VYAVALEVI 27
27
Jiximbi jakuvulukevi navamujilikila Yehova
1Yehova ahanjikile kuli Mose ngwenyi,
2Hanjika kuli vana vaIsalele uvambulile ngwove, Omu mwahandununa mutu cuma naxiki, vatu vapwenga yaYehova nganomu nawesekela.
3Kaha lunga, kufumisa kumyaka makumi avali palanga nakumyaka makumi atanu nalimwe, umweseka #27.3: Tala 5.15.mujixekele japalata makumi atanu, nge kutesa naxekele yakuzuvo yajila.
4Kaci nge napu pwevo, umweseka mujixekele makumi atatu.
5Kaci nge napu wamyaka yitanu palanga nakumakumi avali, lunga umweseka mujixekele makumi avali, kaha pwevo umweseka mujixekele likumi.
6Kaci nge napu wakakweji umwe palanga nakumyaka yitanu, lunga umweseka mujixekele japalata jitanu, kaha pwevo umweseka mujixekele japalata jitatu.
7Kaci nge napu wamyaka makumi atanu nalimwe nakusambula, kaci nge napu lunga, kaha umweseka mujixekele likumi najitanu, napwevo mujixekele likumi.
8Oloze kaci nge vikumba vyenyi kavyata omu unesekelako, kaha vamwimike kumeso akapilixitu. Kapilixitu amweseke, nganomu nahaxila uze axikile, ngoco munavamwesekela kuli kapilixitu.
9Kaci nge napu kanyama, ou veji kuhananga vatu wana kuli Yehova, wose wangacize mwahana mutu kuli Yehova mwapwa wajila.
10Kanda akamwalumunako, kaha kanda akamutambasanako, wamwaza nawamupi, cipwe wamupi nawamwaza. Kaci nge kutambasana mwatambasana kanyama nakanyama, kaha nayou nayauze nawa natambasana nenyi navapwa vajila.
11Kaci nge napu kanyama wamupi, ou vahona vatu kuhana wana kuli Yehova, kaha emike kanyama kana kumeso akapilixitu.
12Kapilixitu amweseke numba nge wamwaza nyi wamupi. Nganomu naumwesekelove kapilixitu, ngoco mumwapwa.
13Oloze kaci nge kumusokola mwamusokola, kaha ahakileko cimbwa cimwe cakusokesa muvimbwa vitanu vyamwomwo unesekela.
14Omu mwajilika mutu zuvo yenyi mangana yijilile Yehova, kaha kapilixitu ayeseke, numba nge yamwaza nyi yayipi. Nganomu mwayesekela kapilixitu, ngoco munayimana.
15Kaci nge ou nayijilika mwasokola zuvo yenyi, kaha ahakileko cimbwa cajimbongo cimwe cakusokesa muvimbwa vyamwomwo unesekela vitanu, kaha nayipwa yenyi.
16Kaci nge mutu mwajilikila cimbwa camavu aluheto lwenyi kuli Yehova, kaha weseka nganomu veji kukuvilangamo. Kukuva homele yambale yimwe, hikuceseka mujixekele japalata makumi atanu.
17Kaci nge mwajilika mavu enyi kufumisa kumwaka wayovele, kaha emane nganomu unesekela.
18Oloze kaci nge mwajilika mavu enyi omu unahici lyehi mwaka wayovele, kaha kapilixitu amwesekele jimbongo nge kutesa namyaka yinalihonoho nakuheta kumwaka wayovele, kaha atepululekomu unesekela.
19Kaci nge ou najilika mavu mwawasokola cakuwasokola, kaha ahakileko cimbwa cajimbongo cimwe cakusokesa muvimbwa vyamwomwo unesekela vitanu, kaha navawazamixila kuli ikiye.
20Kaci nge kexi kusokola mavu azeko, mokomoko nge nalande lyehi mavu aze namutu weka, kanda vakawasokola cekako.
21Oloze mavu kana, hakulovoka cawo hayovele, akapwe ajilila Yehova, nge mavu akutengulula. Vakawahete kuli kapilixitu.
22Kaci nge mwajilikila mavu kuli Yehova, awa nalande kuli mutu weka, awa akuzeneka kupwa akumavu aluheto lwenyi,
23kaha kapilixitu amwesekele ndando nganomu unesekela nakuheta mumwaka wayovele. Halikumbi lize akahane nge omu unesekela, hicuma cajilila Yehova.
24Hamwaka wayovele, mavu kana akakinduluke kuli uze awalanjile, kuli uze vene aheta mavu kana.
25Kweseka cove cosena cipwe nge kutesa naxekele yakuzuvo yajila. Xekele yipwenga jingela makumi avali.
26Xina kuli tunyama, twatwou vanalingisa kupwa twatwa yaYehova, cipwe mutu umwe kanda akamujilikako. Cipwe napu ngombe, cipwe mukoko, ikiye waYehova.
27Kaci nge napu kanyama wamupi, amusokole nge omu nawesekela, kaha ahakileko cimbwa cimwe cakusokesa muvimbwa vitanu. Mokomoko, kaci nge kexi kumusokolako, vamulande nganomu nawesekela.
28Cipwe ngoco cexoco cuma cakutengulula mwatengulwila mutu kuli Yehova kuvyuma vyosena ali navyo, cipwe mutu, cipwe kanyama, cipwe kumavu aluheto lwenyi, kanda akalanda cipwe cimweko, kaha kanda akacisokolako. Vyuma vyosena vyakutengulwila kuli Yehova vinapu vyajilila Yehova.
29Ou wakutengulwila kuli Yehova, uze vatengulula wamuli vatu, kanda vakamusokolako. Vamujihe cakumujiha.
30Ovyo vyakusokesa mumakumi vyakulifuci vyosena, cipwe vyajimbuto jakulifuci, cipwe vyamihako yamitondo, vinapu vyaYehova, vikiko vyajilila Yehova.
31Kaci nge mutu mwasokola vimwe vyavize vyenyi vyakusokesa mumakumi ahakileko cimbwa cimwe cakusokesa muvimbwa vitanu.
32Kaha vakusokesa mumakumi vosena vaze vakuutanga wavangombe, cipwe vakuutanga wavimuna vavandende, vexovo vakuhita muxi yamukombo, ou wakusokesa mulikumi apwe wajilila Yehova.
33Kanda atala numba nge nawahe nyi napihi, kaha kanda amutambasanako. Kaci nge kutambasana mwamutambasana, kaha nayou nayauze nawa atambasananga nenyi navapwa vajila. Kanda akavasokolako.
34Eji jikiko jiximbi jize valwezele Mose kuli Yehova hali vana vaIsalele kupili Xinai.
Currently Selected:
VYAVALEVI 27: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
