Joroma 2

Ngolo Kop ka Rubanga

1 # Matayo 7.1; Luka 6.37 Pi mano, kame in ingolo kop ne ngawoti, ili kede kacungo me pido akadi di in ngai; pien kame ingolo kop udo ingolo kop i komi keni, pien in ngangolkop ida itie timo gi acel nono. 2Wan ongeo be kame Rubanga ongolo kop ne jo kame timo akodi gi nogi, udo engolo kop kakare. 3Ngawota, ka ingolo kop ne jo kame timo akodi gi nogi, do di ida kikomi itimo gi, iparo be ibino bwot ki ngolo kop ka Rubanga? 4Benyo, arabo in icao abar me bero ka Rubanga, kanyakino kede dire mere? Mam ingeo be bero ka Rubanga teri iye iswilar? 5Do pi tekwic kede cuny kalikame swilaro kame in itie kede no, omio itie kano piri keni lilo ka Rubanga i ceng kame lilo kede ngolo kop mere kopoore bino neeno kede. 6#Sabuli 62.12; Agole 24.12Pien Rubanga bino culo ngat acelacel di lubere kede tice kame ebedo timo. 7Jo kame dio cuny gi timo gikaber di kimoo deyo kede wor kede kuo kalikame tiek, ebino mino gi kuo kame bedo nakanaka. 8Do jo kame paro pirgi kenekene, di kidagi lubo gi me ateni, do di kilubo ekite areco, kibino udo lilo kede gero ka Rubanga. 9Jo dedede kame timo gikarac bino neno can kede kibino udo lito, me agege Iyudayan, di do Jogurik da. 10Do jo dedede kame timo gikaber, Rubanga bino mino gi deyo, wor kede mulem, me agege Iyudayan, di do Jogurik da. 11#Iswilia 10.17Pien Rubanga likame tie kede apokapoka.

12Jo dedede kame odubo di kili kede Iswil ka Musa bino to da abongo Iswil, kede jo dedede kame odubo do di kitie kede Iswil kobino ngolo ne gi kop di kolubo Iswil da. 13Pien likame jo kame winyo Iswil awinya en kame obedo jo kopoore i nyim Rubanga, do jo kame timo gikame Iswil mito en kopoore. 14Kame jo kalikame Iyudayan, jo kalikame tie kede Iswil, otimo gikame Iswil mito pi ekite gi me anywali, gin kilokere kidoko Iswil but gin ken gi, akadi bed bala kili kede Iswil. 15Ekite gi nyuto be kowandiko gikame Iswil mito i cuny gi. Ngec me cuny gi i kom gikaber kede gikame rac da jurao be man tie gi me ateni, pien tam gi lokolokun; esawa moro tam gi waco ne gi be kitimo gikame rac kede esawa moro be kitimo gikaber. 16Aso manoni en gikame bino timere, i ceng kame Rubanga bino ngolo kede kop i kom mung me jo di etio kibut Yesu Kirisito, di lubere kede ejiri kame ango atuco.

Iyudayan kede Iswil

17Do ka in ilwongere be Ngayudaya, di igengere i kom Iswil kede di iwakere pi awotin nin kede Rubanga, 18di ingeo gikame Rubanga mito, kede di igango tam i kom gikaber twatwal, pien kotieko pwonyi i kom kop me Iswil; 19kede ka ingeo kiber be in itie bala ngat kame telo imuduka, kede itie bala lero ne jo kame tie i colo; 20in irieo jomingo kede ipwonyo jo kame ngec gi pwodi nonok bala idwe, pien itie kede ngec lung kede ateni me Iswil, 21aso in ngat kame ipwonyo jo apat, mam ber ipwonyere keni? Ipwonyo jo be kur kikwali, do benyo, mam in ikwali? 22In ngat kame iwaco ne jo be kur kitimo adote, do benyo, mam in itimi? In ngat kame cunyi dagi cal jwogi, do benyo, mam in iyak tempulo? 23In ngat kame iwakere pi bedo tie kede iswil, do benyo, mam in ibed ngat kalikame woro Rubanga, ngat kame turo iswil mere? 24#Isaya 52.5 Etie bala kame kowandiko be, “Jo kalikame Iyudayan cao nying Rubanga pi wun.”

25Kepere kony mere tie ka ilubo Iswil, do ka ituro Iswil, akadi di kokepi da idoko bala ngat kalikame kokepo. 26Aso ka icuo kalikame kokepo ogwoko cik me Iswil, iparo be Rubanga likame bino tere bala kokepe, bed bala likame kokepe? 27Pi mano, jo kalikame kokepo del me kom gi, do di kigwoko Iswil bino ngolo kop i wi wu, pien akadi bed bala itienu kede Iswil kame kowandiko doko di kokepo wu, do iturunu Iswil nono. 28Pien dano kame obedo Ngayudaya i ooko me kome udo likame en Ngayudaya kikokome; doko kepere me ateni likame tie gimoro kame neeno kame kotimo i kom dano ooko. 29#Iswilia 30.6Ngat kobedo Ngayudaya kikokome en dano kobedo Ngayudaya i cunye, doko kepere me ateni tie kop kame mako cuny, en gi me Tipo, do weko gikame kowandiko. Ngat kame cal kamano udo pwoc mere kibut Rubanga do weko kibut dano.

Currently Selected:

Joroma 2: BILKDC13

Highlight

Copy

Compare