VYAVALEVI 25
25
Myaka yajisambata namwaka wayovele
1Yehova ahanjikile kuli Mose kupili Xinai ngwenyi,
2Hanjika kuli vana vaIsalele uvambulile ngwove, Omu namukengila mulifuci Uze nangumihana, numba lifuci Ukalame sambata kuli Yehova.
3Myaka yitanu naumwe mukakuvanga kumawande enu, kaha myaka yitanu naumwe mukawahisanga kumawande enu amivinyo, mukahelenga mihako yawo.
4Oloze hamwaka wamucitanu nayivali hakapwe kunoka califuci casambata yayilemu, yikiko sambata kuli Yehova. Kanda mukakuvaho kumawande enuko, cipwe kunonga kumawande enu amivinyo.
5Oco cakulisokelaho cakulya cenu mweji kwahanga kanda mukacahako, kaha mihako yakumivinyo yenu eyi vanazeneka kuwahisa kanda mukayihelako. Ukapwe mwaka wasambata yalifuci yayilemu.
6Sambata kana yalifuci yikapwe yakulya kuli enu, nakuli enu, nakuli vandungo jenu vamalunga, nakuli vandungo jenu vamapwevo, nakuli vangamba jenu vakufweta, nakuli vangeji jenu ava vanazuzumana nayenu.
7Kahoco cakulisokelaho nacikapwa kulya kuli vimuna jenu nakuli tunyama vali mulifuci lyenu.
8Kaha mukalilavila jisambata jamyaka jitanu najivali, myaka yitanu nayivali katanu nakavali. Kaha kukapwe makumbi ajisambata jamyaka jitanu najivali kuli enu, myaka makumi awana nayitanu nayiwana.
9Numba mukahicise luneta lwakutezuka mulifuci lyenu mwosena hakakweji wamucitanu navavali halikumbi lyakusokesa mulikumi, halikumbi lyakulinga cakufwika xili mukahicisa luneta mulifuci lyenu mwosena.
10Kaha mukajilika mwaka wakupwisa makumi atanu, mukavilike kulihehwa mulifuci mwosena kuli vaze vatwamamo vosena. Yikapwe #25.10:Nge ngwavo, Kutwa jingunda jakuwahilila.yovele kuli enu, kaha mukakinduluka mutu himutu kuluheto lwenyi, namutu himutu kucisaka cenyi.
11Mwaka uze wakusokesa mumakumi atanu ukapwe yovele kuli enu, kanda mukakuvahoko, cipwe kwahoco cakulisokelaho, cipwe kuhelaho mihako yakumivinyo yize vazeneka kuwahisa.
12Mwomwo yikiko yovele, yikapwe yajila kuli enu. Mukalye oco cakulisokelaho kuwande.
13Hamwaka kana wayovele mukakinduluka mutu himutu kuluheto lwenyi.
14Kaci nge namulanjisa minenu ndando, mokomoko nge namulanda kulivoko lyaminenu, kanda mukalyonga navakwenuko.
15Mukalanda kuli minenu nge kutesa nakuvula camyaka yakukava yovele, akamilanjise nge kutesa namyaka yakwima.
16Mukatohwesa ndando yaco nge kutesa namyaka yayivulu, kaha mukakehesa ndando yaco nge kutesa namyaka yayindende, mwomwo mwamilanjisa kuvula camyaka yakwima.
17Kanda mukalyonga navakwenuko, oloze ngwivwenungAmi Kalunga kenu woma. Mwomwo Ami yami Yehova Kalunga kenu.
18Xikaho mukalinganga mwaya vilika vyami, mukalamenga mazu ami akuyula, mukawalingenga, kaha namukatwamanga kanawa mulifuci cakuzeneka woma.
19Kaha lifuci nalikemanga kulya calyo, namukalyanga nakwikuta, nakutwamamo kanawa cakuzeneka woma.
20Kaci nge namukamba ngwenu, Hamwaka wamucitanu nayivali natukalya ika? Tala, katwexi kukuvahoko, cipwe kwaha mbuto jetu jakwima.
21Kaha nangukatuma kuwahisa cami hali enu hamwaka wamucitanu naumwe, kaha kwima naukema camyaka yosena yitatu.
22Namukakuva hamwaka wamucitanu nayitatu, kaha vize vyakwima lyehi, vize mwaswekele lyehi hamwaka, namukavilyanga palanga nahamwaka wamucitanu nayiwana. Vize mwaswekele lyehi hamwaka namukavilyanga palanga nakwingisevi vyakwima hamwakou.
23Lifuci kanda vakalilanda haya myaka yosenako, mwomwo lifuci linapu lyami, xikaho. #Kupu. 23.4; Samu 39.12; Hepe. 11.13; Petu. 1, 2.11.Mwomwo enu uvangeji, muvaka-kuzuzumana naYami hamwe.
24Kulifuci lyaluheto lwenu kwosena mukahana ndando yakusokola lifuci.
25Kaci nge ndumbwove nahutu, nge mwakalanda cimbwa caluheto lwenyi, kaha kausoko wenyi wakulipandama nenyi akeze, akasokole oco nalande ndumbwenyi.
26Kaci nge mutu kexi nayou mwacisokolako, nge nahete lyehi vikumba nakuwana vyakuta mukucisokola,
27kaha akeseke myaka kufumisa haze vacilanjile, kaha ndando yakusalaho akayihilwise kuli uze alanjixile, hikukinduluka kuluheto lwenyi.
28Oloze kaci nge kexi kukamona mwakulihilwixilacoko, kahoco nalande lyehi cikatwamenga kulivoko lyayou acilanjile palanga nakumwaka wayovele. Hayovele cikalovoke ceka, kaha akakinduluke kuluheto lwenyi.
29Kaci nge mutu mwalanda zuvo yakutwama yili mwimbo lili nakembwe, mwahasa kuyisokola hatando yamwaka wosena lukombo, kufumisomu vanayilande. Mwapwa nangolo jakuyisokola tando yamwaka wosena lukombo.
30Kaci nge kavexi kuyisokola hamwaka wosena lukomboko, kaha zuvo yize yili mwimbo lili nakembwe vakayizamixile kuli ou nayilande haya myaka yosena mukusemunwina cenyi cosena. Kayexi kukalovoka hayoveleko.
31Oloze jizuvo jili mumembo aze akuzeneka kuwajingulwisa jikembwe, vakajeseke hamwe namawande akulifuci. Navahasa kujisokola, kaha najikalovoka hayovele.
32Oloze membo avaLevinyi, jizuvo jakumembo aluheto lwavo, vaLevi navahasa kujisokola hexoho navasakila.
33Kaci nge mutu mwalanda kuli kaLevi, kaha zuvo yize valanjile, nalimbo lyaluheto lwenyi, navikalovoka hayovele. Mwomwo jizuvo jakumembo avaLevi jinapu luheto lwavo muli vana vaIsalele, xikaho.
34Oloze vifuci vyavipapa vyakumembo avo kanda vakavilandako, mwomwo lukiko luheto lwavo lwahaya myaka yosena, xikaho.
35Kaci nge ndumbwenu nahutu, nge livoko lyenyi nalihona nayenu, kaha mukamukwacisako. Atwamenga nayenu nge ngeji, nge muka-kuzuzumana.
36Kanda mukamukaxila hasakuko, cipwe kumutambula fweto, oloze mungwivwangAmi Kalunga kenu woma, mangana ndumbwenu atwamenga nayenu.
37Kanda mukamuhana jimbongo jenu jakukaxila hasakuko, cipwe kumuhana kulya cenu mangana mukamone nganyoko.
38Ami yami Yehova Kalunga kenu, ngwamilowele mulifuci lyaEjipitu mangana ngumihane lifuci lyaKanane, mangana ngupwenga nguKalunga kenu.
39Kaci nge ndumbwenu nahutu nayenu, nakulilanda nayenu, kanda mukamuzacisa milimo nge yaundungoko.
40Atwamenga nayenu nge ngamba wakufweta, nge muka-kuzuzumanako. Azatenga nayenu nakumwaka wayovele.
41Hahaze vene numba akalovoke kuli enu, ikiye navana venyi hamwe. Akakinduluke kucisaka cenyi, nakukinduluka kuluheto lwavakaka jenyi.
42Mwomwo vanapu vandungo jami, ava ngwalowele mulifuci lyaEjipitu, xikaho. Kanda vakavalanda vapwe vandungoko.
43Kanda mukamulisa nacikelako, oloze ngwivwenungAmi Kalunga kenu woma.
44Vandungo jenu vamalunga navandungo jenu vamapwevo ava namukaheta, kuli vaka-mafuci vanamijingilika, kuli vakivo vene mukalandako vandungo vamalunga navandungo vamapwevo.
45Kaha nawa, kuli vana vavangeji vakuzuzumana muli enu, kuli vakivo vene mukalandako, nakuli vana vavo muli navo, ava vanasemena mulifuci lyenu. Vakivo Vakapwe luheto lwenu.
46Mukavalingisa kupwa uswana wavana venu navakamikava, mangana vakavahete kupwa luheto lwavo. Mukavatambule kuli vakivo kupwa vandungo jenu haya myaka yosena. Oloze kuli vandumbwenu vana valsalelenyi, kanda mukalilisa navakwenu nacikelako.
47Muka-muyaci weka, cipwe muka-kuzuzumana kuli enu, kaci nge nawane vikumba, kaha nge ndumbwenu nahutu nenyi nakulilanda namuka-muyaci weka wakuzuzumana kuli enu, cipwe navausoko wayauze muka-muyaci weka vamwe,
48omu navalinga hivanamulande lyehi, navahasa kumusokola ceka. Ndumbwenyi umwe mwahasa kumusokola,
49cipwe ise, cipwe mwanaise mwahasa kumusokola, cipwe kausoko wenyi wakulipandama nenyi wakucisaka cenyi mwahasa kumusokola, mokomoko, kaci nge nawane lyehi vikumba, mwahasa kulisokola ivene.
50Kaha akalave nayauze amulanjile, kufumisa mumwaka uze alilanjile palanga nakumwaka wayovele, kaha ndando yenyi yikapwe nge mukuvula camyaka. Apwenga nenyi nge mumyaka yangamba wakufweta.
51Kaci nge kucili myaka yayivulu, ndando yenyi yakulisokola ayihilwise nge kutesamo kujimbongo jize vamulanjixile.
52Kaci nge kunalihono myaka yayindende kaha nakuheta mumwaka wayovele, kaha alave nenyi, ndando yenyi yakulisokola ayihilwise nge kutesa mumyaka.
53Apwenga nenyi nge ngamba wakufweta hamwaka hamwaka. Kanda akamulisa nacikela kumeso enuko.
54Kaci nge kavexi kumusokola hamyakeyiko, kaha akalovoke hamwaka wayovele, naikiye navana venyi hamwe.
55Mwomwo vana vaIsalele vanapu vandungo kuli Ami. Vanapu vandungo jami, ava ngwalowele mulifuci lyaEjipitu. Ami yami Yehova Kalunga kenu.
Currently Selected:
VYAVALEVI 25: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
