Joroma 15

Yom Cuny Jo Apat do Weko Meri keni

1Wan jo kame yei wa tek opoorenu kanyakino popoto me jo kame yei gi goro, di likame otimo gikame yomo cuny wa kenwa. 2Wek dano acelacel yomcuny dano ocelu, pi gero yei mere. 3#Sabuli 69.9Pien Kirisito bin likame oyomo cunye kene, bala kite kame kowandiko kede be, “Ayet kame jo oyeti kede opoto i koma.” 4Pien gi dedede kame oudo kowandiko i kare okato, oudo kowandiko pi pwonyo wa, tetekeny obedunu kede gen pi ikanyakin kede nwangcuny kame iwandik kacil mio wa. 5Ango akwao Rubanga ngat kame mio jo ikanyakin kede nwangcuny pi mino wu bedo kede tam acel, wun kenu kenu, di lubere kede anyut kame Kirisito Yesu omio, 6tetekeny wun dedede, kede dwan acel, ipakunu Rubanga, en Papa me Rwot wa Yesu Kirisito.

Kop Aber ne Jo kalikame Iyudayan

7Pi mano, gamunu jo icegun bala kame Kirisito da ogamo wu kede, tetekeny imiunu Rubanga deyo. 8Pien awaco ne wu be, Kirisito odoko ngat kame tio ne jo kame kokepo pi nyuto ateni ka Rubanga, tetekeny emi cikere mere but joakwari me agege me Isirael cobere, 9#2 Samuel 22.50; Sabuli 18.49kede me wek jo kalikame Iyudayan pak Rubanga pi cuny me kisa mere, bala kame kowandiko kede be,

“Pi mano, ango abino paki i dier jo kalikame Iyudayan,

di ako wero were me pako nyingi.”

10 # Iswilia 32.43 Bobo be,

“Lelunu karacel kede jo mege, wun jo kalikame Iyudayan.”

11 # Sabuli 117.1 Bobo ewaco be,

“Pakunu Rwot, wun jo dedede kalikame Iyudayan,

doko wek jo dedede pake.”

12 # Isaya 11.10 Isaya bobo oko meede kede yamo be,

“Akwar Yese oyaro bino,

en eyaro bino pi pugo jo kalikame Iyudayan;

jo kalikame Iyudayan bino bedo kede gen i kome.”

13Wek Rubanga ngat kame mio gen, pong kuo wu kede yomcuny kede mulem pi yei wu i kome, tetekeny ibedunu kede gen adwong pi twer me Tipo Kacil.

Gikame Omio Paulo Owandiko Baluwa kede Nwangcuny

14Imiegu kede amiegu na, ango kikoma atie kede niang aber i komu, be wun ipongunu kede bero, doko itienu kede ngec dedede, doko itwerunu pwonyere kenu kenu. 15Do kope mogo tie kame awandiko kede nwangcuny pi mino wu iyutun. Atimo manoni pi kisa kame Rubanga omia, 16pi bedo ngatic ka Kirisito Yesu but jo kalikame Iyudayan, di atio bala ngasaseredoti kame tuco ejiri ka Rubanga, tetekeny jo kalikame Iyudayan dok giamia kame Rubanga karuno gamo, kame Tipo Kacil olonyo. 17Pi mano, atie kede tien kop kame mia awakere i Kirisito Yesu pi tic kame atimo ne Rubanga. 18Likame abino waco kop i kom gimoro ace, kwanyo gikame Kirisito omio otimere kibuta, pi mino jo kalikame Iyudayan lubo kop ka Rubanga. En etimo manoni i kope kede tice na, 19i gianena kede i gi me isuur, kede i twer me Tipo ka Rubanga. Manoni en komio atieko tuco ejiri ka Kirisito kakare, cako ki Yerusalem tuno Iluriku. 20Man oko mina bedo kede mit me tuco ejiri kakame pwodi likame kolwongo kiye nying Kirisito, tetekeny kur arop gedo i wi tic ka ngatamoro apat. 21#Isaya 52.15 Bala kame kowandiko be,

“Jo kalikame kowaco ne gi kop i kome bino nene,

kede jo kalikame pwodi owinyo kop i kome bino niang kop i kome.”

Iik ka Paulo pi Welao Roma

22 # Joroma 1.13 Man en kop komio nakanaka likame atwero bino butu. 23Do nan bala kite kalikame doko atie kede tic moro i adulion me kan, bala kame abedo paro kede sek, cunya mito do bino butu 24di atie ot Sipania. Pien ageno be abino neno wu i kare kame atie ot kede kuno di ikounu bino mina kony pi mina meede kede ot na, ingei ango bedo kede wu pi kare moro acecek. 25#1 Jokorinti 16.1-4Bed bala kamano da, nataman ango atie ot Yerusalem pi tero kony ne jokacil. 26Pien jo me Makedonia kede jo me Akaya cuny gi obedo yom pi nywako jame gi kede jocan kikom jokacil kame tie Yerusalem. 27#1 Jokorinti 9.11Cuny gi oudo yom pi timo kamanono, doko i ateteni etie banya but gi. Pien ka Iyudayan onywako winyo gin me cuny kede jo kalikame Iyudayan, jo kalikame Iyudayan da poore mino Iyudayan kony me jame. 28Pi mano, kame atieko timo tic noni, kede kame atieko mino gi gikame kocoko, abino beo butu di atie ot Sipania. 29Doko angeo be, kame atuno butu, abino kelo winyo adwong kame oyai kibut Kirisito.

30Imiegu kede amiegu na, akwao wu i Rwot wa Yesu Kirisito kede i amara me Tipo Kacil be, riberenu keda i timo teko ilega karacel keda but Rubanga pira, 31me wek amotoko kolaka ki cing jo kalikame oyei kame tie Yudea, kede me wek jokacil pwoi tic na kame atieko timo Yerusalem. 32Manono bino mina adwogo butu kede yomcuny, di ako bino udo alakanar kame atie karacel kede wu, ka Rubanga oyei. 33Rubanga won mulem bed kede wu dedede. Amen.

Currently Selected:

Joroma 15: BILKDC13

Highlight

Copy

Compare