1 Tesalonicenses 5

1Wawqikuna y panikuna, Señor Jesucristo imay höra ni imay junaq kutimunanpaq kanqanta mana musyarmi tsaypaqqa qellqamütsu. 2Peru musyayankim paqaspa illaqpita suwa shamuqnö paypis illaqpita kutimunanpaq kanqanta.#Mat. 24.43; Luc. 12.39; 2Ped. 3.10. 3Imapis mana päsananpaq kanqanta runakuna niyaptinpis qeshyaq warmita illaqpita nanay tsarinqannömi Dios Yayapa castïgun illaqpita shamunqa.#Isa. 13.8. Paypa castïgunpitaqa manam ni pipis qeshpinqatsu.

4-5Peru wawqikuna y panikuna, qamkunaqa manam tutapaychönötsu kawaykäyanki Jesucristo suwanö illaqpita kutimur mana alistakushqata tariyäshunaykipaq. Qamkunaqa llapaykim aktsichönö kawakuykäyanki. 6Tsaymi wakin runakuna puñukashqa kayanqannöqa ama kashuntsu, sinöqa rikchaq rikchaqlla Jesucristuta shuyaykäshun.

7Tutapäpukushqanö kaykaqkunaqa puñukashqanö y machashqanö karmi Jesucristo kutimunanpaq kanqanta tantiyayantsu. 8Peru noqantsikqa atsikyaychöna kar shumaq tantiyakushun, Dios Yayaman creyikushun y piwanpis kuyanakushun. Tsaynö kawakurqa chalëcuntsik shukushqanömi kaykantsik. Dios Yaya salvamanqantsikta shumaq tantiyarmi cascushqanö kaykantsik.#Isa. 59.17; Rom. 13.12; Efe. 6.13-17.

9Dios Yayaqa manam castigashqa kanapaqtsu akramashkantsik, sinöqa Jesucristuman creyikur salvashqa kanapaqmi. 10Jesucristum noqantsik rayku wañurqan kawaykarpis o wañukurpis paywan paqta kawanapaq. 11Tsaymi imaypis animatsinakuyanqaykinölla juknin jukninwanpis tantiyatsinakur animatsinakuyay.

Wawqikuna y panikuna imanö kawayänanpaq yätsinqan

12Wawqikuna y panikuna, Señor Jesucristupa alli willakuyninta yachatsishuqnikikunata alli rikäyay. Paykunam shumaq yachatsiyäshurniki animatsiyäshunki Dios Yaya munanqannö kawakuyänaykipaq. 13Tsaynö yachatsiyäshunqaykipita paykunata respitarnin shumaq kuyayay. Tsaynölla mana chikinakur juknin jukninwanpis shumaq kawakuyay.

14Wawqikuna y panikuna, qamkunatam rugayaq: Arukuy mana munaqkunata arukuyänanpaq yätsiyay. Llakishqa kaykaqkunata kushikuyänanpaq animatsiyay. Yanapaypaq kaqkunata imallawanpis yanapayay. Pïmaypaq pacienciaykikuna katsun. 15Runa majikikuna contrayki kayaptinpis ama qamkunaqa contran kayaytsu. Masbien creyikuq majikikunawan y pïmaywanpis shumaq kawakuyay.

16Imaypis kushishqa kawakuyay.#Fil. 4.4. 17Imay hörapis Dios Yayata mañakuyay. 18Imaykapitapis Dios Yayata agradëcikuyay. Jesucristupa poderninchö kayaptikim tsaynö kawakuyänaykita Dios Yaya munan.#Fil. 4.6; Col. 4.2-7.

19Espíritu Santuta cäsuyanki. 20Espíritu Santu tantiyatsinqanta pipis willakuptin ama manakaqman churayankitsu. 21Peru shumaq tantiyayanki Espíritu Santupita kanqanta o mana kanqantapis.#Hech. 17.11; 1Juan 4.1-3; Gál. 1.6-9; Mat. 7.15-20. Paypita kaptinqa cäsukuyanki. 22Mana allikunataqa ama rurayankitsu.

23Alli kawayta qaramaqnintsik Dios Yaya yanapaykuyälläshuy pay munanqannö imaypis kawakuyänaykipaq. Tsaynölla cuerpuykikunata, almaykikunata y espïrituykikunatapis cuidaykullätsun Jesucristo kutimur jutsannaqta tariyäshunaykipaq. 24Qayayäshuqniki Dios Yayam prometinqankunata imaypis cumplin. Tsaymi jutsannaqta tariyäshunaykipaq imaypis yanapayäshunki.

Cartapa ushanan

25Wawqikuna y panikuna, noqakunapaqpis Dios Yayata mañakuykuyällay. 26Wawqikunata y panikunata qaqllanchö mutsar saludaykuyällay. 27Señor Jesucristupa shutinchömi niyaq wawqikunata y panikunata kay cartata liyipuyänaykipaq.

28Señornintsik Jesucristo llakipäyäshurniki imaypis yanapaykuyälläshuy. [Amén.]

Currently Selected:

1 Tesalonicenses 5: qxn

Highlight

Copy

Compare