Otum 24
24
MoaEyahuda a kla odlo ta la Oblus
1Ambla ba elum etno nga, Ahananiya anyuŋ-andakʼpo olu ba Ahogbrẽ, a gre Esizariya pa la moandakʼpo, ta la Etatulu. Moa a gre okro ogomna nga moa a shri odlo a ba eshri Oblus. 2Moa a bzi Etatulu nga aŋa a lu odlobi eshri Oblus a lu mi le,
Aŋo Efliki ba anyuanyuŋ! Okyku boŋ o la o ri oreŋ adzadzi, agi e hwiŋ odzudum e gre eshri, nga aŋo o sa o shri onyio-nyiŋ ayakplo nzenze o shri o ba obiŋ bi. 3Agi e gno oraŋ ta la ohe lo ayaŋ a mbo ombamba mvye, nga agi e vye ŋo e gre eshri. 4Ame e klo o tpi ŋo omba ayi nzenze mbo, okyku eka he ame e vẽ ŋo, aŋo o kpo o ghwo nga, o ngli o gno ela odlo bi lo. 5Agi e ka tki, alom he lo a wo are la a wo oyla, nga a la a tpi okro ayi. Aŋa a la a sla eshki moaEyahuda ayi ayaŋ a mbo obiŋ hi. Nga a sa a wo andakʼpo ba eshki moa a bzi lo ma Anazari. 6Aŋa a la a klo o nyuŋ Anyuŋ-akulu o tpi ayi, okyku eka he agi e vu ŋa. [Agi e mbi e klo e sõ ŋa ombgu eka ba odaŋ bi o lu. 7Ambo anyuŋ-andakʼpo moa a bzi ŋa ma Elisiya a ba la osheshye a ngʼga ŋa a sku gi. 8Nga Elisiya a shri odaŋ a di a lu mi ma moa la a sõ ombgu ka la ŋa a ba okro boŋ.] O wo boŋ o zhĩ alom he lo, aŋo o kpo o gbu boŋ o ba o gno ekployaŋ a mbo ba agi e vu ŋa ombgu okyku lo. 9MoaEyahuda a mbo moa a bmi ta la odlo he lo, nga moa a bmi ba alo o wo adlidzi angyiŋ.
Oblus a tspi okyku eshri eŋa egi ayi Efliki
10Ogomna a tsa Oblus abgo ma a lu odlo, nga Oblus a lu odlo a lu mi le,
Ame e yi zhezheŋ boŋ o wo are la a sõ ombgu obiŋ hi okyku eyi oshushku. Okyku eka he ame e gno oraŋ o gre eshri okyku o tspi okyku eshri me egi ayi boŋ. 11Aŋo o kpo o gbu boŋ o yi, omba o gre elum otsko mbo ba ame e gre Orushalima okyku o hlu Ahogbrẽ eshko. 12MoaEyahuda a hwiŋ me e hwro odlo ta la arekyeŋ Anyuŋ-akulu mbo. Moa a ka a hwiŋ me ba ame e sla moarehwi ayi okrokyeŋ mbo, o mbo le anwyeakulu mo mbo, o mbo le okrokyeŋ osku he mbo. 13Nga moa a kpo a gbu moa a shri otsotsakyeŋ a ba okyku ombgu moa a kpo pa la me he mbo. 14Ame e bmi ta la odlo he egi ayi boŋ. Ame e lu Ahogbrẽ moadigi ma, nga ame e la e sõ Ozhẽ moa a la a lu mi ma alo o wo o ba akpro. Nga ame e bmi ta la ekployaŋ a mbo moa a ta odaŋ ba Omusa, ta la akpekpa moarehwi ba Ahogbrẽ a hom mo otum.
15Okayiozhẽ me ta la okayiozhẽ mo ozhẽ ba Ahogbrẽ o wo okyekyeŋ angyiŋ. Moare adzi pa la moare abi mvye á kso ongybi. 16Okyku eka he, ame e zga ngre omba mvye okyku o da me e wo la eso ekyle ma egi ayi ba Ahogbrẽ, pa la moarehwi.
17Ame e zgi e sku Orushalima okyku eyi oshushku. Ame e bla e ba Orushalima okyku o shri amgbaŋ e shri e da moarehwi me, nga e shri oshriondba e shri e di. 18Omba ba ame e kpo eka he lo angyiŋ, moa a hwiŋ me Anyuŋ-akulu, ambla ba ame e sheŋ e kpo abgo o nglo eshrlu o khwo bgu. Ambo moarekyeŋ a wo pa la me mbo, nga moa a kpo ambgu mbo. 19Ambo moaEyahuda la a zgi obiŋ ba Asiya a ba, moa a wo okro he lo. O raŋ o gre moa a mbo a ba egi ayi boŋ nga, moa a ba a lu odlo mo o wo moa a wo ekplokyeŋ pa la me. 20O mbo le, aŋo o da moare he lo a lu akpu ba ame e ta e da akuombgu a gno, omba ba ame e tspi egi ayi mo he. 21Ame e kpo ekplokyeŋ mbo, o wo le okyku odlo ba ame e lu egi ayi mo e lu mi le, Agimi e sõ me ombgu anye he okyku ba ame e bmi ba adlidzi ba moa la a kpu á ba a kso ongybi angyiŋ.
22Ambla he nga Efliki a sheŋ a gno oshpa ba Ozhẽ he lo, a shki ombgu nga a nyuŋ mo a lu mi le, Ame é sõ ombgu bimi omba ba Elisiya á gbu. 23A nyuŋ andakʼpo moanwyea-kyuŋ la a kʼpu Oblus ma a nyuŋ Oblus a kʼpu. Ma a mbo, a la a shri anvaŋ a daŋ tsitsi, nga a bmi a da moakyeŋazba a shri akplo baŋ a klo a kom ŋa.
Oblus egi ayi Efliki ta la Odrusila
24Ambla ba elum fi nga, Efliki a ba ta la ashe baŋ moa a bzi ŋa Odrusila. Odrusila a wo a ba Eyahuda. Efliki a da mo a bzi Oblus, nga omba ba Oblus a lu odlo eshri obmi ba adlidzi ta la Ekristi Eyesu, a ngli atuŋ a gno. 25Ambo omba ba Oblus a lu odlo eshri odlodzi ta la onyuŋ eshri o zga, ta la Olum Ombgu la ó ba, eyli e kpo Efliki, nga a nyuŋ ŋa a lu mi le, Aŋo o yi eŋo a mo, ame é sa é bzi ŋo omba ba ame é hwiŋ anvaŋ. 26Omba he lo, a la a ka ma o dzu mbo, ma Oblus a shri amgbaŋ a shri a daŋ. Okyku eka he nga, ombayaŋ a mbo a kpo nga a la a bzi ŋa nga, a la a lu odlo ka la ŋa.
27Ambla ba eyi eha e bre nga, Obosiyo Efestu a nyiŋ a dzu ogomna. Omba ba Efliki a kyu otum abgo, a klo o raŋ moaEyahuda eso, okyku eka he a dzu Oblus a zga aku.
Currently Selected:
Otum 24: EGONT74
Highlight
Share
Compare
Copy
Want to have your highlights saved across all your devices? Sign up or sign in
Eggon New Testament © United Bible Societies, 1974. Bible Society of Nigeria
