuyninta willakuq chaptï manam ni ima tsapapis kashqatsu. 13Tsaynö kaptinpis qamkuna kaqpita Tito mana musyakämuptinmi alläpa llakikurqä. Tsaymi Troaschö quëdanqäpa rantin Tituta ashiq#2.13 Pabluwan tinkuskir Tito willakunqanta musyanaykipaq liyinki 2Cor. 7.6-15. Macedonia provinciaman aywarqä.#Hech. 20.1.
Dios Yayata Pablo agradëcikunqan
14¡Dios Yayatam agradëcikü! Paymi Jesucristuchö kayaptï imaypis yanapayäman. Tsaymi willakuyaptï maytsaychöpis runakunata tantiyatsin Jesucristuman creyikur payta reqiyänanpaq. 15Jesucristupa willakuyninta willakuyanqäqa inciensiupa alli mushkuyninnömi Dios Yayapaq kaykan. Salvakäyänanpaq kaqkunaman y mana salvakäyänanpaq kaqkunamanmi chaykan. 16Mana salvakaqkunapaqqa melanaypaq asyaqnömi kaykan. Peru salvakaqkunapaqmi sïqa kuyakuypaq mushkuynö kaykan. Tsaynö kaptinqa ¿piraq kikillanpita Jesucristupa willakuyninta willakunman?
17Wakinqa imatapis chaskiyänan raykullam Diospa willakuyninta willakuykäyan. Noqakunaqa manam paykunanötsu kayä, sinöqa Dios Yaya mandayämashqa kaptin y noqakunawan pay kaykanqanta musyarmi Jesucristupa shutinchö llapan shonqükunawan willakuyä.
Currently Selected:
2 Corintios 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.