KULOVOKA 40
40
Tavanaku hinavayijika
1Yehova ambile kuli Mose ngwenyi,
2Hakakweji watete halikumbi lyakakweji lyatete ukajika tavanaku yambalaka yakuliwanyina.
3Ukahakamo cikaxa caunjiho, kaha ukavamba cikaxa nalihina lyakuvatasana.
4Ukengisa mesa, ukahakeho vyuma viliho. Ukengisa nawa Citumbikilo camanongo, ukawike manongo aco.
5Lijiko lyaulu lyakulumbila vize vyalivumba lyamwaza ukalihaka kulutwe lwacikaxa caunjiho, hikusukika civamba cakucikolo kutavanaku.
6Ukahaka lijiko lyakulumbila mawana akulumba kulutwe lwacikolo catavanaku yambalaka yakuliwanyina.
7Kaha ukahaka mbaxiya hakaci kambalaka yakuliwanyina nalijiko lyakulumbila, ukahakemo meya.
8Ukemika Cipango ce ndo, ukasukike civamba cakucikolo cacipango.
9Ukambata maji akuwavisa ukawavise tavanaku navyuma vyosena vilimo, ukayijilike, navyuma vyayo vyosena, kaha hinayikapwanga yajila.
10Ukawavisa lijiko lyakulumbila mawana akulumba, navyuma vyalyo vyosena, ukajilike lijiko lyakulumbila, kaha lijiko lyakulumbila hinalikapwanga lyajila cikuma.
11Ukawavisa mbaxiya nalitanda lyayo, ukayijilike.
12Kaha ukapandamisa Alone navana venyi kucikolo cambalaka yakuliwanyina, ukavasanyise meya.
13Ukavwika Alone vize vyakuvwala vyajila, ukamuwavise, ukamujilike, mangana akanguzacilenga milimo yaupilixitu.
14Ukapandamisa vana venyi vamalunga, ukavavwike vikuto.
15Ukavawavisa nge omu unawavisa sevo, mangana vakanguzacilenga milimo yaupilixitu. Kahoco kuvawavisa kana nacikapwanga upilixitu wahaya myaka yosena kuli vakivo mukusemunwina cavo cosena.
16Ngoco mwalingile Mose, nge mwosenomu vamulwezele kuli Yehova, mukiko mwalingile.
17Kaha casolokele hakakweji watete hamwaka wamucivali, halikumbi lyakakweji lyatete, vajikile tavanaku.
18Mose ajikile tavanaku, alile manevo jayo, emikile malivayo, engixile mikambo yayo, kaha ajikile jipanda jayo.
19Atanduwile mbalaka helu lyatavanaku, afwikile cifwiko cambalaka helu lyayo, nge omu valwezele Mose kuli Yehova.
20Ambacile #Luxi. 10.5; Hepe. 9.4.unjiho, auhakile mucikaxa, ahakile mivanda kucikaxa, kaha anangikile cifwiko calikoji helu lyacikaxa.
21Engixile cikaxa mutavanaku, asukikile lihina lyakuvatasana nakuvamba cikaxa caunjiho, nge omu valwezele Mose kuli Yehova.
22Ahakile mesa mumbalaka yakuliwanyina, kuluhaci lwatavanaku kutala kunote, kusali yalihina lyakuvatasana.
23Alileho jimbolo kumeso aYehova, nge omu valwezele Mose kuli Yehova.
24Ahakile Citumbikilo camanongo mumbalaka yakuliwanyina, kuze kwakulitalasana namesa, kuluhaci lwatavanaku lwakusulo.
25Awikile manongo kumeso aYehova nge omu valwezele Mose kuli Yehova.
26Ahakile lijiko lyakulumbila lyaulu mumbalaka yakuliwanyina, kuze kulutwe lwalihina lyakuvatasana.
27Kaha alumbilileho vize vyalivumba lyamwaza, nge omu valwezele Mose kuli Yehova.
28Asukikile civamba cakucikolo kutavanaku.
29Atumbikile lijiko lyakulumbila mawana akulumba kucikolo catavanaku yambalaka yakuliwanyina, numba alumbileho mawana akulumba namawana akulya, nge omu valwezele Mose kuli Yehova.
30Atumbikile mbaxiya hakaci kambalaka yakuliwanyina nalijiko lyakulumbila, kaha ahakilemo meya akusana.
31Kaha Mose naAlone navana venyi vasanyine kumavoko avo nakumahinji avo.
32Omu vengilile mumbalaka yakuliwanyina, nomu vapandamine kulijiko lyakulumbila, vasanyine, nge omu valwezele Mose kuli Yehova.
33Ajikile Cipango nawa nakujingulwisa tavanaku nalijiko lyakulumbila ce ndo, kaha asukikile civamba kucikolo cacipango. Ngoco Mose amayixile milimo.
Livwi hinalifwika tavanaku
(Kula. 9.15-23)
34Kaha lize livwi lyafwikile mbalaka yakuliwanyina, upahu waYehova wasulixile tavanaku.
35Ngoco Mose kahaxile kwingila mumbalaka yakuliwanyinako, mwomwo livwi lyatwamineho, kaha upahu waYehova wasulixile tavanaku, xikaho.
36Omu lyazundukile livwi helu lyatavanaku, vana vaIsalele vatambukile mumisango yavo yosena.
37Oloze kaci nge livwi kalyazundukileko, kaha kavatambukileko kuvanga likumbi lize lyazundukile.
38Mwomwo livwi lyaYehova lyatwaminenga hatavanaku namusana, kaha mwapwilenga kakahya naufuku, kumeso azuvo yaIsalele yosena, mumisango yavo yosena.
Currently Selected:
KULOVOKA 40: LUE70
Highlight
Copy
Compare
Share
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
