Kenet 3
3
Kenet na Lewijin ko kitajin kase
1A kilo gwe a nyakwariat ti Arona se ko Mose i diŋit nagon MATAT jambi ko Mose i mere Sinai yu nu. 2#Ken 26.60 A kine gwe a karin ti ŋwajik ti Arona; Nadaba logon a kayu, a gwe a Abiu, ko Elejara, ko Itamar; 3kine a karin ti ŋwajik ti Arona logon a koanejin lo welaki, logon nye a ’börökiŋdya anyen kita a koanejin kulo.
4 #
Lew 10.1, 2; Ken 26.61 Ama Nadaba ko Abiu a twatwa ko MATAT i komor na wukiŋdye se kimaŋ na gwon ka ’de ko MATAT i komor nu, i yöbu na Sinai yu; a se gwe ’bak ŋwajik. A Elejara ko Itamar kitani a koanejin ko Arona monye lose i komor.
5A MATAT jambi ko Mose adi,
6Tomiju kötumit na Lewi nyona, ko ti lepeŋat gwo ’de ko koane Arona i komor anyen se böŋö kitakiŋdya lepeŋ.
7A se ködyö parakiŋdye lepeŋ se ko momoret na ŋutu liŋ i komor na kemia torumet, i koŋdya na kita na ŋinu kemia; 8a se tiji tito liŋ ti kemia torumet, a se ködyö parakiŋdye ŋutu ti Yisaraele a koŋdi kitajin ti nu kemia.
9A do ködyö geluŋdye Lewijin a ti Arona ko ŋwajik kanyit, se a tiki lepeŋ asut i kiden na ŋutu ti Yisaraele. 10A do ködyö wuluŋdye Arona se ko ŋwajik kanyit anyen kita a koanejin; ama ko ŋuto logon ’bayin a koane a mijun nyona i koŋdya na ŋina kita, a nye ködyö tatuani tatua.
11A MATAT jambi ko Mose adi,
12 #
Yuö 13.2
Mete, nan aje ’dumaddu Lewijin i kiden na ŋutu ti Yisaraele i pirit na kayujin liŋ logon ŋaju pelela kilo i kiden na ŋutu ti Yisaraele. A Lewijin mo gwe a ŋutu kwe, 13kogwon i ŋilu lor lo tatuje nan kayujin liŋ ti jur lo Ejipeto nu, a nan joŋgi kayujin liŋ a go kwe; kweja adi nan a gelakiŋdya mugun kayujin liŋ ti Yisaraele kode a ti ŋutu kode a ti toro ’bo; a se gwe a go kwe; nan logon a MATAT.
14A MATAT jambi ko Mose i yöbu na Sinai yu adi, 15Keŋdi nyakwariat ti Lewi gwoso i kötumitön ti merenyejin kase ko gwoso i midijik kase; do ködyö keŋdya lyan liŋ suluja i se logon ko yapa geleŋ tojo ko ŋerot. 16Nyena a Mose keŋdi lepeŋat gwoso nagon MATAT a sarakiŋdye lepeŋ nu. 17A kilo gwe a ŋwajik ti Lewi ko karin kase logon a ko Gereson, ko Kowat, se ko Merari. 18A kine gwe a karin ti ŋwajik ti Gereson gwoso i midijik kase, logon a ko Libeni ko Simei. 19A ŋwajik ti Kowat gwoso i midijik kase gwe a ko Ameram, ko Yisar, ko Keberon, se ko Ujiele. 20A ŋwajik ti Merari gwoso i midijik kase gwe a ko Makeli ko Musi. Kine a midijik ti Lewijin gwoso i kötumitön ti merenyejin kase.
21A mede na ŋutu ti Libeni se ko mede na ŋutu ti Simei gwe a ti Gereson; kine a midijik ti ŋutu ti Gereson. 22A kenet nase gwe a ŋutu alipan buryo ko miajin mukanat, gwoso i kenet na lyan liŋ suluja i se logon ko yapa geleŋ tojo ko ŋerot. 23A midijik ti ŋutu ti Gereson ködyö ’beggi kemialan kase i ki ’diŋ na nu kemia i swöt lo tokotyaŋ. 24A matat lo kötumit na merenyejin ti ŋutu ti Gereson gwe a Elayasap ŋuro lo Laele. 25a kita nagon a saraki ŋutu ti Gereson i tiju i kemia torumet na gwe a kemia, ko boŋgwat kanyit, ko mukesi ti ŋinu kemia, ko boŋgo muket na kötumit na kemia torumet, 26ko boŋgwat na leleyo a mariŋ, ko boŋgo muket na kötumit na nu mariŋ na lorga nu kemia se ko pirit ’yuret na rubaŋgajin, se ko patala kanyit; kweja adi kita na kine go liŋ. 27A mede na ŋutu ti Ameram, ko mede na ŋutu ti Yisar, ko mede na ŋutu ti Keberon, se ko mede na ŋutu ti Ujiele gwe a ti Kowat; iŋkoi kine a midijik ti ŋutu ti Kowat. 28A kenet na lyan liŋ suluja i se logon ko yapa geleŋ tojo ko ŋerot gwe a ŋutu alipan budök ko miajin buker lo tiju nu pirit nake na rurwan. 29A midijik ti ŋutu ti Kowat ködyö ’beggi kemialan kase i swöt lo loki lo nu kemia. 30A matat lo kötumit na merenyejin ti midijik ti ŋutu ti Kowat gwe a Elisapana ŋuro lo Ujiele. 31A kita nagon a saraki lepeŋat i tiju na gwe a saŋduk, ko misa, ko gwo ’diet lo lombojin, ko piritön ’yuresi, ko tito ti nu pirit nake na rurwan nagon koanejin kita kata nu, ko boŋgo koret; kweja adi kita na kine go liŋ.
32A Elejara ŋuro lo koane Arona ködyö gwe a duma lo ŋutu temejik ti Lewijin ko i gwon a kametanit lo katiyuk ti nu pirit nake na rurwan.
33A mede na ŋutu ti Makeli, ko mede na ŋutu ti Musi gwe a ti Merari; iŋkoi kine a midijik ti Merari. 34A kenet na lyan liŋ suluja i se logon ko yapa geleŋ tojo ko ŋerot gwe a ŋutu alipan buker ko miajin murek. 35A matat lo kötumit na merenyejin ti midijik ti Merari gwe a Suriele ŋuro lo Abikayile. A se ködyö ’beggi kemialan kase i swöt lo lobot lo nu kemia. 36a kita nagon a saraki ŋutu ti Merari i tiju na gwe a baulan ti kemia, ko turya görösi, ko togwi ’diesi, ko gwo ’diesi, se ko go kase liŋ; kweja adi kita na kine ŋo liŋ. 37Köti a se ködyö tiji togwi ’diesi ti nu mariŋ na logga kemia, ko gwo ’diesi kase, ko kaleto kase, se ko patala kase.
38A ŋutu logon ködyö ’beggu kemialan kase i komor na nu kemia torumet i swöt lo ’yure lo nyeruŋdye kolor kulo gwe a Mose, ko Arona se ko ŋwajik kanyit logon tiju nu pirit nake na rurwan a na ŋutu ti Yisaraele; a koŋuto logon ’bayin a lele lose a mijun nyona, a nye ködyö tatuani tatua.
39A kenet na Lewijin liŋ, kweja adi lyan liŋ suluja i se logon ko yapa geleŋ tojo ko ŋerot gwe a ŋutu alipan merya murek wot murek. Mose ko Arona lo keŋdya kilo ŋutu a midijik midijik gwoso na saŋi MATAT nu.
Lewijin a wulwe i pirit na kayujin, a pitönö ti kayujin iŋge dakwe
40A MATAT jambi ko Mose adi, Keŋdi kayujin lyan liŋ ti ŋutu ti Yisaraele, suluja i se logon ko yapa geleŋ tojo ko ŋerot gwoso i kenet na karin kase. 41A do ködyö joŋgi Lewijin a ŋutu kwe i pirit na kayujin liŋ ti ŋutu ti Yisaraele—nan logon a MATAT— a do köti ködyö joŋgi toro ’bo ti Lewijin i pirit na kayujin liŋ ti toro ’bo ti ŋutu ti Yisaraele. 42Nyena a Mose keŋdi kayujin liŋ ti ŋutu ti Yisaraele, gwoso na sarakiŋdye MATAT nye nu. 43a kayujin lyan liŋ gwoso i kenet na karin kase, suluja i se logon ko yapa geleŋ tojo ko ŋerot, se logon a kena kulo gwe a alipan merya murek wot murek ko miajin murek ko merya buryo wot musala.
44A MATAT jambi ko Mose adi,
45Joŋgi Lewijin i pirit na kayujin liŋ ti ŋutu ti Yisaraele, ko toro ’bo ti Lewijin i pirit na toro ’bo kase; a Lewijin ködyö gwe a ŋutu kwe: nan logon a MATAT. 46a kayujin miajin murek ko merya buryo wot musala ti ŋutu ti Yisaraele iŋge lwöŋ kenet na Lewijin, a pitönö kulo ködyö dakwene dakwe; 47a do ködyö ’dumuŋdye sekelejin mukanat i kilo ŋutu geleŋ geleŋ; a do ködyö joŋgi se ko temet na sekele na pirit nake na rurwan (sekele geleŋ a gerajin merya murek), 48a do tiŋdi Arona ko ŋwajik kanyit gurut dakesi ti kilo logon a lwöŋgu. 49Nyena a Mose ’dumuŋdye ’gurut dakesi i se lo lwöŋgu ŋutu logon Lewijin a dakun kulo; 50kweja adi nye a ’dumu ŋdya gurut gwoso sekelejin aliŋ geleŋ ko miajin musala ko merya buker wot mukanat, gwoso i temet na sekele na pirit nake na ruwan i kayujin ti ŋutu ti Yisaraele; 51a Mose tikiŋdye Arona ko ŋwajik kanyit kine gurut dakesi, gwoso na kulyari MATAT na, iŋkoi gwoso na saŋi MATAT Mose nu.
Bari Bible © United Bible Societies, 1979.