1 Tesalonicenses 4

Dios Yaya munanqannö kawakunapaq yätsikuy

1Wawqikuna y panikuna, Señor Jesucristupa shutinchömi rugayaq qamkunata yachatsiyanqaqnölla Dios Yaya munanqannö imaypis kawakuyänaykipaq. Pay munanqannö kawakuyanqaykita musyarpis waran waran sïguiyänaykipaqmi animaykätsiyaq.

2Musyayankim Señor Jesucristupa willakuqnin kar imata yachatsiyanqaqtapis. 3Dios Yayaqa jutsannaq kawakuyänaykita munarmi fornicación jutsata rurayänaykita munantsu, 4sinöqa majaykikunawan respitanakur shumaq kawakuyänaykitam munan. 5Tsaynöllam munantsu Jesucristuta mana chaskiqkunanö llutankunata rurar jukwan jukwan purikuyänaykita. 6Tsaynö kaptinqa ama mayqaykikunapis jukpa warminwan kakuyaytsu. Tsaynö kakurqa runa majikitam engañaykanki. Willayashkaqnam tsaynö kaqkunata Señor Jesucristo mana llakipaypa castigananpaq kanqanta.

7Dios Yayaqa manam jutsata rurar purinapaqtsu akramashkantsik, sinöqa pay munanqannö kawakunapaqmi. 8Kay yachatsiyanqaqkunata pipis mana chaskirqa manam noqakunatatsu manakaqman churayäman, sinöqa Espíritu Santuta qaramaqnintsik Dios Yayatam.

9Juknin jukninwan kuyanakur shumaq kawakuyänaykipaqmi Dios Yaya tantiyatsiyäshushkanki. Tsaymi wanayankitsu kuyanakur kawakuyänaykipaq tantiyatsiyänaqtaqa. 10Macedonia provinciachö täkuq llapan wawqikunawan y panikunawanmi shumaq kuyanakuykäyanki. Peru tsaynö kaptinpis qamkunatam animatsiyaq masraq kuyanakuyänaykipaq.

11Piwanpis mana piñakur shumaq kawakuyay. Runa majiki imanö kawakunqantapis ama rikapäyaytsu. Tsaypa rantinqa yätsiyanqaqnölla ima aruyllachöpis aruyay. 12Tsaynö aruyaptikim imaykikunapis faltäyäshunkitsu y Jesucristuman mana creyikuqkunapis respitayäshunki.

Señor Jesucristo kutimunanpaq ninqan

13Wawqikuna y panikuna, wañurpis kawamunapaq kanqanta musyayänaykitam munä. Wakinmi wañuskir pamparäyanqallanchö ushakäyänanpaq kanqanta yarpar alläpa llakikuyan. Noqantsikqa paykunanö ama llakikushuntsu. 14Musyantsikmi wañunqanpita Jesucristuta Dios Yaya kawatsimunqanta. Jesucristuta kawatsimunqannöllam payman creyikuqkunatapis Dios Yaya kawatsimur Jesucristuwan qorikätsinqa.

15Tsaymi Jesucristo yachatsikunqannö noqapis qamkunata niyaq: Mayqantsikpis Jesucristo kutimunqan junaqyaq kawarqa manam wañushqakunapita mas puntatatsu paywan tinkuq aywashun. 16Ciëlupita Jesucristo kutimuptinmi mandakuq ángel jinchi qayakamunqan y Dios Yayapa cornëtanta töcamunqanpis wiyakämunqa. Tsay höram Jesucristuman creyikuykar wañuqkunaqa puntata kawayämunqa. 17Tsaypitanam kawaq kaqkunatapis qorimäshun. Pukutay jananchö Señor Jesucristuwan llapantsik tinkurmi paywan paqta imayyaqpis kawakushun.#Mat. 24.30-31; Mar. 13.26-27; 1Cor. 15.51-52. 18Tsaymi kay yachatsiyanqaqkunata yarpätsinakur juknin jukninwanpis animatsinakuyay.

Currently Selected:

1 Tesalonicenses 4: qxn

Highlight

Copy

Compare