MoaOroma 7
7
Egŋe eshri eble
1Adlidzi angyiŋ, agimi e ka ekplo ba ame e klo o lulu e bmye. Agimi anáŋ, agimi mvye e sheŋ e yi odaŋ lo. Odaŋ o wo ekʼpo eshri arehwĩ omba baŋ a wo ma sha. 2Ashe la a kyu alom a wo abgo alom baŋ lo, eka ba odaŋ o lu, o wo ba alom lo a wo ma. Ambo o wo baŋ a kpu le, odaŋ o bʼbu ŋa ta la alom lo nga mbo. 3Okyku eka he, o wo baŋ a yi a kyu arekyeŋ ondundum omba ba alom baŋ a wo ma le, moa á bzi ŋa ashe la a ta ekpa. Ambo o wo ba alom baŋ lo a kpu angyiŋ le, a wo ozhẽ ma baŋ a yi a kyu eble ehe eka ba odaŋ o lu. Moa á bzi lo otaekpa angyiŋ mbo o wo baŋ a yi a kyu arekyeŋ. 4Agimi anáŋ, alo a mbo o wo ekakahelo angyiŋ ta la egimi. Eka ba odaŋ o wo, agimi a mbo e sheŋ e kpu bgu, okyku eshi agimi e wo eka ogʼba ba egʼba ba Eyesu angyiŋ. Nga ohuhuhi agimi e wo moare ba are ba moa a kso ŋa ongybi okyku o da gi e kpo ayakplo la a wo shasha okyku Ahogbrẽ. 5Omba ba agi e la e dzu ta la ogroayi ba egʼba, odaŋ o la o shri ogroayi ba egʼba o shri o kom gi, alo angyiŋ o shri eku o kom gi. 6Ambo ohuhuhi, odaŋ o wo ekʼpo eshri bi nga mbo, okyku eshi agi e sheŋ e kpu ibu ekplo la e da gi e dzu moaprusuna ayga. Agi e la e da odaŋ angyiŋ o dzu ozhẽ ba o lu Ahogbrẽ ma eka ba moa a ta ayga nga mbo. Ambo agi e lu Ahogbrẽ ma ozhẽ ohe ba Ogbgaodzi angyiŋ.
Odaŋ ta la odlobi
7Agi é sa e lu la eshi a mo? Odaŋ o wo odlobi angyiŋ? O wo odlobi angyiŋ mbo! Alo angyiŋ o tsa me o da me e yi eka ba odlobi o wo. Alo mbo e mbi ame e kpo e gbu ba ame e yi ekplo ba moa a bzi lo ma ogroayi mbo. Ambo ame e yi lo okyku ba odaŋ o lu mi le, O gro ayi mbo. 8Odlobi o hwiŋ ozhẽ okyku o shri ogroayi o ghwo eso me ozhẽ ba odaŋ. Odaŋ o wo ma mbo e mbi, odlobi o dzu eka ba eku angyiŋ. 9Ame e mbi e wo esõ-egbubiŋ omba ba odaŋ o wo ma mbo, ambo omba ba odaŋ o wo ma nga, ame e yi odlobi. 10Nga, ame e kpu, nga odaŋ e mbi, o wo okyku o shri eso angyiŋ o shri o ba, ambo alo o shri eku angyiŋ o shri o kom me. 11Odlobi o hwiŋ ozhẽ baŋ, nga o bile me ibu odaŋ. Ibu odaŋ lo nga, odlobi o bga me.
12Odaŋ o wo la esesla, nga odlo lo a mbo o wo la esesla, nga o wo odzi. 13O dzu eka ba ekplo la e wo edzi angyiŋ e shri me e ghwo eku? O wo eka he angyiŋ mbo! Odlobi angyiŋ o shri me o ghwo eku. Odlobi o la o kpo otum ta la ekplo la e wo edzi nga e shri eku e kom me, okyku o tsa edgu odzudzu ba odlobi. Okyku eka he ozhẽ odaŋ nga, odlobi o zhiŋ o dzu ekplobi la e ngro eshri.
Aga aha eso arehwĩ
14Agi e yi ba odaŋ ba Omusa o zgi okro ba Ahogbrẽ angyiŋ o ba, ambo ame e wo la a wo la egʼba ba eku, nga moa a shri me a gbmo eka ba awaghrẽ ba odlobi. 15Ame e yi eka ekplo ba ame e la e kpo mbo, okyku ba ame e la e kpo ayakplo ba ame e la e klo o kpo mbo, okyku eshi ayakplo ba ame e la e klo o kpo-kpo, ame e kpo lo mbo. Ambo ayakplo ba ame e tla lo angyiŋ, ame e la e kpo lo. 16Omba ba ame e la e kpo ayakplo ba ame e klo o kpo mbo, ohi o dzu eka ba ame e bmi ta la odaŋ angyiŋ. 17Okyku eka he, ame eshrishri eme angyiŋ e la e kpo lo mbo, ambo odlobi la o wo eso me angyiŋ o da me e kpo lo. 18Ame e yi ba ekplokyeŋ la e wo shasha e wo pa la me mbo, o dzu eka ekplokyeŋ la e wo shasha e wo odzudzu me ba egʼba mbo. Ambo aga ba o kpo ayakplo la a wo shasha a wo pa la me, ambo ame e la e kpo otum ta la lo e gbu mbo. 19Ame e la e kpo ayakplo adzi la a raŋ a gre ba ame e kpo mbo. Ambo ame e la e kpo ayakplobi la a raŋ a gre ba ame e bmi e kpo lo mbo. 20O wo ba ame e la e kpo ayakplo ba ame e klo o kpo lo mbo, o dzu eka ba ame angyiŋ e kpo lo mbo. O dzu eka ba odlobi la o wo eso me angyiŋ o la o kpo.
21Okyku eka he, ame e yi ba aga he lo a kpo otum, okyku eshi o wo ba ame e klo o kpo akplokyeŋ adzi le, ame e la e sa e nyiŋ e kpo ayakplobi angyiŋ. 22Ame e la e gno oraŋ ta la odaŋ ba Ahogbrẽ eso me eshyẽ. 23Ambo ame e la e nyiŋ e kpo otum ohwõ ondundum angyiŋ. Aga he lo a la a ta eko ta la aga ba eso me e bmi ta la lo. Alo a zhiŋ me a da me e dzu awaghrẽ odaŋ ba odlobi, okyku eshi o wo aga ba odlobi la a kpo otum egʼba me. 24Ame e wo arehwĩ la a wo odzudum ba eso ma mbo angyiŋ. Ayi angyiŋ á ba a shla me abgo egʼba ba odlobi la o la o shri me o yi enzhe eku hi? 25Ame e vye Ahogbrẽ eshko Adigi Eyesu Ekristi!
Eka he angyiŋ odzudzu me o wo. Eso me, ame e kpo e gbu ba ame e kpaŋ odaŋ ba Ahogbrẽ, ambo odzudzu me ba egʼba o la o da me e kpaŋ odaŋ ba odlobi.
Currently Selected:
MoaOroma 7: EGONT74
Highlight
Share
Compare
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
