KULAVA 27
27
Omu navalomba vana vaZelofwehate vamapwevo
1Kaha vana vaZelofwehate vamapwevo vapandamineko, ou Zelofwehate mwanaHefwele, mwanaNgileyate, mwanaMakile, mwanaManase, ikiye wakujitanga jaManase mwanaYosefwe. Awa akiko majina avana venyi vamapwevo, ou Mala, ou Nowa, ou Hongola, ou Milika, ou Ciliza.
2Vemanyine kumeso aMose nakumeso akapilixitu Eleyaza nakumeso avaka-kulitulaho nalizavu lyosena, kucikolo cambalaka yakuliwanyina, Vambile ngwavo,
3Setu afwile mupambo, oloze kapwile kulizavu lyavaze vawungililile Yehova kulizavu lyaKolako. Afwile naxili yenyivene, kaha kapwile navana vamalungako.
4Lijina lyasetu vakalifumixile ika kucisaka cenyi hakuzeneka mwana walunga? Aci tuhane luheto muli vausoko wetu.
5Kaha Mose ambulwile lizu lyavo kuli Yehova.
6Yehova ambile kuli Mose ngwenyi,
7Vana vaZelofwehate vanahanjika kanawa. Kuvahana ukavahana luheto lwauswana muli vausoko wasevo. Uswana wasevo ukavaswanyisawo.
8Kaha hanjika kuli vana vaIsalele ngwove, Kaci nge lunga mwafwa cakuzeneka mwana walunga, mukaswanyisa mwanenyi wapwevo uswana wenyi.
9Kaci nge kexi namwana wapwevoko, mukahana uswana wenyi kuli vandumbwenyi vamalunga.
10Kaci nge kexi navandumbwenyiko, mukahana uswana wenyi kuli vandumbwaise.
11Kaci nge ise kexi navandumbwenyi vamalungako, mukahana uswana wenyi kuli kausoko wenyi wakumupandama wakucisaka cenyi. Ikiye akauhete. Cipwenga cilika caciyulo kuli vana vaIsalele, nge omu valwezele Mose kuli Yehova.
Mose mwamutongola Yoxuwa ngwenyi, Axise muli ami
12Yehova ambile kuli Mose ngwenyi, Kanduka hapili eyi Avalime, utale lifuci lize ngunahane kuli vana vaIsalele.
13Kahomu naulinga hiunalimono lyehi nangukutwala nayove nawa kuli vausoko wove, nge omu ngwatwalile yayove Alone.
14 #
20.12. Mwomwo mwalikangile kulizu lyami mupambo Jine, mukukokojwesa calizavu, mwazenekele kungujilika kumeya kumeso avo. (Aze akiko meya aMeliva, akuKatexe mupambo Jine).
15Mose ahanjikile kuli Yehova ngwenyi,
16Yehova Kalunga kajixipilitu javatu vosena atongole lunga halizavu,
17ou mwalovoka kumeso avo nakwingila kumeso avo, Hakuvalovola nakuvengisa, mangana lizavu lyaYehova lizeneke kupwa nge mikoko vakuzeneka kafunga.
18Yehova ambile kuli Mose ngwenyi, Sakula Yoxuwa mwanaNune, ikiye lunga mwatwama Xipilitu, umunangike livoko lyove,
19umwimike kumeso akapilixitu Eleyaza nakumeso alizavu lyosena, umuhane luximbi kumeso avo.
20Kaha umuhaka kulufuma lwove, mangana lizavu lyavana vaIsalele lyosena likononokenga.
21Akemanenga kumeso akapilixitu Eleyaza, ou mwakamwihwilanga hakuyula #Kulo. 28.30.caUlime kumeso aYehova. Hakuvalweza kuli ikiye vakalovoke, kaha hakuvalweza kuli ikiye vakengile, naikiye navana vaIsalele hamwe, lizavu lyosena.
22Mose alingile nge omu vamulwezele kuli Yehova. Ayile naYoxuwa, amwimikile kumeso akapilixitu Eleyaza nakumeso alizavu lyosena.
23Kaha amunangikile mavoko enyi, amuhanyine luximbi, nge omu ahanjikile Yehova muli Mose.
Currently Selected:
KULAVA 27: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
