1 Pedro 5

Mayor wawqikunapaq ninqan

1 Mayor wawqikuna, noqapis qamkunanö mayor wawqim kä. Jesucristo ñakanqankunatam rikashkä. Jesucristo kutimurmi llapantsiktapis qorikamäshun. Tsaymi yätsiyaq: 2Dios Yayaman creyikuqkunata rikäyänaykipaq churashqa kaykarqa mitsikuq runa üshankunata cuidanqannö shumaq cuidayay.#Juan 21.15-17. Ama qeläkuykarqa cuidayanqaykitsu, sinöqa llapan voluntänikikunawan cuidayay. Ama qellayllapaq ayrajarqa cuidayankitsu, sinöqa Dios Yaya munanqannö kushishqa cuidayanki.

3Yaqa patronnöqa creyikuq majikikunata ama sufritsiyankitsu, sinöqa alli ejemplu kayänaykipaq allillata rurar kawakuyay. 4Tsaynö kawarmi mas mandakuq kaq mitsimaqnintsik Jesucristo#Heb. 13.20. kutimuptin imayyaqpis mana ushakaq corönata chaskiyanki.

Dios Yayapa poderninchö kawakunapaq ninqan

5Jövinkuna, mayor wawqikunata cäsukuyay. Llapaykipis qollmi shonquykikunawan respitanakuyay. Yachaq tukuqkunataqa Dios Yaya manam yanapantsu. Peru qollmi shonqu kaqkunatam sïqa llakipar yanapan.#Prov. 3.34; Stg. 4.6. 6Tsaynö kaykaptinqa poderösu Dios Yayata cäsur mana yachaq tukurlla kawakuyay. Paymi dispöninqan höra chämuptin respitashqa kayänaykipaq churayäshunki.#Mat. 23.12; Luc. 14.11; 18.14; Stg. 4.10. 7Dios Yaya yanapaykäyäshuptikiqa imayka llakikuynikikunata paypa poderninman churaykuyay.#Sal. 55.22; Mat. 6.25-34.

8Alli tantiyakurnin wiyaq wiyaq kawakuyay. Chikimaqnintsik diabluqa imayka mallaqashqa leonnömi pitapis jutsata ruratsinanpaq qayaraykachar puriykan. 9Creyikuq majintsikkuna maytsaychöpis qamkunanö sufriyanqanta musyaykarqa firmi creyikuynikikunawan diabluta ama cäsuyaytsu.

10Noqantsik rayku Jesucristo wañushqa kaptinmi kuyakuq Dios Yaya qayamashkantsik gloriachö imayyaqpis kawakunapaq. Tsaymi kay patsachö ñakashqapis Dios Yaya yanapamäshun jutsaman mana ishkir pay munanqannö kawar firmi creyikunapaq. 11¡Dios Yaya poderösu kanqanpita imayyaqpis alabashqa kaykullätsun! Amén.

Cartapa ushanan

12Dios Yayaman alli creyikuq wawqintsik Silvanuwanmi#Hech. 15.22, 40. kay cartata qellqayämü. Kay cartächömi qamkunapaq qellqayämü Dios Yaya llakipäyäshunqaykita tantiyayänaykipaq. Imaypis payman firmi creyikuyay.

13Babiloniachö#5.13 Tsay witsaymi Jesucristuman creyikuqkuna Romapaq Babilonia niyarqan. Tsaypaq masta musyanaykipaq liyinki Apoc. 14.8; 16.19; 17.5; 18.2, 10, 21. creyikuq panintsikkunam saludayämushunki. Paykunatapis qamkunatanöllam Dios Yaya akrashqa. Tsaynöllam kuyay tsurïnö Marcuspis#Hech. 12.12, 25; 13.13; 15.37-39; Col. 4.10; Film. 24. saludayämushunki.

14Juknin jukninwan qaqllaykikunachö mutsanakur saludanakuykuyay. Jesucristuchö kaqkuna alli päsakuychö kaykuyällay. [Amén.]

Currently Selected:

1 Pedro 5: qxn

Highlight

Copy

Compare