Joroma 16

Amot kame Paulo Ocwao

1Anyuto amin wa Paibe butu, ngakony tic ka Rubanga i ekodet me jokirisito i Kenkerea, bala dano aber, me 2wek igamenu i Rwot bala kame poore ne jokacil timo, di ikounu mine kony dedede kame eromo mito kibutu. Pien lem en ebedo konyo jo atot akadi kiton ada.

3 # Tice 18.2 Motanu Purisila kede Akwila, kame obedo jotic jowota i Kirisito Yesu, 4jo kame oudo oyei to pi kuo na. Likame ango kena en kame apwoyo gi, do kiton ekodet me jokirisito kalikame obedo Iyudayan. 5Motanu ekodet me jokirisito kame cokere i ot gi. Motanu ngawota kame amaro Epaenato, kame oudo obedo dano me agege me lokere but Kirisito i Esia. 6Motanu Maria, ngat kobedo timo tic atek i diere wu. 7Motanu Anduroniko kede Yunia, kame obedo joawade na kame bin kotwea kede gi i otkol. Gin kitie jo angere kikom joor, doko gin kigeo nango doko jokirisito.

8Motanu Ampuliato, ngawota kame amaro i Kirisito. 9Motanu Urbano da, ngatic wad wa i Kirisito, kede ngawota kame amaro Sitaku. 10Motanu Apele ngat kame kopwoyo i Kirisito. Motanu jo me i ot ka Arisitobulo. 11Motanu wad wa Erodion. Motanu jo kame tie i Rwot, kame obedo jo me ot ka Narisisa.

12Motanu jogo kame timo tic ka Rwot, Teropaina kede Teroposa. Motanu ngawota me amaro Peresi, kame obedo timo tic atek i Rwot. 13#Marako 15.21Motanu Rupus dano kame koyero i Rwot, kede toto mere kame obedo toto nada. 14Motanu Asinkerito, Pelegon, Kereme, Patroba, Kerema kede imiegu kede amiegu kame tie karacel kede gi. 15Motanu Pilologa, Julia, Nereu kede amin mere, kede Olimpas, kede jokacil dedede kame tie karacel kede gi.

16Moterenu kenu kenu kede amot kacil me notere. Ikodeta dedede me jokirisito moto wu.

Cor me Ajikini kame Paulo Omio

17Imiegu kede amiegu na, akwao wu pi gwokere ki kom jo kame kelo apokapoka kede kame totolo yei me jo, jo kame dagi lubo kop kame kopwonyo wu; kur ibedunu kede gi. 18Pien epone me jo nogo likame tio ne Rwot wa Kirisito, do kitio pi cobo mit gi. Gin kingalo jo kame tam gi likame tut kede kope gi amit, kame winyo ber. 19Jo dedede otieko winyo be wun ilubunu kop me ejiri, en komio ango cunya yom i komu. Amito ibedunu jo kame tie kede rieko me ngeno gikaber, kede jo kame li kede kop moro kame makere kede gikarac; 20di do Rubanga won mulem ko bino nyonyoto Sitani di eko kete i loc wu i kare kiyapiyapi. Kisa ka Rwot wa Yesu Kirisito bed kede wu.

21 # Tice 16.1 Temeseo, ngatic ngawota moto wu. Lukio kede Jason kede Sosipata kame obedo joawade na da, moto wu.

22Ango Teritio, ngat kowandiko baluwa noni, amoto wu i Rwot.

23 # Tice 19.29; 1 Jokorinti 1.14; 2 Temeseo 4.20 Gayo ngat kame tie gwoka i ture, karacel kede jo me kan dedede koyei Kirisito moto wu. Erasito, ngakan lim me bomba, kede omin wa Kuato moto wu. 24Kisa ka Rwot wa Yesu Kirisito bed kede wu dedede. Amen.

Ilega me Pak kame Jiko

25Omiunu Rubanga deyo, en ngat kame karuno mino wu icungunu di itekunu i yei, di upere kede ejiri kame ango atuco kede kop kame apwonyo i kom Yesu Kirisito, di lubere kede nyutere me gikame omungere, kame oudo kokano pi kare alac. 26Do nan kotieko nyute, di oko mine engere but jo kalikame Iyudayan dedede i iwandik kacil me inabin, di lubere kede cik kame Rubanga ngat kame bedo nakanaka omio, pi mino jo yei kop mere di kiko lubo. 27Deyo bed but Rubanga acel kenekene won rieko, pi Yesu Kirisito, ikar kede ikar. Amen.

Currently Selected:

Joroma 16: BILKDC13

Highlight

Copy

Compare