2 Makabi 3
3
Piem ka Onias kede Simoni
1I kare kame Onias#3.1 Onias noni en oudo obedo Onias me Adek, wot ka Simoni me Are. en koudo obedo Ngatel me josaseredoti i Yerusalem, mulem oudo oko bedo tie ne jo, doko jo oudo daro iswilia kiber, piento en oudo eketo cunye i edini doko oudo cunye dagi gikareco. 2Abakai da kikom gi bin oko bedo mino wor i kom tempulo i kare nono, di kitero da iye giamia me wel amalo, 3akadi Abaka Seleukus#3.3 Manoni en Seleukus me Ongwon kame kongeo be Pilopator wot ka Antiokus me Adek (mwaka me 187-175 di pwodi likame konywalo Kirisito). me Esia da bin mio cul pi giayala kame bin komio buli ceng, di etio kede sente kame en oudo eraro me esolo.
4Do icuo moro kame nyinge Simoni, dano me ekeko ka Benjamin, ngat kame bin koketo pi bedo ngatel me tic amako tempulo, oko bin piem kede Ngatel me Josaseredoti i kop amako ekite me pugo atale me bomba. 5Do piento en oudo likame eko twero bwono tam ka Onias, en eko bin ot but Apoloniasi wot ka Taraseo, ngat kame i kare nono oudo tie ngapug me Koelesiria kede Poinike. 6En eko waco ne be kabedo me kano lim i Yerusalem oudo sente tie iye kame wel mere likame wacere, aso, pien sente nono oudo likame mitere pi giayala, oudo koto eber ka okete i twer me abaka.
7Kakame Apoloniasi oko riamo kede abaka, en eko tatamo ne kop i kom sente nono, di abaka oko mino cik but Keliodora, ngatic mere adwong, pi tero ne sente nono. 8Keliodora oko yai pi ot Yerusalem pi timo gikame abaka oudo owaco, do en oudo ewaco ne jo be en etie ot pi mamano bomban me Koelesiria kede Poinike. 9Kakame en etuno kede Yerusalem, di oudo Ngatel me Josaseredoti otieko game kiber, en eko tatamo ne kop kotere kunono kikokome, di eko penyo ka kop kame oudo owaco nono tie ateteni kamanono. 10-11Ngatel me Josaseredoti oko waco be, sitani kame nyinge Simoni, likame obedo waco kop me ateni. Ateteni bo sente mogo oudo tie i ot kano lim me tempulo, do mogo kiye oudo opoko pi apuserun kede idwe kic, kede ace oudo obedo me ka Kayakanu wot ka Tobias, dano kame pire tek. En eko nyuto da be sente nogo lung oudo romo kilo tutumia tomon kiwie adek (13,000) me siliba, kede kilo tutumia kanyape kede tol kany (6,500) me saabu. 12En eko waco da be likame etwerere akadi atitidi ne en yei ne ngatamoro tero sente me jo koudo oketo gen gi be likame tie gimoro arac kame twero timere i kom sente gi i tempulo kacil kame ngere i wi lobo lung.
Keliodora Otimo Iik me Yako Tempulo
13Do Keliodora oko medo moko kitek be sente nono miero en eteri i ot me kano lim ka abaka, bala kame abaka oudo otieko ciko. 14Aso, en eko ciko ceng di en eko ot i tempulo pi neno kite kame komaro kede sente nono. Manoni oko kelo woo atek i bomba lung. 15Josaseredoti bin oko riebere piny i nyim alutari di kingapo ikanson gi me tic, di kiko ngangao Rubanga pi gwoko sente nogo, piento en oudo etieko mino iswilia amako sente kame jo tero i tempulo nono. 16Dano oudo neno Ngatel me Josaseredoti di cal mere ko cobo cunye. Cal me nyime oudo nyuto aramacuny kame en etie kede, 17doko miel me kome oudo nyuto be en etie kede lworo atek kede aramacuny. 18Jo oko wok ki ude gi di kiko onyaro ot kwano Rubanga pien oudo koyapuno munao tempulo. 19Mon koudo ngapo ipukoi pi nyuto iturur oko cokere i gudi me bomba. Anyira kame jonywal gi likame oudo yei negi wok ooko, oko ringo i irutei, mogo oko ringo i apama me bomba di ace oko dong ngado ngut gi ki dirisan. 20Jo dedede oko tango cing gi malo, di kingangao Rubanga pi konyo gi. 21Neno Ngatel me Josaseredoti di tie i lito kacal kamano kede jo da di oriebere piny oudo likame ber.
Rwot Gwoko Tempulo mere
22Kakame jo dedede oudo tie ngangao kede Rwot Won Twer pi gwoko sente kame jo oudo ogene kede di kiko keto i gwok mere, 23Keliodora gire oko meede kede iik mere. 24Do kakame en kede isirikalen koudo gwoke kiko tuno kede i ot me kano lim, Rwot ngat kame lo tipere dedede kede twer dedede, oko mino gianyuta moro oko timere, kame oko mino jo koudo cuny gi obedo nwang di kiko donyo kede Keliodora i ot me kano lim, kom gi oko to pi lworo. 25I gianyuta nono, gin oudo kineno asigira kede ngat koudo tie wanano en. Asigira nono oudo kotweo kede del kame kotubuso. Neno ngat kawanano en oudo kelo ne dano lworo; oudo engapo igoen me yi kame kotimo kede saabu. Asigira nono oko mwomere i kom Keliodora di eko gwene kede abelekek mege. 26Keliodora oko neno da bobo awobe atek are di kicil, doko di kingapo igoen acil. Gin oudo kitie cungo i ngete tuni tuni di kitie bunge abongo kisa. 27Oyotoyot di en epoto piny eko wile, di jo mege oko kete i elago 28di gin kiko yene kitere. Icuo noni oudo pwodi odonyo adonya i ot me kano lim kede ekodet me jo, kiton isirikalen kame dare da, do nataman kotie yene tere tenge abongo teko moro i kome. Aso, gin dedede kiko neno twer adwong ka Rubanga.
Onias Olego pi Cango ka Keliodora
29Keliodora oko dong buto di likame etwero yamo, pi tim me twer koudo Rubanga oko timo i kome, doko da oudo eli kede gen me cango. 30Do jo apat dedede oko pako Rubanga piento en oudo eko gwoko tempulo mere iepone me aura, di eko kelo kilel kabedo kame iesawa atitidi kokato cen lworo kede atotolun en oudo tie iye. 31Keliodora oudo oyapuno to, di jowote mogo awakawaka oko kwano Ngatel me Josaseredoti, Onias, pi kwano Ngamalo Twal pi mine ebed kuo. 32Aso, Ngatel me Josaseredoti oko mino giayala di oudo etie kede gen be Rubanga bino lako kuo ka Keliodora, piento en oudo likame emito abaka bed kede tam be Iyudayan en koudo oko timo iik me neko Keliodora. 33Kakame Ngatel me Josaseredoti oudo tie mino kede giayala nono, awobe are nogo oko bobo neeno but Keliodora, di oudo kitie ngapo igoen nogo kame oudo kingapo i agege. Gin kiko waco ne Keliodora be, “Poore in ipwoi Ngatel me Josaseredoti Onias, piento pire en komio Rwot oweki idong kuo. 34Poore in ingei be Rwot me malo en komi alola. Nataman poore in iot di iko tatamo ne jo dedede kop i kom twer mere.” Kakame gin kitieko waco kede kop noni, gin kiko rwenyo wir.
Keliodora Opako Rubanga
35Aso, Keliodora oko mino giayala but Rwot, di eko timo kwongere adongodongo but Rwot ngat kolako kuo mere. Di en eko moto Onias di eko dok kede isirikalen mege but abaka. 36Ki kunono en eko tatamo ne jo dedede gikame Rubanga adwong otimo, jamini kame en oudo etieko neno kede wange. 37Kakame abaka oko penyo kede Keliodora pi waco ne epone me dano kame en epoore oro Yerusalem tien kame lubo, en eko waco ne be, 38“Ka in itie kede ngakwor moro arabo dano moro kame mito reto apugan ni, cwae kunono, pien ebino dwogo di kobunge bung arac, ka cabo eko dwogo; pien ateteni tie twer ka Rubanga kame tie tic i kabedo nono. 39Rubanga kame bedo i malo gwoko kabedo nono en kikome. En edipo paka reto piny di eko muducaro dano moroni aoto kunono pi timo can iye.” 40Manoni en gikame bin oko timere ne Keliodora kede kite kame lim me tempulo oko bwot kede.
Currently Selected:
2 Makabi 3: BILKDC13
Highlight
Copy
Compare
Share
Want to have your highlights saved across all your devices? Sign up or sign in
Baibuli I Leb Kumam © Bible Society of Uganda, 2013.